“ସ୍ୱସ୍ଥ ନାରୀ ସଶକ୍ତ ପରିବାର ଅଭିଯାନ” ଓ ମେଗା ବିଶେଷଜ୍ଞ ସ୍ୱାସ୍ଥ୍ୟ ଶିବିର
ପୋଲସରା(ଅନୀଲ କୁମାର ମହାରଣା) : ଗଞ୍ଜାମ ଜିଲ୍ଲାର ପୋଲସରା ବ୍ଲକ ଅନ୍ତର୍ଗତ ପାଣ୍ଡିରିଡାରେ କରୁଣା ଟ୍ରଷ୍ଟ ପରିଚାଳିତ ପାଣ୍ଡିରିପଡ଼ା ଆୟୁଷ୍ମାନ ଆରୋଗ୍ୟ ମନ୍ଦିର ଓ ପୋଲସରା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ପକ୍ଷରୁ ସେପ୍ଟେମ୍ବର ୨୫ ତାରିଖ ଦିନ “ସୁସ୍ଥ ନାରୀ ସଶକ୍ତ ପରିବାର ଅଭିଯାନ” ଓ ମେଗା ବିଶେଷଜ୍ଞ ସ୍ୱାସ୍ଥ୍ୟ ଶିବିର ଅନୁଷ୍ଠିତ ହୋଇଯାଇଛି। ଶିବିରର ପ୍ରାଥମିକ ଉଦ୍ଦେଶ୍ୟ ଥିଲା ମହିଳାଙ୍କ ସ୍ୱାସ୍ଥ୍ୟ ଏବଂ ପରିବାର ସଶକ୍ତିକରଣ ଉପରେ ସଚେତନତା ସୃଷ୍ଟି କରିବା ସହ ଏକ ମଞ୍ଚରେ ବ୍ୟାପକ ସ୍ୱାସ୍ଥ୍ୟସେବା ସୁବିଧା ପ୍ରଦାନ କରିବା। ପ୍ରଥମେ ଏସଏସପି ସଂଯୋଜକ ସ୍ୱାଗତ ଭାଷଣ ପ୍ରଦାନ ସହ ସମସ୍ତ ଅଂଶଗ୍ରହଣକାରୀ ଓ ମାନ୍ୟଗଣ୍ୟ ବ୍ୟକ୍ତିଙ୍କୁ ଶୁଭେଚ୍ଛା ଜଣାଇଥିଲେ। ଏଥିସହ ଅଭିଯାନର ଉଦ୍ଦେଶ୍ୟ ଓ ସାମୁଦାୟିକ ଲାଭ ଉପରେ ଆଲୋକପାତ କରିଥିଲେ। ପାଣ୍ଡିରିପଡା ମେଡ଼ିକାଲ ଅଫିସର, ପରିବାର ଓ ଗୋଷ୍ଠୀକୁ ସୁଦୃଢ଼ କରିବାରେ ମହିଳାମାନଙ୍କ ସ୍ୱାସ୍ଥ୍ୟର ଗୁରୁତ୍ୱପୂର୍ଣ୍ଣ ଭୂମିକା ଉପରେ ଆଲୋକପାତ କରିବା ସହ ପ୍ରେରଣାଦାୟକ ଅଭିଭାଷଣ ପ୍ରଦାନ କରିଥିଲେ। ସ୍ଥାନୀୟ ସରପଞ୍ଚ ଏହି ପଦକ୍ଷେପକୁ ପ୍ରଶଂସା କରିବା ସହ ଗୋଷ୍ଠୀର ଅଂଶଗ୍ରହଣକୁ ଉତ୍ସାହିତ କରିଥିଲେ। ଶିବିରରେ ଯୋଗଦାନ କରିଥିବା ସମସ୍ତ ହିତାଧିକାରୀ ରୋଗୀଙ୍କ ପଞ୍ଜୀକରଣ କରାଯାଇ ସ୍ୱତନ୍ତ୍ର ସ୍ୱାସ୍ଥ୍ୟସେବା ସୁବିଧା ଯୋଗାଇ ଦିଆଯାଇଥିଲା। ଶିବିରରେ ବିଶେଷଜ୍ଞ ଡାକ୍ତରଙ୍କ ଦ୍ଵାରା ସ୍ତ୍ରୀ ରୋଗ, ଶିଶୁ ଚିକିତ୍ସା, ଚକ୍ଷୁ ଯାଞ୍ଚ, ଲାବୋରେଟୋରି ସେବା, ଶଲ୍ୟ ଚିକିତ୍ସା, ଦନ୍ତ ଚିକିତ୍ସା, ମାଗଣା ଔଷଧ ବଣ୍ଟନ କରାଯାଇଥିଲା। ସମସ୍ତ ବିଶେଷଜ୍ଞ, ସ୍ୱାସ୍ଥ୍ୟସେବା କର୍ମଚାରୀ ଓ ଗୋଷ୍ଠୀ ନେତାଙ୍କ ଅବଦାନକୁ ସ୍ୱୀକାର କରି ଧନ୍ୟବାଦ ପ୍ରଦାନ ସହିତ ଶିବିର ଶେଷ ହୋଇଥିଲା। ରୋଗୀ ଓ ଅଂଶଗ୍ରହଣକାରୀଙ୍କ ପାଇଁ ପାନୀୟ ଜଳ ଓ ମଧ୍ୟାହ୍ନ ଭୋଜନ ବ୍ୟବସ୍ଥା କରାଯାଇଥିଲା। ମୋଟ ୫୪୬ ଜଣ ରୋଗୀ(ପୁରୁଷ ଓ ମହିଳା)ଙ୍କ ସ୍ୱାସ୍ଥ୍ୟ ସେବା ହୋଇଥିଲା। ଗୋଟିଏ ସ୍ଥାନରେ ସେବାର ଗୁଣବତ୍ତା, ମାଗଣା ଔଷଧ, ବହୁ-ବିଶେଷଜ୍ଞଙ୍କ ଉତ୍ତମ ପରାମର୍ଶ ପାଇଁ ଜନସାଧାରଣ ପ୍ରଶଂସା କରିଥିଲେ।
