ପଡିଛି ୩୫୦ରୁ ଅଧିକ ଦରଖାସ୍ତ : ଅମିନ ଅଭାବରୁ ହୋଇପାରୁନି ଜମି ମାପଚୁପ

କାକଟପୁର /ଅସ୍ତରଙ୍ଗ (ଶୁଭାଶିଷ ଖଣ୍ଡୁଆଳ) :-ପୁରୀ ଜିଲ୍ଲା ଅସ୍ତରଙ୍ଗ ତହସିଲ ଅଧୀନ ରେ ୧୫ଗୋଟି ପଂଚାୟତ କୁ ନେଇ ତହସିଲର କଳେବର। ଦିନକୁ ଦିନ କାର୍ଯ୍ୟ ଭାର ବଢିଛି।କିନ୍ତୁ ଏଠାରେ କର୍ମଚାରୀ ଅଭାବ ପାଇଁ ସାଧାରଣ ଲୋକ ମାନେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ୫ଟି ରାଜ୍ଵସ ସର୍କଲର ଜମିଜମା ସମସ୍ୟା, ଜାତିଗତ, ବାସିନ୍ଦା, ଜାତି ପ୍ରମାଣପତ୍ର, ଇତ୍ୟାଦି ପାଇଁ ଅସ୍ତରଙ୍ଗ ତହସିଲ କାର୍ଯ୍ୟାଳୟକୁ ଆସିବାକୁ ପଡିଥାଏ। ଏପରିକି ଜମିଜମା ମାପଚୁପ ପାଇଁ ଅସ୍ତରଙ୍ଗ ତହସିଲ କାର୍ଯ୍ୟାଳୟ କୁ ଆସିବାକୁ ହେଲେ ଦୂରଦୁରାନ୍ତ ତଣ୍ଡାହାର, ଶିଶୁଅ, ସହନ, ସରିପୁର ଲୋକଙ୍କୁ ୫ରୁ ୧୦କିଲୋମିଟର ଅତିକ୍ରମ କରିବାକୁ ପଡିଥାଏ। ତେବେ ତହସିଲ କାର୍ଯ୍ୟାଳୟ କୁ ଦୌଡ଼ି ଦୌଡ଼ି ଲୋକେ ନିରାଶ ହୋଇ ଫେରୁଛନ୍ତି। ନିଜର ଜମିଜମା ମାପଚୁପ ପାଇଁ ବର୍ଷ ବର୍ଷ ଧରି ଆବେଦନ କରି ବର୍ତମାନ ସୁଦ୍ଧା ଅପେକ୍ଷାର ଅନ୍ତ ଘଟିଲା ନାହିଁ। ଅସ୍ତରଙ୍ଗ ତହସିଲ ଅଧୀନ ରେ ଥିବା ମାଣ୍ଡୁକି, କେନ୍ଦ୍ରାପଟି,ଅସ୍ତରଙ୍ଗ, ନଗର ଓ ନଈଗୁଆଁ ରାଜ୍ବସ ସର୍କଲ ଅଧୀନରେ ଥିବା ପାଖାପାଖି ୩୫୦ରୁ ଉର୍ଦ୍ଧ ଆବେଦନକାରୀ ନିଜର ଜାଗାର ମାପଚୁପ ପାଇଁ ଆବେଦନ କରି ଏବେ ଧର୍ଯ୍ୟହରା ହୋଇପଡିଲେଣି। ତହସିଲରେ ଜଣେ ମାତ୍ର ଅମିନ ଥିବାରୁ ନା ସରକାରୀ ଜମି ମାପଚୁପ ହୋଇପାରୁଛି, ନା ଆବେଦନକାରୀଙ୍କ ଜମିଜମା ମାପଚୁପ ସମସ୍ୟାର ସମାଧାନ ହୋଇପାରୁଛି। ଏହାର ସୁଯୋଗ ନେଇ ବେସରକାରୀ ଅମିନ ମାନେ ୧୫ଶହ ଟଙ୍କାରୁ ୪ହଜାର ଟଙ୍କା ଲୋକ ମାନଙ୍କ ପାଖରୁ ନେଉଛନ୍ତି। ଅନେକ ସ୍ଥାନରେ ତାହା ସଠିକ ମାପଚୁପ ହେଉନାହିଁ। ଯାହାକି ଦ୍ୱନ୍ଦ୍ୱ ସୃଷ୍ଟି ହେଉଛି। ସରକାରୀ ଅମିନଙ୍କ ଡିମାରକେସନକୁ ସାଧାରଣତଃ ବୈଧ ଭାବେ ଗ୍ରହଣ କରାଯାଏ। ବେସରକାରୀ ଅମିନ ଆସି ମାପଚୁପ କରିବା ଦ୍ୱାରା ଉଭୟ ପକ୍ଷ ମଧ୍ୟରେ ଗଣ୍ଡଗୋଳ ସ୍ତରକୁ ମାମଲା ଯାଉଛି। ମାପଚୁପ କରିବା ପାଇଁ ନିୟମ ଅନୁଯାୟୀ ଆବେଦନ କରିଥିବା ବ୍ୟକ୍ତି ହେଉ ବା ସମୂହ ଗୋଷ୍ଠୀ ଯେଉଁ ଜାଗାର ମାପଚୁପ ହେବ, ସେ ଜାଗାର ପଟ୍ଟା, ଜାଗା ଚାରି ପଟରେ ଥିବା ଜମି ମାଲିକଙ୍କ ନାମ ଉଲ୍ଲେଖ ରହିବ। ପରେ ମାପଚୁପ ହେବାକୁ ଥିବା ଜାଗାର ଚାରି ପଟ ଲୋକଙ୍କୁ ନୋଟିସ କରାଯାଇ ତହସିଲ ଡକାଯିବ ଓ ଶୁଣାଣି ମଧ୍ୟ କରାଯିବ। ଏହା ପରେ ମାପଚୁପ ଆରମ୍ଭ ହେବା ପାଇଁ ଆବେଦନକାରୀ ଓ ଜାଗାର ଚାରିପଟ ଲୋକଙ୍କୁ ଯେଉଁ ତାରିଖରେ ମାପ କରାଯିବ ଉପସ୍ଥିତ ରହିବା ପାଇଁ ନୋଟିସ ଦିଆଯିବ। ଏ ସବୁ ପ୍ରକ୍ରିୟା ବର୍ତମାନ ସୁଦ୍ଧା ତହସିଲ କାର୍ଯ୍ୟାଳୟରେ ଆରମ୍ଭ ହୋଇ ପାରିନାହିଁ। ଜମି ମାପଚୁପ ପାଇଁ ସରକାରୀ ବିଲ ବହୁତ କମ୍। କିନ୍ତୁ ବେସରକାରୀ ଅମିନଙ୍କ ଦାବିକୁ ଗରିବ ଗୁରୁବା ଲୋକ ପୂରଣ କରିବା ସମ୍ଭବ ନୁହେଁ। ଏଣେ ଲୋକଙ୍କୁ ନ୍ୟାୟ ଦିଆଯାଉଛି ବୋଲି ପ୍ରଶାସନ ଡିଣ୍ଡିମ ପିଟୁଥିବା ବେଳେ ବିଚରା ସାଧାରଣ ଲୋକଟିଏ ନିଜର ଜାଗା ମାପଚୁପ ପାଇଁ ଚାହିଁ ବସୁଛି। ପ୍ରଶାସନ ଏ ଦିଗରେ ଦୃଷ୍ଟି ଦେଇ ତହସିଲରେ ଅଧିକ କିମ୍ବା ଆବଶ୍ୟକ ମୁତାବକ ଅମିନ ନିଯୁକ୍ତି ଦେବାକୁ ସାଧାରଣରେ ଦାବି ହୋଇଛି।