ମୌଳାଭଞ୍ଜା ସଡକ ଦୁର୍ଘଟଣା :ସାନଭାଇଙ୍କ ମୃତ୍ୟୁ ପରେ ବଡ଼ଭାଇ ମୃତ

ଦିଗପହଣ୍ଡି,(ଅଳକ ନାଥ ମିଶ୍ର): ଦିଗପହଣ୍ଡି ଥାନା  ମୌଳାଭଞ୍ଜା ଗ୍ରାମ ନିକଟ ମାଁ ସାତଭଉଣୀ ମନ୍ଦିର ନିକଟରେ ମଙ୍ଗଳବାର ସନ୍ଧ୍ୟାରେ  ଟାଟା ଏସିଇ ଗାଡ଼ି ଏବଂ ସ୍କୁଟି ମଧ୍ୟରେ ମୁହାଁମୁହିଁ ଧକ୍କା ହୋଇଥିଲା । ଘଟଣାସ୍ଥଳରେ ସାନଭାଇ ଅଜୟ କୁମାର ମହାରଣା ଓରଫ ମିଟୁଙ୍କ ମୃତ୍ୟୁ ହୋଇଥିବା ବେଳେ ବୁଧବାର ଅପରାହ୍ନରେ ବଡ଼ଭାଇ ଅରୁଣ କୁମାର ମହାରଣାଙ୍କ ଚିକିତ୍ସାଧିନ ଅବସ୍ଥାରେ ବ୍ରହ୍ମପୁର ବଡ଼ ମେଡ଼ିକାଲରେ ମୃତ୍ୟୁ ହୋଇଯାଇଥିବା ଜଣାପଡିଛି ।  ଦିଗପହଣ୍ଡି ବ୍ଳକ ସହଦେବ ଟିକରପଡା ଗ୍ରାମର ତ୍ରିନାଥ ମହାରଣାଙ୍କ ସହଧର୍ମିଣୀ କନକଲତା ମହାରଣାଙ୍କ ଗତ ୧୦ ଦିନ ପୂର୍ବେ ମୃତ୍ୟୁବରଣ ହୋଇଥିଲା । ମଙ୍ଗଳବାର ଦିନ ଏକାଦଶାହ କାର୍ଯ୍ଯ ରହିଥିବା ବେଳେ ବୁଧବାର  ଦ୍ବାଦଶାହ ଶୁଦ୍ଧି ଭୋଜି କାର୍ଯ୍ୟ ନିମନ୍ତେ ଦୁଇଭାଇ ଅଜୟ ଓ ଅରୁଣ ନିଜ ସ୍କୁଟି ଯୋଗେ ବାଳକୃଷ୍ଣପୁର ଗ୍ରାମରୁ ସହଦେବ ଟିକରପଡା ଯାଉଥିଲେ । ଏହି ସମୟରେ ଦୁର୍ଘଟଣା ଘଟିଥିଲା। ଉଭୟଙ୍କୁ ଉଦ୍ଧାର କରାଯାଇ ଦିଗପହଣ୍ଡି ମେଡିକାଲ ଅଣାଯାଇଥିଲା । ସେଠାରେ ଉପସ୍ଥିତ ଡାକ୍ତର ସାନଭାଇ ଅଜୟଙ୍କୁ ମୃତ ଘୋଷିତ କରିବା ସହ ଅରୁଣଙ୍କୁ ବ୍ରହ୍ମପୁର ବଡ଼ ଡାକ୍ତରଖାନାକୁ ସ୍ଥାନାନ୍ତରିତ କରିଥିଲେ ।  ବୁଧବାର ଅପରାହ୍ନ ପ୍ରାୟ ସାଢେ ୨ ଟା ସମୟରେ ଚିକିତ୍ସାଧୀନ ଅବସ୍ଥାରେ ଅରୁଣଙ୍କ ମୃତ୍ୟୁ ହୋଇଥିବା ପରିବାର ଲୋକଙ୍କୁ ଡାକ୍ତର ସୂଚନା ଦେଇଥିଲେ । ସ୍ତ୍ରୀ ଓ ଦୁଇ ରୋଜଗାରିଆ ପୁଅକୁ ହରାଇ ବାପା ତ୍ରିନାଥ ଭାଙ୍ଗି ପଡିଛନ୍ତି । ଯେହେତୁ ସ୍ତ୍ରୀ ଙ୍କ ଏକାଦଶାହ ରେ ସାନପୁଅ ଏବଂ ଦ୍ବାଦଶାହ ରେ ବଡ଼ପୁଅର ଏଭଳି ମୃତ୍ୟୁକୁ ସହ୍ୟ କରିପାରୁ ନାହାନ୍ତି ତ୍ରିନାଥ । ଏନେଇ ତଦନ୍ତକାରୀ ଅଧିକାରୀ ଦିଗପହଣ୍ଡି ଥାନା ଏଏସଆଇ ମନୋଜ ସିଂ  ମାମଲା ନଂ.୪୨୯/୨୫ ଅନୁଯାୟୀ   ଉଭୟ ଗାଡିକୁ ଜବତ କରି ତଦନ୍ତ ଚଳାଇଥିବା ବେଳେ ଗାଡ଼ି ଚାଳକ ଫେରାର ରହିଛନ୍ତି । ପୁଲିସ ବୁଧବାର ସକାଳୁ  ଅଜୟଙ୍କ ମୃତଦେହ ଜବତ କରି ବ୍ୟବଛେଦ ନିମନ୍ତେ ବ୍ରହ୍ମପୁର ପଠାଇଥିଲା । ଅପରାହ୍ନ ଗୋଟାଏ ସମୟରେ ମୃତଦେହ ଗ୍ରାମରେ ପହଞ୍ଚିବାର କିଛି କ୍ଷଣକ ମଧ୍ୟରେ ବଡ଼ଭାଇ ଅରୁଣଙ୍କ ମୃତ୍ୟୁ ଖବର ଗ୍ରାମରେ ପହଞ୍ଚିବା ପରେ ଗ୍ରାମରେ ଶୋକାକୁଳ ପରିବେଶ ସୃଷ୍ଟି ହୋଇଯାଇଥିଲା । ବିଳମ୍ବିତ ସନ୍ଧ୍ୟାରେ ଅରୁଣଙ୍କ ମୃତଦେହ  ଗ୍ରାମରେ ପହଞ୍ଚିବା ସହ ଗାଁ ଶ୍ମଶାନରେ ଗୋଟିଏ ଯୁଇ ରେ ଦୁଇଭାଇଙ୍କ ଅନ୍ତିମ ସଂସ୍କାର ହୋଇଥିଲା । ଦିଗପହଣ୍ଡି ତହସିଲଦାର ସନ୍ତୋଷ କୁମାର ସାହୁ ଗ୍ରାମରେ ପହଞ୍ଚି ମୃତକ ଙ୍କ ପରିବାର ଲୋକଙ୍କୁ ସମବେଦନା ଜଣାଇବା ସହ ରେଡକ୍ରସ ପାଣ୍ଠି ରୁ ୬୦ ହଜାର ଟଙ୍କା ଅନୁକମ୍ପା ମୂଳକ ସହାୟତା ପ୍ରଦାନ କରିଛନ୍ତି।