ବସ ଦୁର୍ଘଟଣାରେ ଜଣେ ମୃତ, ଅନ୍ୟ ଜଣେ ଆହତ
ବନ୍ତ,(ଚାନ୍ଦିନୀ ମହାନ୍ତି) : ଗୁରୁବାର ପୂର୍ବାହ୍ନ ପ୍ରାୟ ୧୨ଟା ସମୟରେ ବନ୍ତ ଥାନା ଅଧିନ ଭଦ୍ରକ-ଆନନ୍ଦପୁର ୫୩ନଂ. ରାଜ୍ୟ ରାଜପଥର ବଗଦା କାଶିପୁର ଛକ ଠାରେ ବସ ଚାପାରେ ଜଣେ ଯୁବକ ମୃତ୍ୟୁ ବରଣ କରିଥିବା ବେଳେ ଅନ୍ୟ ଜଣେ ଯୁବକ ଗୁ୍ରୁତର ଆହତ ହୋଇ ଭଦ୍ରକ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି ହୋଇଥିବା ଜଣାଯାଇଛି । ମୃତ ଯୁବକ ଜଣକ ଟିଲୋ ମାଳିସାହି ଗ୍ରାମର ପଦ୍ମନାଭ ସାହୁଙ୍କ ପୁଅ ସ୍ମୃତି ରଞ୍ଜନ(୨୪) ହୋଇଥିବା ବେଳେ ଗୁରୁତର ଆହତ ଜଣକ ଟିଲୋ ବଡସାହି ଗ୍ରାମର ସୁବ୍ରତ ବରାଳ(୧୯) ବୋଲି ଜଣାଯାଇଛି । ପ୍ରକାଶ ଯେ, ଆଜି ପୂର୍ବାହ୍ନ ପ୍ରାୟ ୧୨ଟା ସମୟରେ ଟିଲୋ ମାଳିସାହି ଗ୍ରାମର ପଦ୍ମନାଭ ସାହୁଙ୍କ ପୁତ୍ର ସ୍ମୃତି ରଞ୍ଜନ ଓ ଟିଲୋ ବଡସାହି ଗ୍ରାମର ସୁବ୍ରତ ବରାଳ ଏକ ବାଇକ ଯୋଗେ ବରପଦାରୁ ବନ୍ତ ଅଭିମୁଖେ ଆସୁଥିଲେ । ଏହି ସମୟ ମଧ୍ୟରେ ବିଶ୍ୱନାଥ ନାମକ ଯାତ୍ରାବାହୀ ବସ ଭଦ୍ରକରୁ ଆନନ୍ଦପୁର ଅଭିମୁଖେ ଆସୁଥିବା ବେଳେ ବଗଦା କାଶିପୁର ଛକ ନିକଟରେ ବସଟି ଡାହାଣ ପାଖକୁ ମାଡି ଭାରସାମ୍ୟ ହରାଇ ମଟର ସାଇକେଲଟିକୁ ଧକ୍କା ଦେବାରୁ ସ୍ମୃତି ରଞ୍ଜନ ବସ ଚକା ତଳେ ପଡିଯାଇଥିଲେ । ତାଙ୍କ ମୁଣ୍ଡ ଉପରେ ବସ ଚକା ଚଢି ଯିବାରୁ ଘଟଣା ସ୍ଥଳରେ ତାଙ୍କର ମୃତ୍ୟୁ ଘଟିଥିଲା । ପଛରେ ବସିଥିବା ଟିଲୋ ବଡସାହି ଗ୍ରାମର ସୁବ୍ରତ ଗୁରୁତର ଭାବେ ଆହତ ହୋଇଥିଲେ । ଏହାକୁ ନେଇ ଘଟଣା ସ୍ଥଳରେ ଉତ୍ତ୍ୟକ୍ତ ଲୋକେ ଟାୟାର ଜାଳି ରାସ୍ତା ଅବରୋଧ କରିଥିଲେ । ଖବର ପାଇ ବନ୍ତ ପୋଲିସ ଘଟଣା ସ୍ଥଳରେ ପହଞ୍ôଚ ଥିଲା । ଅତିରିକ୍ତ ତହସିଲଦାର ପ୍ରସନ୍ନ କୁମାର ମହାନ୍ତି, ଥାନାଧିକାରୀ ମୋନାଲିସା କରଙ୍କ ସମେତ ସରପଞ୍ଚ ପ୍ରତିନିଧି ସନ୍ତୋଷ କୁମାର ନାୟକ, ଖଗେଶ୍ୱର ବେହେରା ପ୍ରମୁଖ ଅବରୋଧକାରୀଙ୍କୁ ବୁଝାସୁଝା କରିବା ପରେ ପ୍ରାୟ ୨ ଘଣ୍ଟା ପରେ ରାସ୍ତା ଅବରୋଧ ହଟିଥିଲା । ମୃତ ଯୁବକଙ୍କ ଶବ ବ୍ୟବଚ୍ଛେଦ ପାଇଁ ଜିଲା ମୁଖ୍ୟ ଚିକିତ୍ସାଳୟକୁ ପଠାଯାଇଥିଲା । ପରେ ରାସ୍ତାର ଉଭୟ ପାଶ୍ୱର୍ରେ ଅଟକି ରହିଥିବା ଯାନବାହାନ ଚଳାଚଳ ସ୍ୱାଭାବିକ ହୋଇଥିଲା ।
