ଓଡ଼ିଆ ସ୍କୁଲରେ ତେଲୁଗୁ ପାଠ ପଢ଼ାଇଲେ ପ୍ରଧାନଶିକ୍ଷକ : ଛାତ୍ରଛାତ୍ରୀ ବୁଝି ପାରୁନଥିବା ପ୍ରତିବାଦରେ ବିଦ୍ୟାଳୟରେ ତାଲା ପକାଇଲେ ଅଭିଭାବକ
ପାରଳାଖେମୁଣ୍ଡି,(ତାରିଣୀ ପ୍ରସାଦ ପଣ୍ଡା ): ଗଜପତି ଜିଲ୍ଲାର ଗୋଷାଣୀ ବ୍ଲକର ରମ୍ପା ପଞ୍ଚାଯତ ଅନ୍ତର୍ଗତ ବୁରୁସାହି ପ୍ରାଥମିକ ବିଦ୍ୟାଳୟରେ ପ୍ରଧାନଶିକ୍ଷକ ତେଲୁଗୁ ଭାଷାଭାଷୀ ହୋଇଥିବା ଯୋଗୁଁ ଓଡ଼ିଆ ଛାତ୍ରଛାତ୍ରୀମାନଙ୍କୁ ପାଠ ପଢାଇଲେ ତାହା ଛାତ୍ରଛାତ୍ରୀମାନେ ବୁଝି ପାରୁନାହାନ୍ତି. ଏଥିସହ ବିଦ୍ୟାଳୟରେ ସଦାସର୍ବଦା ସେ ମୋବାଇଲରେ ବ୍ୟସ୍ତ ରହୁଛନ୍ତି. ତେଣୁ ସମ୍ପୃକ୍ତ ପ୍ରଧାନଶିକ୍ଷକଙ୍କୁ ବଦଳି ଦାବି କରି ବିଦ୍ୟାଳୟରେ ଅଭିଭାବକ ଓ ଅଞ୍ଚଳବାସୀ ଫାଟକରେ ତାଲା ପକାଇଛନ୍ତି। ଏଠାରେ ସୂଚନାଯୋଗ୍ୟଯେ, ଏହି ବିଦ୍ୟାଳୟ ୧୯୯୯ ମସିହାରେ ସ୍ଥାପିତ ହୋଇଥିବା ବେଳେ ବର୍ତ୍ତମାନ ଏଠାରେ ୪୩ ଜଣ ଛାତ୍ରଛାତ୍ରୀ ପ୍ରଥମରୁ ପଞ୍ଚମ ଶ୍ରେଣୀରେ ଅଧ୍ୟୟନ କରୁଛନ୍ତି । ବିଦ୍ୟାଳୟରେ ପ୍ରଧାନଶିକ୍ଷକଙ୍କ ସମେତ ୩ ଜଣ ଶିକ୍ଷକ ଅଛନ୍ତି। ପ୍ରଧାନଶିକ୍ଷକ ତେଲୁଗୁ ଭାଷାଭାଷୀ ହୋଇଥିବା ବେଳେ ସେ ଛାତ୍ରଛାତ୍ରୀଙ୍କୁ ପାଠ ପଢ଼ାଉନାହାନ୍ତି | ବିଗତ ୧୨ ବର୍ଷ ମଧରେ ସମ୍ପୃକ୍ତ ପ୍ରଧାନଶିକ୍ଷକ ଏହି ବିଦ୍ୟାଳୟରେ ଶିକ୍ଷକ ଭାବେ ଏବଂ ପରବର୍ତ୍ତୀ ସମୟରେ ପ୍ରମୋସନ ପାଇ ପ୍ରଧାନଶିକ୍ଷକ ହୋଇଛନ୍ତି। ସେ ତେଲୁଗୁ ଭାଷାର ହୋଇଥିବା ଯୋଗୁ ଛାତ୍ରଛାତ୍ରୀଙ୍କୁ ଓଡ଼ିଆ ପାଠ ପଢାଇଲେ ଓଡ଼ିଆ ପିଲାମାନେ କିଛି ବୁଝିପାରୁ ନଥିବା ଏବଂ ବିଦ୍ୟାଳୟକୁ ଆସିଲେ ସେ ଅଧିକାଂଶ ସମୟ ମୋବାଇଲରେ ବ୍ୟସ୍ତ ରହୁଛନ୍ତି. ଯଦ୍ୱାରା ସ୍କୁଲରେ ଶିକ୍ଷାଦାନ ସମ୍ପୂର୍ଣ ଭାବେ ବ୍ୟାହତ ହେଉଛି. ତେଣୁ ଏସବୁକୁ ଦର୍ଶାଇ ଜିଲ୍ଲା ଶିକ୍ଷାଧିକାରୀଙ୍କ ଠାରୁ ଆରମ୍ଭ କରି ସ୍ଥାନୀୟ ପ୍ରଶାସନ ଓ ଶିକ୍ଷା ବିଭାଗରେ ବାରମ୍ବାର ଅଭିଯୋଗ ଆସୁଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ନ ଥିବାରୁ ବାଧ୍ଯ ହୋଇ ବିଦ୍ୟାଳୟରେ ତାଲା ପକାଇଛନ୍ତି ଅଭିଭାବକ ଓ ଅଞ୍ଚଳବାସୀ. ପରେ ସ୍ଥାନୀୟ ଶିକ୍ଷାଧିକାରୀଙ୍କ ଅନୁରୋଧ ଓ କାର୍ଯାନୁଷ୍ଠାନ ଗ୍ରହଣ କରାଯିବ ବୋଲି ପ୍ରତିଶୃତି ଦେବା ପରେ 2 ଘଣ୍ଟା ପରେ ବିଦ୍ୟାଳୟର ତାଲା ଖୋଲା ଯାଇଥିଲା ବୋଲି ଏସ୍ଏମ୍ସି ସଭାପତି ବୁଡୁ ଶବର, ଗାବ୍ରିଏଲ ଶବର, ଇସ୍ରାଇଲ ଶବର, ସୁଜାତା ଶବର, ପୁଷ୍ପା ଶବର, ସାମିଏଲ ଶବର ଓ ଭବାନୀ ଶବର ପ୍ରମୁଖ କହିଛନ୍ତି. ଯଦି ଉଚିତ ପଦକ୍ଷେପ ନ ନିଆଯାଏ ତାପରେ ପୁଣି ଦାବି ହାସଲ ପର୍ଯ୍ୟନ୍ତ ବିଦ୍ୟାଳୟରେ ତାଲା ପକାଯିବ ବୋଲି ଏମାନେ ଚେତାବନୀ ଦେଇଛନ୍ତି I
