ଧାନ କଟା ଆରମ୍ଭ :-ଚାଷୀ ପଞ୍ଜିକରଣରେ ସମବାୟ ବିଭାଗ କର୍ମଚାରୀ ଦୁର୍ନୀତି ସନ୍ଦେହ

କାକଟପୁର /ଅସ୍ତରଙ୍ଗ (ଶୁଭାଶିଷ ଖଣ୍ଡୁଆଳ):-କେଉଁଠି ଧାନ ପାଚିଲାଣି ତ ଆଉ କେଉଁଠି ପାଚିଲା ଧାନ କଟା ହୋଇ ଜମିରେ ପଡିଛି। ଅମଳ ଲାଗି ପ୍ରସ୍ତୁତ ହେଲାଣି ପୁରୀ ଜିଲ୍ଲା ଅସ୍ତରଙ୍ଗ ବ୍ଲକ ଅଂଚଳର ଚାଷୀ। କେତେକ ସ୍ଥାନରେ ଧାନ କଟା ଆରମ୍ଭ କଲେଣି। ଅଥଚ ସାଟେଲାଇଟି ସର୍ଭେରୁ ସନ୍ଦେହଜନକ ପ୍ଲଟ ବାବଦ ରିପୋର୍ଟ ଆସିନି। ଯଦି ଫସଲ କଟା ଯାଇଥିବା ଜମି ସାଟେଲାଇଟି ସର୍ଭେ ରୁ ସନ୍ଧିଗ୍ଧ ଭାବେ ଚିହ୍ନଟ ହୁଏ, ତେବେ ଚାଷୀ ଙ୍କ ଲାଗି ସମସ୍ୟା ଉପୁଜିବ। ଆଗାମୀ ଖରିଫ ମଣ୍ଡିରେ ଧାନ ବିକ୍ରି କରିବାକୁ ଟୋକନ ଆସିବା ନେଇ ଆଶଙ୍କା ରହିବ। ତେଣୁ କଟାଯିବା ପୂର୍ବରୁ ସନ୍ଦେହ ଜନକ ପ୍ଲଟ ରିପୋର୍ଟ ଅନୁସାରେ ଯାଞ୍ଚ ହେଲେ ଭବିଷ୍ୟତରେ ସେମାନଙ୍କ ପାଇଁ ସମସ୍ୟା ରହିବ ନାହିଁ ବୋଲି ଅସ୍ତରଙ୍ଗ ବ୍ଲକ ଅଂଚଳର ବହୁ କୃଷକ କହିଛନ୍ତି। ପୁରୀ ଜିଲ୍ଲା ଅସ୍ତରଙ୍ଗ ବ୍ଲକ ଅଂଚଳର ଚାଷୀଙ୍କ କଥା, ଜଳସେଚିତ ଅଂଚଳରେ ଏବେ ଧାନ ପାଚି ଗଲାଣି। ଗତ ସପ୍ତାହରେ ଲଘୁଚାପ ଜନିତ ଲଗାଣ ବର୍ଷା ଯୋଗୁଁ ବେଗୁନିଆବସ୍ତ ସମେତ ଅନେକ ସ୍ଥାନରେ କିଛି ଚାଷୀ ଧାନ କାଟି ଦେଇଥିବା ବେଳେ ଆଉ ଏବେ ପାଚିଥିବା ଧାନ କୁ ଆଣିବାକୁ ଚାଷୀ ପ୍ରସ୍ତୁତ ହେଉଛନ୍ତି। ଅଧିକ ଦିନ ପାଚିଲା ଧାନ ଜମିରେ ରଖିବାକୁ ଚାହୁଁ ନାହାନ୍ତି। କାରଣ ଧାନ କାଟିବା ପୂର୍ବରୁ ବର୍ଷା ପବନ ହେଲେ ଫସଲ ନଷ୍ଟ ସାଙ୍ଗକୁ ବାରହା ଉପଦବ୍ର ଆଶଙ୍କା ରହିଛି। ଅଥଚ ଏ ପର୍ଯ୍ୟନ୍ତ ସାଟେଲାଇଟି ସର୍ଭେ ରୁ ସନ୍ଦେହ ଜନକ ପ୍ଲଟ ବାବଦ ରିପୋର୍ଟ ଆସିନି। ରିପୋର୍ଟ ଆସିଲେ ହିଁ ଜଣା ପଡିବ କେଁଉ ପ୍ଲଟ ରେ ଧାନ ଚାଷ ହୋଇଛି ଆଉ କେଁଉ ପ୍ଲଟରେ ଧାନ ଚାଷ ହୋଇନି। ଗତବର୍ଷ ଅସ୍ତରଙ୍ଗ ବ୍ଲକର ୧୦ଟି ପ୍ୟାକ୍ସ ରେ ଅନେକ ଚାଷୀ ପଞ୍ଜିକରଣ କରିଥିବା ବେଳେ ଅନେକ ଜମି ପଞ୍ଜିକରଣ ଜାଲିଆତି ସାମ୍ନାକୁ ଆସିଥିଲା। ଚାଷୀ ପଞ୍ଜିକରଣ କରିଥିବା ଜମିରେ ପ୍ରକୃତ ଧାନ ଚାଷ ହୋଇଛି ନା ଆଉ କେଁଉ ଫସଲ ହୋଇଛି ତାହା ଜାଣିବା ପାଇଁ ପ୍ରତି ବର୍ଷ ସାଟେଲାଇଟି ସର୍ଭେ ହେଉଛି। ସାଟେଲାଇଟି ସର୍ଭେରୁ ଆସିଥିବା ତଥ୍ୟ ଅନୁସାରେ ସେହି ପ୍ଲଟ କୁ ଯାଇ ସମବାୟ ବିଭାଗ କର୍ମଚାରୀ ଯାଞ୍ଚ କରିବେ। ସନ୍ଦେହ ଜନକ ପ୍ଲଟରେ ପ୍ରକୃତରେ ଚାଷ ହୋଇଛି ନା ନାହିଁ ସ୍ପଷ୍ଟ କରିବେ। ବର୍ତମାନ ଅସ୍ତରଙ୍ଗ ବ୍ଲକ ଅଂଚଳରେ ବିଭିନ୍ନ ସ୍ଥାନରେ ଧାନ ଅମଳ ଆରମ୍ଭ ହୋଇଥିଲେ ବି ଏ ଯାଏଁ ଏହି ପ୍ରକ୍ରିୟା ଆରମ୍ଭ ହୋଇନି। ଚାଷୀ ଧାନ କାଟି ଖଳାକୁ ନେବା ପରେ ଯଦି ଉକ୍ତ ପ୍ଲଟ ସାଟେଲାଇଟି ସର୍ଭେରେ ସନ୍ଦେହ ଜନକ ବୋଲି ତଥ୍ୟ ଆସେ ତେବେ ଚାଷୀ ଙ୍କ ପାଇଁ ସମସ୍ୟା ଉପୁଜିବ। ପୂର୍ବରୁ ଏଭଳି ସମସ୍ୟା ହୋଇଛି ଓ ଚାଷୀ ଧାନ ବିକ୍ରି ରୁ ବଂଚିତ ହୋଇଛନ୍ତି। ଏଣୁ ଜମିରେ ଧାନ ଫସଲ ଥିବା ସମୟରେ ଏହି ଯାଞ୍ଚ କରାଯିବା ଦରକାର ବୋଲି ବିଭିନ୍ନ ଗ୍ରାମର କୃଷକ ଉଲ୍ଲେଖ କରିଛନ୍ତି। ଏହାକୁ ଜିଲ୍ଲା ପ୍ରଶାସନ ଗୁରୁତର ସହ ନେଇ ତୁରନ୍ତ ସାଟେଲାଇଟି ସର୍ଭେ କାର୍ଯ୍ୟ ଆରମ୍ଭ କରିବା ଉଚିତ।