ବାଲେଶ୍ୱରରେ ନୂତନ ମଦ ଦୋକାନକୁ ନେଇ ବିଧାୟକ ମାନସ ଦତ୍ତଙ୍କ ଉଦବେଗ

ବାଲେଶ୍ବର(ସରୋଜ ପଣ୍ଡା): ରାଜ୍ୟରେ ନୂତନ ମଦ ଦୋକାନ ଖୋଲିବା ନେଇ ରାଜ୍ୟ ସରକାରଙ୍କ ଯୋଜନା କରୁଥିବା ନେଇ ବିରୋଧି ଦଳମାନେ ଅପପ୍ରଚାର ଚଳାଇଥିବା ବେଳେ ଅବକାରୀ ମନ୍ତ୍ରୀ ଏ ସମ୍ପର୍କରେ ବିଧାନସଭାରେ ସ୍ପଷ୍ଟୋକ୍ତି ରଖିଛନ୍ତି । ଓଡିଶାରେ ନୂତନ ମଦ ଦୋକାନ ଖୋଲିବା ନେଇ ସରକାର କୌଣସି ପ୍ରକାର ନିଷ୍ପତ୍ତି ନେଇଥିବା ଅଥବା ଏ ଦିଗରେ କୌଣସି ବିଜ୍ଞପ୍ତି ପ୍ରକାଶ କରିଥିବା ସମ୍ପର୍କରେ ବାଲେଶ୍ୱର ସଦର ବିଧାୟକ ମାନସ କୁମାର ଦତ୍ତ ବିଧାନସଭାରେ ଏକ ଅଣତାରକା ପ୍ରଶ୍ନ ଉଠାଇଥିଲେ । ଯଦି ସରକାର ଏ ବାବଦରେ ଚିନ୍ତା କରିଥାଆନ୍ତି, ତାହେଲେ ରାଜ୍ୟରେ ଖୋଲାଯିବାକୁ ଥିବା ମଦ ଦୋକାନର ସ୍ଥାନ ଓ ବର୍ଗୀକରଣର ବିବରଣୀ ପ୍ରଦାନ ପାଇଁ ଶ୍ରୀ ଦତ୍ତ ଅନୁରୋଧ କରିଥିଲେ । ତେବେ ସାମାଜିକ ବାସ୍ତବତାକୁ ଦୃଷ୍ଟିରେ ରଖି ବାଲେଶ୍ୱରରେ ପ୍ରସ୍ତାବିତ ମଦ ଦୋକାନ ଖୋଲିବା ନିଷ୍ପତ୍ତିକୁ ସ୍ଥଗିତ ରଖିବାକୁ ବିଧାୟକ ଶ୍ରୀ ଦତ୍ତ ନିର ପ୍ରଶ୍ନ ମାଧ୍ୟମରେ ନିବେଦନ କରିଥିଲେ ।  ଓଡିଶାର କୌଣସି ଜିଲ୍ଲାରେ ନୂତନ ଠିପି ବନ୍ଦ ଅଥବା ଦେଶୀ ମଦ ଦୋକାନ ଖୋଲିବା ନେଇ ସରକାରଙ୍କ ପକ୍ଷରୁ କୌଣସି ବିଜ୍ଞପ୍ତି ପ୍ରକାଶ ପାଇନାହିଁ କି ଏ ବାବଦରେ କୌଣସି ଚିନ୍ତା ମଧ୍ୟ କରାଯାଇନାହିଁ ବୋଲି ବିଧାୟକ ଶ୍ରୀ ଦତ୍ତଙ୍କ ପ୍ରଶ୍ନର ଉତ୍ତରରେ ଅବକାରୀ ମନ୍ତ୍ରୀ ପୃଥୀରାଜ ହରିଚନ୍ଦନ ପ୍ରକାଶ କରିଛନ୍ତି । ତେବେ କୌଣସି ସ୍ଥଳେ ନୂତନ ଠିପି ଖୋଲା ହୋଟେଲ କିମ୍ବା ରେଷ୍ଟୁରାଂଟ ଖୋଲିବା ନେଇ ଆବେଦନ ହେଲେ, ସରକାରୀ ନିୟମ ଅନୁଯାୟୀ ନୂତନ ଆବେଦନର ତର୍ଜମା ସହ ନିଷ୍ପତ୍ତି ନିଆଯିବାର ବ୍ୟବସ୍ଥା ରହିଛି । ଅନ୍ୟପକ୍ଷରେ ବାଲେଶ୍ୱର ଜିଲ୍ଲାରେ ଗୋଟିଏ ହେଲେ ନୂତନ ମଦ ଖୋଲାଯିବା ନେଇ କୌଣସି ପ୍ରସ୍ତାବ ନାହିଁ ବୋଲି ମନ୍ତ୍ରୀ ଶ୍ରୀ ହରିଚନ୍ଦନ ସୂଚନା ଦେଇଛନ୍ତି ।