ସରକାରଙ୍କ ବ୍ୟବସ୍ଥା ନାହିଁ: ମିଳୁନି ବାଲି, ଚିନ୍ତାରେ ଆବାସ ହିତାଧିକାରୀ

ହାଟଡିହି (ଓ୍ବାଇଏନଏସ): ଆବାସ ଯୋଜନା ହିତାଧିକାରୀଙ୍କ ପାଇଁ ସରକାରଙ୍କ ସ୍ୱତନ୍ତ୍ର ଵିଧି ବ୍ୟବସ୍ଥା ନଥିବାରୁ ଆବାସ ଯୋଜନା ହିତାଧିକାରୀ ମାନେ ନାହିଁ ନଥିବା ଅସୁବିଧାର ସମୁଖୀନ ହେଉଛନ୍ତି। ସରକାର ବେଆଇନ ବାଲି କାରବାର ଉପରେ ରୋକ ଲଗାଇବା ପରେ ଏବେ ବାଲି ସଙ୍କଟ ଦେଖା ଦେଇଛି।  ଆବାସ ଘର ନିର୍ମାଣ ପାଇଁ ହିତାଧିକାରୀ ବାଲି ପାଇ ପାରୁନି। ହାଟଡିହି ଅଞ୍ଚଳରେ ବେଆଇନ ବାଲି ଉତ୍ତୋଳନ ଓ ପରିବହନ ଚାଲୁଥିବା ବେଳେ ଗତ କିଛିଦିନ ହେଲା ପୋଲିସ ଓ ଖଣି ବିଭାଗ ପକ୍ଷରୁ ଚଢ଼ାଉ ପରେ ଏବେ ବେଆଇନ ବାଲି କାରବାର ଠପ ହୋଇଯାଇଛି। ହାଟଡିହି ଅଞ୍ଚଳରେ ଅନେକ ଗୁଡିଏ ବାଲି ସୈରାତ ଥିବା ବେଳେ ସେଠାରୁ ବାଲି ଆଣି ଆବାସ ହିତାଧିକାରୀ ଆବାସ ଯୋଜନାରେ ଘର କରିବା ଅସମ୍ଭବ ହୋଇ ପଡିଛି। ବିନା ଟ୍ରାଂଜିଟ ବାଲି ଗାଡିକୁ ଖଣି ବିଭାଗ ଜବଦ କରିବା ପରେ ଏପରି ସମସ୍ୟା ଦେଖା ଦେଇଛି। ପରମିଟ ଥିବା ଗୋଟିଏ ବାଲି ଟ୍ରାକ୍ଟରର ଦାମ ୮ରୁ ୧୦ ହଜାର ପଡୁଥିବାରୁ ଗୋଟିଏ ଆବାସ ଘର ନିର୍ମାଣ କରିବାକୁ ୪ ରୁ ୫ ଟ୍ରାକ୍ଟର ବାଲିର ଆବଶ୍ୟକତା ପଡୁଛି। ଫଳରେ ହିତାଧିକାରୀ ପାଉଥିବା ଲକ୍ଷେ କୋଡିଏ ହଜାରରୁ ଯଦି ୫୦ ରୁ ୬୦ ହଜାର ବାଲି ପାଇଁ ଖର୍ଚ କରିବ ତେବେ ଘର କାମ ସମ୍ପୂର୍ଣ୍ଣ କିପରି ହେବ ବୋଲି ଶ୍ରୀକାନ୍ତ ଜେନା, ବାବୁଲି ନାଏକ, ପ୍ରସନ୍ନ ଜେନା ପ୍ରମୁଖ ହିତାଧିକାରୀ ମାନେ ପ୍ରଶ୍ନ କରିଛନ୍ତି। ଖାଲି ଆବାସ ହିତାଧିକାରୀ ନୁହନ୍ତି ରାସ୍ତା ଠାରୁ ଗୃହ ନିର୍ମାଣ ପର୍ଯ୍ୟନ୍ତ ସମସ୍ତ ଉନ୍ନୟନ କାର୍ଯ୍ୟରେ ବାଲିର ଆବଶ୍ୟକତା ଥିବାରୁ ସରକାର ବାଲି ସୈରାତ ନିଲାମ ଦେବାବେଳେ ଏସବୁ ପ୍ରତି ଗୁରୁତ୍ୱ ଦେଲେନି। ଯାହାଦ୍ୱାରା ଏବେ ସବୁ କ୍ଷେତ୍ରରେ ବାଲି ଅଭାବ ପରିଲକ୍ଷିତ ହେଲାଣି। ଗୋଟିଏ ଟ୍ରାକ୍ଟର ବାଲି ଭଡାରୁ ଦୁଇ ଶହରୁ ତିନି ଶହ ଟଙ୍କା ପାଉଥିବା ବେଳେ ପରମିଟ ପାଇଁ ଧରାପଡି ଲକ୍ଷାଧିଜ ଟଙ୍କା ଜୋରିମାନା ଦେଉ ଥିବାରୁ ସେମାନେ ବାଲି ବୋହିବା ପାଇଁ ରାଜି ହେଉ ନାହାନ୍ତି। ସେପଟେ ସରକାର ଆବାସ ଘର ସମ୍ପୂର୍ଣ୍ଣ କରିବା ଦିଗରେ ଅଧିକାରୀ ମାନଙ୍କ ଉପରେ ଚାପ ପକାଉଛନ୍ତି। ଏପଟେ ଘର ସମ୍ପୂର୍ଣ୍ଣ ନକଲେ ଚାଉଳ କାଟିବା ଭୟ ଏବେ ହିତାଧିକାରୀଙ୍କୁ ଚିନ୍ତାରେ ପକାଇଛି। ଆବାସ ହିତାଧିକାରୀ ମାନଙ୍କୁ ବାଲି ଯୋଗାଇ ଦେବାକୁ ସରକାର ସ୍ୱତନ୍ତ୍ର ପଦକ୍ଷେପ ନିଅନ୍ତୁ ବୋଲି ହିତାଧିକାରୀ ମାନେ ଦାବି କରିଛନ୍ତି। ଏ ସମ୍ପର୍କରେ ବିଡ଼ିଓ ରଞ୍ଜନ କୁମାର ପରିଡ଼ାଙ୍କୁ ପଚାରିବାରେ ସେ କହିଛନ୍ତି ଯେ ସେ ଅନେକ ଗାଁ ପରିଦର୍ଶନ କରିବା ବେଳେ ହିତାଧିକାରୀ ମାନେ ବାଲି ସମସ୍ୟା କଥା କହୁଛନ୍ତି। ତେଣୁ ଏନେଇ ଆମେ ସରକାରଙ୍କୁ ଜଣାଇବୁ, ସରକାର ଯାହା ବ୍ୟବସ୍ଥା କରିବେ ବୋଲି କହିଛନ୍ତି।