ଶିକ୍ଷକ ଅଭାବ ଯୋଗୁଁ ଶିକ୍ଷାଦାନରେ ବାଧା: ଜିଲାପାଳଙ୍କ ନିର୍ଦ୍ଦେଶକୁ ବେଖାତିର କରି ଯୋଗ ଦେଲେନି ଶିକ୍ଷୟିତ୍ରୀ

ଆରଡ଼ି ( ଆଲୋକ ଚନ୍ଦ୍ର ନାୟକ ) : ଭଦ୍ରକ ଜିଲ୍ଲା ଚାନ୍ଦବାଲି ବ୍ଲକ ଅଧୀନ ସୁନ୍ଦରପୁର ପଞ୍ଚାୟତର ମଠଡିହ ଠାରେ ଥିବା ମଠଡିହ ନୋଡାଲ ଉଚ୍ଚ ବିଦ୍ୟାଳୟରେ ଶିକ୍ଷକ ଅଭାବ ଯୋଗୁଁ ଶିକ୍ଷାଦାନରେ ବାଧା ଉପୁଜୁଥିବା ଜଣା ପଡିଛି । ଏନେଇ ଭଦ୍ରକ ଜିଲା ଶିକ୍ଷାଧିକାରୀ, ଜିଲାପାଳ, ମନ୍ତ୍ରୀ ସୂର୍ଯ୍ୟବଂଶୀ ସୂରଜଙ୍କୁ ଅବଗତ କରାଯାଇଥିଲେ ବି ସମସ୍ୟାର ସମାଧାନ ହୋଇପାରୁ ନାହିଁ । ବିଦ୍ୟାଳୟରେ ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ୨୭୫ ଜଣ ଛାତ୍ରୀଛାତ୍ର ଅଧ୍ଯୟନ କରୁଥିଲା ବେଳେ ନବମ ଏବଂ ଦଶମରେ ୨୦୮ ଜଣ ପାଠ ପଢୁଛନ୍ତି । ୧ମ ରୁ ୮ମ ଛାତ୍ରୀଛାତ୍ରୁୀଙ୍କୁ ପଢାଇବା ପାଇଁ ୫ ଜଣ ଶିକ୍ଷୟିତ୍ରୀ ଓ ଶିକ୍ଷକ ଶିକ୍ଷାଦାନ କରୁଥିବା ବେଳେ କ୍ରୀଡା ଶିକ୍ଷୟିତ୍ରୀଙ୍କୁ ଲଗାଇ ୭ଜଣ ନବମ ଓ ଦଶମରେ ଶିକ୍ଷାଦାନ କରୁଛନ୍ତି । ଦୀର୍ଘ ବର୍ଷ ହେବ ବିଦ୍ୟାଳୟରେ ପ୍ରଧାନ ଶିକ୍ଷକ ପଦ ଖାଲି ଥିଲାବେଳେ ଜଣେ ସହକାରୀ ( ଗଣିତ ) ଶିକ୍ଷୟିତ୍ରୀ ଏହି ଦାୟିତ୍ବ ତୁଲାଉଛନ୍ତି । ନିୟମ ଅନୁସାରେ ପ୍ରତି ୩୫ ଜଣ ଛାତ୍ରୀଛାତ୍ରଙ୍କ ପାଇଁ ଜଣେ ଶିକ୍ଷକ ନିଯୁକ୍ତି ପାଇବା କଥ‍ା । ସେହିପରି ଉଚ୍ଚ ବିଦ୍ୟାଳୟରେ ମଧ୍ୟ ଶିକ୍ଷକ ଅଭାବରେ ଶିକ୍ଷାଦାନ ଚାଲିଛି । ପ୍ରତିଦିନ ଶିକ୍ଷାଦାନ ବ୍ୟତିତ ମଧ୍ୟାହ୍ନ ଭୋଜନ ପରିଚାଳନା କାର୍ଯ୍ୟ କରିବାକୁ ଶିକ୍ଷୟିତ୍ରୀ ଶିକ୍ଷକ ଧନ୍ଦି ହେଉଥିବା ବେଳେ ଅଧିକାରୀ ମାନଙ୍କ ଶିକ୍ଷକ ନିଯୁକ୍ତି ଟାଳଟୁଳ ନୀତି ଯୋଗୁଁ ସେମାନେ ଶିକ୍ଷାଦାନରେ ଅସୁବିଧା ଭୋଗ କରୁଛନ୍ତି । ଶିକ୍ଷକ ଅଭାବକୁ ଉପଲବ୍ଧି କରି ଗତ ଅକ୍ଟୋବର ମାସରେ ଜିଲ୍ଲା ଶିକ୍ଷାଧିକାରୀଙ୍କ କାର୍ଯାଳୟରୁ ପତ୍ର ସଂଖ୍ୟା ୯୯୯୩/୦୮.୧୦.୨୦୨୫ରେ ନିକଟସ୍ଥ ଧାମନଗର ବ୍ଲକର ପାଳସାହି ଗ୍ରାମ ପଞ୍ଚାୟତ ବାଳିକା ଉଚ୍ଚ ବିଦ୍ୟାଳୟର କାର୍ଯ୍ୟରତ ଶିକ୍ଷୟିତ୍ରୀ ସସ୍ମିତା ମହାରଣାଙ୍କୁ ଏହି ବିଦ୍ୟ୍ୟାଳୟକୁ ଟ୍ରାନସ୍ଫର କରା ଯାଇଥିଲା । ସେହି ଶିକ୍ଷୟିତ୍ରୀ ଜଣକ ଏଯାଏଁ ଏହି ବିଦ୍ୟାଳୟରେ କାର୍ଯ୍ୟରେ ଯୋଗ ଦେଇ ନଥିଲା ବେଳେ ତାଙ୍କ ବଦଳି ଆଦେଶ ମଧ୍ୟ ବାତିଲ ହୋଇନାହିଁ । ଶିକ୍ଷାଧିକାରୀ ଜଗବନ୍ଧୁ ସାହୁ ସେହି ଶିକ୍ଷୟିତ୍ରୀଙ୍କ ଉପରେ କୌଣସି କାର୍ଯ୍ୟାନୁଷ୍ଠାନ ନନେବାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ସୂଚନା ଥାଉକି ଗତ ସେପ୍ଟେମ୍ବର ମାସରେ ଏହି ବିଦ୍ୟାଳୟରୁ ଲିପିକା ମହାନ୍ତି ନାମକ ଜଣେ ଶିକ୍ଷୟିତ୍ରୀ ଧାମନଗରକୁ ବଦଳି ହୋଇଥିବା ବେଳେ ଗତ ଅକ୍ଟୋବର ମାସରେ ମତୃତ୍ବ ଛୁଟିରେ ଥିବା ଶିକ୍ଷୟିତ୍ରୀ ରେବତୀ କହଁରଙ୍କୁ ଫୁଲବାଣୀ ଜିଲ୍ଲାକୁ ବଦଳି କରାଯାଇଛି । ମାସକ ମଧ୍ୟରେ ୨ ଜଣ ଶିକ୍ଷୟିତ୍ରୀଙ୍କୁ ଏହି ବିଦ୍ୟାଳୟରୁ ଶିକ୍ଷାଧିକାରୀ କେଉଁ ନ୍ୟାୟରେ ବଦଳି କଲେ ଛାତ୍ରୀଛାତ୍ରୀଙ୍କ ଅଭିଭାବକ ମାନେ ପ୍ରଶ୍ନ କରିଛନ୍ତି । ଯଦି ୧୫ ଦିନ ମଧ୍ୟରେ ଉଭୟ ଉଚ୍ଚ ଓ ପ୍ରାଥମିକ ବିଦ୍ୟାଳୟରେ ଶିକ୍ଷକ ନିଯୁକ୍ତି କରା ନଯାଏ ତେବେ ବିଦ୍ଯାଳୟ ଫାଟକରେ ତାଲା ପକାଇ ଆନ୍ଦୋଳନ କରିବେ ବୋଲି ବିଦ୍ଯାଳୟ ଶିକ୍ଷାପରିଚାଳନା କମିଟି ଓ ପଞ୍ଚସଖା ଶିକ୍ଷା ସେତୁ କମିଟି ସଦସ୍ୟ ମାନେ ଚେତାବନି ଦେଇଛନ୍ତି । ଏ ସଂକ୍ରାନ୍ତରେ ଏକ ଦାବିପତ୍ର ଜିଲା ଶିକ୍ଷାଧିକାରୀ ଓ ଜିଲାପାଳଙ୍କୁ ଡାକ ଯୋଗେ ପ୍ରେରଣ କରାଯାଇଛି ବୋଲି ବିଦ୍ୟାଳୟ ଶିକ୍ଷା ପରିଚାଳନା କମିତି ସଭାପତି ଅମରେନ୍ଦ୍ର ବିଶ୍ବାଳ ସୂଚନା ଦେଇଛନ୍ତି । ଜିଲା ଶିକ୍ଷାଧିକାରୀ ଜଗବନ୍ଧୁ ସାହୁଙ୍କୁ ବହୁବାର ଯୋଗାଯୋଗ କରା ଯାଇଥିଲେ ବି ସେ କୌଣସି ଉତ୍ତର ଦେଇନାହାଁନ୍ତି ।