ବାଲେଶ୍ଵର ରିଂ-ରୋଡ ଚଳିତ ଆର୍ଥିକ ବର୍ଷରେ ଟେଣ୍ଡର ଆହ୍ବାନ ହେବ : ନିର୍ମାଣ ମନ୍ତ୍ରୀ

ବାଲେଶ୍ବର(ସରୋଜ ପଣ୍ଡା): ସଂପ୍ରସାରିତ ବାଲେଶ୍ୱର ସହରର ବର୍ଦ୍ଧିତ ଲୋକସଂଖ୍ୟା ଓ ଯାନବାହାନ ସଂଖ୍ୟାକୁ ଦୃଷ୍ଟିରେ ରଖି ଟ୍ରାଫିକ୍ ବ୍ୟବସ୍ଥାକୁ ସୁଗମ କରିବା ପାଇଁ ସହର ଚତୁଃପାଶ୍ୱର୍ରେ ରିଙ୍ଗରୋଡ଼ ନିର୍ମାଣ ପ୍ରକଳ୍ପକୁ ରାଜ୍ୟ ସରକାର ଗତ ୨୦୨୪-୨୫ ଆର୍ôଥକ ବର୍ଷରେ ଷ୍ଟେଟ ପ୍ଲାନରେ ଅନ୍ତର୍ଭୁକ୍ତ କରିଥିଲେ। ଏହା ସହିତ ସରକାର ପ୍ରକଳ୍ପ ପାଇଁ ଏକ ଟୋକେନ ଗ୍ରାଂଟ ବା ପ୍ରତୀକ ଅନୁଦାନ ଅର୍ଥ ମଞ୍ଜୁର କରିଥିଲେ। ହେବା ବର୍ଷକ ମଧ୍ୟରେ କେବଳ ସର୍ଭେ ସରିଥିବା ବେଳ ପ୍ରକଳ୍ପ କାର୍ଯ୍ୟ ଆଗେଇ ପାରିନି। ଏହାକୁ ନେଇ ବିଧାନସଭାରେ ସଦର ବିଧାୟକ ମାନସ କୁମାର ଦତ୍ତ ପ୍ରଶ୍ନ ଉଠାଇଥିଲେ। ବାଲେଶ୍ୱର ସହରର ଜନସାଧାରଣ ଆବଶ୍ୟକତାକୁ ଦୃଷ୍ଟିରେ ରଖି ବହୁ ଆକାଂକ୍ଷିତ ପ୍ରକଳ୍ପକୁ ଯୋଜନାବଦ୍ଧ ଭାବେ ତଥା ନିର୍ଦ୍ଦିଷ୍ଟ ସମୟସୀମା ମଧ୍ୟରେ ଆରମ୍ଭ କରିବାକୁ ବିଭାଗୀୟ ମନ୍ତ୍ରୀଙ୍କୁ ନିବେଦନ କରିଥିଲେ। ବିଧାୟକ ଶ୍ରୀ ଦତ୍ତଙ୍କ ପ୍ରଶ୍ନର ଉତ୍ତରରେ ପୂର୍ତ୍ତ ବିଭାଗ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ କହିଥିଲେ ଯେ, ବିଭାଗୀୟ ଯୋଜନା ଅନୁସାରେ ରିଙ୍ଗ ରୋଡ ପ୍ରକଳ୍ପ କାର୍ଯ୍ୟର ଅଗ୍ରଗତି ହୋଇଛି । ସର୍ଭେ ପରେ ପ୍ରକଳ୍ପର ଦୁଇଟି ଏଲାଇନମେଂଟ ଉପରେ ବିଚାର ଚାଲିଥିଲା । ପରେ ଯେଉଁ ଏଲାଇନମେଂଟ ଫ୍ରିଜ ହୋଇଥିଲା ତାହାର ପ୍ଲାନ ଓ ପ୍ରୋଫାଇଲ ଯାଂଚ ଜାରି ରହିଛି । ଏହି କାର୍ଯ୍ୟ ସରିବା ପରେ ପ୍ରକଳ୍ପର ଡିପିଆର ଓ ଏଷ୍ଟିମେଟ ପ୍ରସ୍ତୁତ ହେବ । ତାପରେ ଜମି ଅଧିଗ୍ରହଣ ସହ ଅନ୍ୟାନ୍ୟ କାର୍ଯ୍ୟ ଆରମ୍ଭ ହେବ । ତେବେ ଚଳିତ ଆର୍ôଥକ ବର୍ଷରେ ପ୍ରକଳ୍ପର ଟେଣ୍ଡର ପ୍ରକ୍ରିୟା ଆରମ୍ଭ ହେବ ବୋଲି ମନ୍ତ୍ରୀ ଶ୍ରୀ ହରିଚନ୍ଦନ କହିଛନ୍ତି । ତେବେ ସମସ୍ତ ବୈଷୟିକ ପ୍ରକ୍ରିୟା ପାଇଁ ଆବଶ୍ୟକୀୟ ଯେତିକି ସମୟ ଲାଗିବା କଥା, ସେହି ଅନୁସାରେ କାର୍ଯ୍ୟ ଚାଲିଛି । ବାଲେଶ୍ୱର ସହରର ରିଙ୍ଗ ରୋଡ ପ୍ରକଳ୍ପ କାର୍ଯ୍ୟକାରୀ କରିବା ପାଇଁ ସରକାର ଏହାକୁ ହାତକୁ ନେଇ ଟୋକେନ ଗ୍ରାଂଟ ପ୍ରଦାନ କରିଛନ୍ତି । ଅନ୍ୟପକ୍ଷରେ ବାଲେଶ୍ୱର ସଦର ନିର୍ବାଚନମଣ୍ଡଳୀରେ ରିଙ୍ଗ ରୋଡକୁ ମିଶାଇ ମୋଟ ୧୪ଟି ରାସ୍ତା ପ୍ରକଳ୍ପକୁ ମଞ୍ଜୁରୀ ଦିଆଯାଇଛି । ଏଥି ମଧ୍ୟରୁ ୮ଟିରେ ଟେଣ୍ଡର ସରିଥିବା ବେଳେ ୩ଟି ପ୍ରକଳ୍ପର ଟେଣ୍ଡର ପ୍ରକ୍ରିୟା ମଧ୍ୟରେ ରହିଛି । ଅନ୍ୟ ୨ଟି ପ୍ରକଳ୍ପର ଏଷ୍ଟିମେଟ ଚାଲିଛି । ରିଙ୍ଗ ରୋଡ ପ୍ରକଳ୍ପକୁ ଛାଡି ଅନ୍ୟ ୧୩ଟି ପ୍ରକଳ୍ପ ପାଇଁ ୧୩୧କୋଟି ଟଙ୍କାର ଅନୁଦାନ ମଞ୍ଜୁର ହୋଇଛି । ରାଜ୍ୟର ସମସ୍ତ ମହାନଗର ନିଗମ ସହିତ ବଡ ବଡ ପୌରପାଳିକାରେ ଯାତାୟତ ବ୍ୟବସ୍ଥାକୁ ନିୟନ୍ତ୍ରିତ କରିବା ପାଇଁରିଙ୍ଗ ରୋଡ ଅଥବା ବାଇପାସ ରାସ୍ତା ନିର୍ମାଣ ଦିଗରେ ରାଜ୍ୟ ସରକାର ପଦକ୍ଷେପ ନେଉଛନ୍ତି ବୋଲି ମନ୍ତ୍ରୀ ଶ୍ରୀ ହରିଚନ୍ଦନ କହିଛନ୍ତି । ଏହା ଦ୍ୱାରା ଟ୍ରାଫିକ୍ ସମସ୍ୟା ଦୂର ସହିତ ସହରଗୁଡିକର କଳେବର ମଧ୍ୟ ବୃଦ୍ଧି ପାଇବାରେ ସହାୟକ ହେବ । ଏହା ସହିତ ବର୍ଦ୍ଧିତ ସହରର ଆବଶ୍ୟକତା ଅନୁଯ୍ୟାୀ ବିଭିନ୍ନ ଯୋଜନା କାର୍ଯ୍ୟକାରୀ ପାଇଁ ସରକାର ଉଚିତ ବ୍ୟବସ୍ଥା ଗ୍ରହଣ କରୁଛନ୍ତି ବୋଲ ମନ୍ତ୍ରୀ ଶ୍ରୀ ହରିଚନ୍ଦନ ସୂଚନା ଦେଇଛନ୍ତି ।