ହନିଟ୍ରାପ୍ ର ଖେଳର ଅନ୍ତ ଘଟଇଲା ପୁରୀଘାଟ ଥାନା ପୋଲିସ: ଗିରଫ ହେଲେ ଦମ୍ପତି
କଟକ, (ଓ୍ବାଇଏନଏସ): ସୋସିଆଲ ମିଡିଆରେ ପରିଚୟ ତାପରେ ମିଠା ମିଠା କହି ହନିଟ୍ରାପ୍ କରି କଟକ ଦୋଳମୁଣ୍ଡେଇର ସାଗର ଶ୍ରୀ ହୋଟେଲକୁ ଜଣେ ଠିକାଦାରଙ୍କୁ ଇତିଶ୍ରୀ ଦାସ ନାମକ ଜଣେ ମହିଳା ଡକାଇ ଥିଲେ । ଏହା ପରେ କିଛି ମଧୁର ମୁହୂର୍ତ୍ତ କଟାଇବା ପାଇଁ କହି ମୃଦ୍ୟୁ ପାନୀୟରେ ନିଶା ସେବନ କରାଇ ଟଙ୍କା ସୁନା ସବୁ କିଛି ଲୁଟି ଫେରାର ହୋଇ ଯାଇଥିଲେ। ଏହି ଘଟଣାର ତଦନ୍ତ କରି ପୁରୀଘାଟ ଥାନା ପୋଲିସ ଇତିଶ୍ରୀ ଓ ତାଙ୍କ ସ୍ଵାମୀ ମହେଶଙ୍କ ସମେତ ସୁନା କିଣିଥିବା ଜଣେ ବ୍ୟକ୍ତିଙ୍କୁ ଗିରଫ କରିଛି। ସୂଚନା ଅନୁଯାୟୀ, ଗତ ଜାନୁଆରୀ ୧୦ ତାରିଖରେ ପ୍ରିୟଭୂଷଣ ନନ୍ଦଙ୍କ ଭାଈ ବିନ୍ଦୁ ଭୂଷଣ ନନ୍ଦଙ୍କୁ ଅଭିଯୁକ୍ତ ମହିଳା ଇତିଶ୍ରୀ ଦାସ ସାଗର ଶ୍ରୀ ହୋଟେଲକୁ ଆସିବାକୁ ପ୍ରବର୍ତ୍ତାଇଥିଲେ। ସେମାନେ ଉଭୟ ପ୍ରାୟ ସନ୍ଧ୍ୟା ୬:୩୦ ପର୍ଯ୍ୟନ୍ତ ହୋଟେଲରେ ରହିଥିଲେ। ସେମାନଙ୍କ ରହଣି ସମୟରେ, ଅଭିଯୁକ୍ତ ଇତିଶ୍ରୀ ଥଣ୍ଡା ପାନୀୟରେ କିଛି ମୂର୍ଚ୍ଛିତ ପଦାର୍ଥ ମିଶାଇ ପୀଡିତଙ୍କୁ ଦେଇଥିଲେ। ପୀଡିତ ଅଚେତ ହେବା ପରେ, ଅଭିଯୁକ୍ତ ପରିସ୍ଥିତିର ସୁଯୋଗ ନେଇ ତାଙ୍କୁ ଲୁଟ କରିଥିଲେ। ସେ ପ୍ରାୟ ୨୦୦ ଗ୍ରାମ ଓଜନର ସୁନା ଅଳଙ୍କାର, ୧,୦୦,୦୦୦ ଟଙ୍କା ନଗଦ ଏବଂ ଫୋନ୍ ପେ ମାଧ୍ୟମରେ ତାଙ୍କ ଆକାଉଣ୍ଟରୁ ୮୦,୦୦୦ ଟଙ୍କା ସ୍ଥାନାନ୍ତର କରି ନେଇଥିଲେ। ଏହା ପରେ, ସେ ଘଟଣାସ୍ଥଳରୁ ଫେରାର ହୋଇ ଯାଇଥିଲେ। ପରେ ପୀଡିତ ଶ୍ରୀ ନନ୍ଦଙ୍କ ଚେତା ଫେରିବା ପରେ ତାଙ୍କ ବଡ଼ ଭାଈଙ୍କୁ ଏ ସମ୍ପର୍କରେ ଜଣାଇଥିଲେ। ପରେ ତାଙ୍କର ବଡ଼ ଭାଈ ପ୍ରିୟ ଭୂଷଣ ନନ୍ଦ ଏ ସଂକ୍ରାନ୍ତରେ ପୁରୀଘାଟ ଥାନାରେ ଏକ ଲିଖିତ ଅଭିଯୋଗ କରିଥିଲେ। ଏହି ଲିଖିତ ଅଭିଯୋଗକୁ ଆଧାର କରି ପୁରୀଘାଟ ଥାନା ପୋଲିସ ଏକ ମାମଲା ରୁଜୁ କରିବା ସହ ତାର ତଦନ୍ତ ଚଳାଇଥିଲା। ତଦନ୍ତ ସମୟରେ, ପ୍ରାସଙ୍ଗିକ ସାକ୍ଷୀଙ୍କ ବୟାନ ରେକର୍ଡ କରାଯାଇଥିଲା ଏବଂ ହୋଟେଲ ସାଗର ଶ୍ରୀ ସହିତ ସଂଲଗ୍ନ ଦୋକାନ ଏବଂ ନିକଟବର୍ତ୍ତୀ ସ୍ଥାନଗୁଡ଼ିକର ସିସିଟିଭି ଫୁଟେଜ୍ ସଂଗ୍ରହ କରି ଯାଞ୍ଚ ଏବଂ ସୂକ୍ଷ୍ମ ବିଶ୍ଳେଷଣ କରାଯାଇଥିଲା। ଫୁଟେଜ୍ ରେ ଅଭିଯୁକ୍ତଙ୍କ ଗତିବିଧିକୁ ପ୍ରମାଣିତ କରିଥିଲା ଏବଂ ଅପରାଧରେ ସେମାନଙ୍କର ସମ୍ପୃକ୍ତିକୁ ପ୍ରମାଣିତ କରିଥିଲା। ବିଶ୍ୱସ୍ତ ଗୁଇନ୍ଦା ବିଭାଗର ସୂଚନା ଏବଂ ନିରନ୍ତର ଅନୁସରଣ ଆଧାରରେ, ପୁରୀଘାଟ ଥାନାର ଏକ ପୋଲିସ ଦଳ ସମନ୍ୱିତ ଅପରେସନ୍ ଆରମ୍ଭ କରିଥିଲା। ଯାହା ଫଳରେ ଏହି ସମ୍ବେଦନଶୀଳ ମାମଲାର ସଫଳ ଚିହ୍ନଟ ହୋଇପାରିଥିଲା। ଫଳସ୍ୱରୂପ, ମୁଖ୍ୟ ଅଭିଯୁକ୍ତ ମହିଳା ସମେତ ଦୁଇ ଜଣ ଅଭିଯୁକ୍ତଙ୍କୁ ଗିରଫ କରାଯାଇଥିଲା। ଅଭିଯୁକ୍ତ ମାନେ ହେଲେ ଇତିଶ୍ରୀ ସାହୁ (୩୦), ମହେଶ କୁମାର ଦାସ (୩୯), ନରେନ୍ଦ୍ର ମହାରଣା (୪୮)। ସେମାନଙ୍କ ନିକଟରୁ ଏକ ଓଲା ଇଲେକ୍ଟ୍ରିକ୍ ସ୍କୁଟି (OD 05 BS 5394), ୨ ଟି ହାତ ଘଣ୍ଟା, ୩ ଟି ମୋବାଇଲ୍ ଫୋନ୍, ଏକ ରୟାଲ୍ ଏନଫିଲ୍ଡ ବୁଲେଟ୍ (OD 05 BL 9386), ପାଞ୍ଚଟି ସୁନା ଚେନ୍ ସହିତ ଗୋଟିଏ ସୁନା ମୁଦି ଯାହାର ମୋଟ ଓଜନ ୧୫୧.୨୪ ଗ୍ରାମ, ନଗଦ ୫୩,୫୦୦ ଟଙ୍କା, ATM କାର୍ଡ, ADHAR କାର୍ଡ, ଇତ୍ୟାଦି ଜବତ କରାଯାଇଛି। ଗିରଫ ହୋଇଥିବା ଅଭିଯୁକ୍ତମାନଙ୍କୁ ପୁରୀଘାଟ ପୋଲିସ ଆଜି କୋର୍ଟ ଚାଲାଣ କରିବା ସହ ମାମଲାର ଅଧିକ ତଦନ୍ତ ଜାରି ରଖିଛି।
