ଓଢଣ ଷଷ୍ଠୀରେ ମା ‘ମଙ୍ଗଳାଙ୍କ ଘୋଡ ଲାଗି ବେଶ

କାକଟପୁର /ଅସ୍ତରଙ୍ଗ(ଶୁଭାଶିଷ ଖଣ୍ଡୁଆଳ) :-ମାର୍ଗଶିର ଶୁକ୍ଲପକ୍ଷ ଷଷ୍ଠୀ ତିଥିରେ ପୁରୀ ଜିଲ୍ଲା କାକଟପୁର ଅଧିତାଷ୍ଟି ଦେବୀ ଜଗତଜନନୀ ମା “ମଙ୍ଗଳା ମନ୍ଦିରରେ ବିଳମ୍ବିତ ରାତ୍ରରେ ଓଢଣ ଷଷ୍ଠୀ ତିଥିରେ ଘୋଡଲାଗି ନୀତି ଅନୁଷ୍ଠିତ ହୋଇଯାଇଛି। ମାର୍ଗଶିର ଷଷ୍ଠୀଠାରୁ ଘୋଡଲାଗି ଆରମ୍ଭ ହୋଇ ମାଘ ବସନ୍ତ ପଞ୍ଚମୀ ଯାଏଁ ଏମିତି ୬୦ଦିନ ପର୍ଯ୍ୟନ୍ତ ଚାଲୁରହେ। ଏହାକୁ ଘୋଡଲାଗି ବେଶ କୁହାଯାଇଥାଏ। ପୁରୀ ଜିଲ୍ଲା କାକଟପୁର ବାସିନୀ ମା “ମଙ୍ଗଳା ଙ୍କର ବାର ମାସରେ ତେରପର୍ବ। ବିଭିନ୍ନ ଯାନୀଯାତ୍ରା, ଉତ୍ସବ, ପାର୍ବଣ ମା “ମଙ୍ଗଳା ମନ୍ଦିରରେ ପାଳନ ହୁଏ। ଶୀତ ଦିନରେ ଶୀତ ଦାଉରୁ ରକ୍ଷା ପାଇଁ ମା “ମଙ୍ଗଳା ଶୀତ ବସ୍ତ୍ର ତଥା ଘୋଡଧାରଣ କରିଥାନ୍ତି। ଘୋଡବସ୍ତ୍ର ମାନ ସାଧାରଣତଃ ମଖମଲ ଓ ସୂତା କପଡାରେ ସ୍ୱତନ୍ତ୍ର ଶୈଳୀରେ ପ୍ରସ୍ତୁତ କରାଯାଇଥାଏ। ପରମ୍ପରା ଅନୁଯାୟୀ ମା “ମଙ୍ଗଳା ପ୍ରତ୍ୟେକ ବାରରେ ଭିନ୍ନ ଭିନ୍ନ ଘୋଡବସ୍ତ୍ର ଲାଗି ହୋଇଥାନ୍ତି। ଓଢଣ ଷଷ୍ଠୀ ଅବସରରେ ମା ମଙ୍ଗଳା ଙ୍କ ସକାଳ ଧୂପ, ମଇଲମ୍, ଅବକାଶ ନୀତି ସହ ବିଭିନ୍ନ ନୀତିକାନ୍ତି ସମ୍ପର୍ଣ୍ଣ ପରେ ରାତ୍ରଧୂପ ସରିବା ପରେ ଘୋଡଲାଗି ବେଶ ଅନୁଷ୍ଠିତ ହୁଏ। ଏହା ସହ ମନ୍ଦିର ଭିତରେ ଥିବା ବିଭିନ୍ନ ପାର୍ଶ୍ୱ ଦେବା ଦେବୀ ମଧ୍ୟ ଶୀତ ବସ୍ତ୍ର ପରିଧାନ କରିଥାନ୍ତି। ମା ‘ମଙ୍ଗଳା ଙ୍କ ସ୍ୱତନ୍ତ୍ର ଘୋଡଲାଗି ବେଶ ଦର୍ଶନ ପାଇଁ ଭକ୍ତ ମନରେ ଅନେକ ଉତ୍କଣ୍ଠା ଦେଖା ଦେଇଥାଏ।