ଜନସ୍ୱାର୍ଥ ମାମଲାରେ ଆବେଦନକାରୀଙ୍କ ନାଁକୁ ନେଇ ସତ୍ୟପାଠ, ଦସ୍ତଖତ ଯାଞ୍ଚ ପାଇଁ ହାଇକୋର୍ଟଙ୍କ ନିର୍ଦ୍ଦେଶ
କଟକ (ୟୁଏନ୍ଏସ୍): ହାଇକୋର୍ଟରେ ଏକ ଜନସ୍ୱାର୍ଥ ମାମଲା ଦାୟରକୁ ନେଇ ବିବାଦ । ୪ ଜଣ ଏହି ଜନସ୍ୱାର୍ଥ ମାମଲା ରୁଜୁ କରିଥିବା ବେଳେ ପରବର୍ତ୍ତୀ ସମୟରେ ଜଣଙ୍କର ନାମକୁ ନେଇ ବିବାଦ ଦେଖାଯାଇଛି। ବଡ କଥା ହେଉଛି କି ହାଇକୋର୍ଟରେ ଚାରି ଜଣ ଜନସ୍ବାର୍ଥ ମାମଲା ଦାୟର କରିଥିବା ବେଳେ ଏଥିରୁ ଜଣେ ଏପରି ଆବେଦନ କରି ନଥିବା ଦର୍ଶାଇଛନ୍ତି। ସୁକାନ୍ତ କୁମାର ନାୟକଙ୍କ ନାଁ ପ୍ରଥମ ଆବେଦନକାରୀ ଭାବେ ଆବେଦନରେ ଉଲ୍ଲେଖ କରାଯାଇଥିବା ବେଳେ ସେ କିନ୍ତୁ ଏପରି କୌଣସି ମାମଲା ପ୍ରତିପକ୍ଷଙ୍କ ବିରୋଧରେ ଦାୟର କରି ନାହାନ୍ତି ବୋଲି ଦର୍ଶାଇଛନ୍ତି। ଏପରିକି ସେ ଏନେଇ ଏକ ସତ୍ୟପାଠ ହାଇକୋର୍ଟରେ ଦାଖଲ କରିଛନ୍ତି। କେବଳ ସେତିକି ନୁହେଁ ଏହି ମାମଲାର ଅନ୍ୟ ତିନି ଜଣ ଆବେଦନକାରୀ ତାଙ୍କ ପାଇଁ ଅପରିଚିତ ବୋଲି ସୁକାନ୍ତ କୁମାର ନାୟକ ତାଙ୍କ ସତ୍ୟପାଠରେ ଦର୍ଶାଇଛନ୍ତି। ତେବେ ଜନସ୍ବାର୍ଥ ମାମଲାରୁ ତାଙ୍କ ନାଁ ବାଦ ଦିଆଯାଉ ବୋଲି ଗତ ମାର୍ଚ୍ଚ ୪ରେ ସେ ସତ୍ୟପାଠରେ ଦର୍ଶାଯାଇଛି। ଜନସ୍ବାର୍ଥ ମାମଲାର ଆବେଦନକାରୀଙ୍କୁ ନେଇ ଦେଖା ଦେଇଥିବା ବିବାଦକୁ ହାଇକୋର୍ଟ ଗୁରୁତ୍ବର ସହିତ ଗ୍ରହଣ କରିଛନ୍ତି। ଏହି ଜନସ୍ବାର୍ଥ ଆବେଦନରେ ସଂଲଗ୍ନ ହୋଇଥିବା ଓକିଲାତିନାମା ଓ ମାର୍ଚ୍ଚ ୪ର ସତ୍ୟପାଠ ତଥା ଏହା ସହିତ ସଂଲଗ୍ନ ଓକିଲାତିନାମାରେ ଥିବା ତାଙ୍କ ଦସ୍ତଖତର ଯାଞ୍ଚ ପାଇଁ ହାଇକୋର୍ଟ ନିର୍ଦ୍ଦେଶ ଦେଇଛନ୍ତି। ଭୁବନେଶ୍ୱରସ୍ଥିତ ରାଜ୍ୟ ଫରେନସିକ ସାଇନ୍ସ ଲାବୋରେଟୋରି (SFSL)ର ହସ୍ତାକ୍ଷର ବିଶେଷଜ୍ଞ ଏ ସମ୍ପର୍କରେ ପରବର୍ତ୍ତୀ ଶୁଣାଣି ସମୟରେ ରିପୋର୍ଟ ଦାଖଲ କରିବାକୁ ଓଡିଶା ହାଇକୋର୍ଟ ନିର୍ଦ୍ଦେଶ ଦେଇଛନ୍ତି। ଜନସ୍ବାର୍ଥ ଆବେଦନ ସହିତ ଦାଖଲ ଓକିଲାତିନାମାରେ ସୁକାନ୍ତ କୁମାର ନାୟକଙ୍କ ଦସ୍ତଖତ ଓ ମାର୍ଚ୍ଚ ୪ର ସତ୍ୟପାଠ, ଏହା ସହିତ ସଂଲଗ୍ନ ଓକିଲାତିନାମାରେ ରହିଥିବା ଦସ୍ତଖତ ସମାନ ବ୍ୟକ୍ତିଙ୍କ ବା ନୁହେଁ ସେ ନେଇ ରିପୋର୍ଟରେ ସ୍ପଷ୍ଟ କରିବାକୁ କୋର୍ଟ ନିର୍ଦେଶ ଦେଇଛନ୍ତି। ପରବର୍ତ୍ତୀ ଶୁଣାଣି ପୂର୍ବରୁ ଏ ସଂପର୍କିତ ରିପୋର୍ଟ ଦାଖଲ କରାଯିବ ବୋଲି ମୁଖ୍ୟ ବିଚାରପତି ଜଷ୍ଟିସ ହରିଶ ଟଣ୍ଡନ ଓ ଜଷ୍ଟିସ ସଙ୍ଗମ କୁମାର ସାହୁଙ୍କୁ ନେଇ ଗଠିତ ଖଣ୍ଡପୀଠ ନିର୍ଦ୍ଦେଶ ଦେଇଛନ୍ତି। ତେବେ ଏପ୍ରିଲ ୧୬ ରେ ମାମଲାର ପରବର୍ତ୍ତୀ ଶୁଣାଣି ପାଇଁ କୋର୍ଟ ଦିନ ଧାର୍ଯ୍ୟ କରିଛନ୍ତି। ସୁକାନ୍ତ କୁମାର ନାୟକ ଓ ଅନ୍ୟ ୩ ଜଣଙ୍କ ପକ୍ଷରୁ ଦାୟର ଜନସ୍ବାର୍ଥ ମାମଲାରେ ସୁକିନ୍ଦା ଅଞ୍ଚଳରେ ୧୩୨ଟି ବିଦ୍ୟାଳୟର ମରାମତି କାର୍ଯ୍ୟ ପ୍ରାୟ ୪୭ ଲକ୍ଷ ଟଙ୍କା ବ୍ୟୟରେ ବିନା ଟେଣ୍ଡରରେ କରାଯାଉଥିବା ଦର୍ଶାଯାଇଥିଲା। ଗତ ଫେବୃଆରୀ ୧୯ରେ ହାଇକୋର୍ଟ ଏହି ମାମଲାର ପ୍ରାରମ୍ଭିକ ଶୁଣାଣି କରି, ତଥ୍ୟ ଦାଖଲ ପାଇଁ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଥିଲେ। ଏହି ମାମଲା ବିଚାରାଧୀନ ଥିବା ବେଳେ ସୁକାନ୍ତ ନାୟକ ଗତ ମାର୍ଚ୍ଚ ୪ରେ ଏକ ସତ୍ୟପାଠ ଦାଖଲ କରି କୋର୍ଟ ଙ୍କୁ ଅବଗତ କରିଥିଲେ ଯେ ସେ ଏହି ଜନସ୍ବାର୍ଥ ମାମଲା ଦାୟର କରି ନାହାଁନ୍ତି । ତେବେ ରିପୋର୍ଟ ଆସିବା ପରେ ସମସ୍ତ କଥା ସ୍ପଷ୍ଟ ହୋଇଯିବ ।
