କୈବଲ୍ୟପୁର ଦଣ୍ଡଦଳର ଢୋଲ ବାଦ୍ୟରେ ଦୁଲୁକିଲା ଗୋଲାସାହି
ଆସିକା (ୱାଇଏନ୍ଏସ୍): ଆସିକା ଏନ୍ଏସି ପରିସରଭୁକ୍ତ ୬ନଂ ୱାର୍ଡର ଗୋଲା ସାହି ରବିବାର ଶ୍ରୀ ଶ୍ରୀ ଚନ୍ଦ୍ରକଳ୍ପେଶ୍ୱର ମା ଦକ୍ଷିଣକାଳୀ କୈବଲ୍ୟପୁର ଦଣ୍ଡଦଳର ଦଣ୍ଡନୃତ୍ୟ ପରିବେଷଣ ଏକ ଆଧ୍ୟାତ୍ମିକ ପରିବେଶ ମଧ୍ୟରେ ଅନୁଷ୍ଠିତ ହୋଇଯାଇଛି । ଗୋଲାସାହି ସ୍ଥିତ ପୂଜାମହଲ ଯୁବକ ସଂଘ ଓ ଆଧ୍ୟାତ୍ମିକ ପ୍ରେମୀ ଶନିବାର ପୂର୍ବାହ୍ନରେ କୈବଲ୍ୟପୁର ଦଣ୍ଡଦଳକୁ ବିଧିବିଧାନ ଅନୁଯାୟୀ ଆମନ୍ତ୍ରଣ କରିଥିଲେ । ପୂର୍ବାହ୍ନରେ କୈବଲ୍ୟପୁର ଦଣ୍ଡଦଳର ଦଣ୍ଡୁଆମାନେ ଗୋଲା ସାହିରେ ପହଞ୍ଚି ଦଣ୍ଡନୃତ୍ୟ ପାଳନର ରୀତିନୀତି ଉପରେ ଢୋଲ ବାଦ୍ୟର ତାଳେ ତାଳେ ଗୀତ ମାଧ୍ୟମରେ ଅବଗତ କରିବା ପରେ ପ୍ରଚଣ୍ଡ ଖରାରେ ଦଣ୍ଡୁଆମାନେ ଧୁଳିଦଣ୍ଡ କାର୍ଯ୍ୟକ୍ରମରେ ସାମିଲ ହୋଇଥିଲେ । ଅପରାହ୍ନରେ ଋଷିକୂଲ୍ୟା ନଦୀରେ ମାନସିକଧାରୀ ଦଣ୍ଡୁଆ ମାନେ ପାଣିଦଣ୍ଡ ସଂପନ୍ନ କରିବା ପରେ ବିଳମ୍ବିତ ରାତ୍ରରେ ଅଗ୍ନିଦଣ୍ଡ ପରିବେଷଣ ହୋଇଥିଲା। ତ୍ରିବିଧେଶ୍ୱର ଶୈବପୀଠ ପରିସରରେ କୈବଲ୍ୟପୁର ଦଣ୍ଡଦଳର ସାଂନ୍ଧ୍ୟ ଆଳତୀ ସମୟରେ ଦେବଦେବ ମହାଦେବ ଓ ମହାମାୟୀ ମା’ କାଳୀଙ୍କୁ ପୂଜାର୍ଚ୍ଚନା କରିବା ଲାଗି ଶ୍ରଦ୍ଧାଳୁ ଭକ୍ତଙ୍କ ଭିଡ ଜମିଥିଲା । କୈବଲ୍ୟପୁର ଦଣ୍ଡଦଳର ମାନସିକଧାରୀ ଦଣ୍ଡୁଆ ଓ ଶ୍ରଦ୍ଧାଳୁ ଭକ୍ତମାନେ ମା’ ଦଣ୍ଡକାଳୀଙ୍କୁ ଦର୍ଶନ କରି ବିଭୋର ହୋଇପଡିଥିଲେ। ରାତ୍ରରେ ପୌରାଣିକ ନାଟକ ଭାରତଲୀଳା ମଞ୍ଚସ୍ଥ ହୋଇଥିଲା। କୈବଲ୍ୟପୁର ଦଣ୍ଡଦଳରେ ମାନସିକଧାରୀ ଦଣ୍ଡଭୁକ୍ତାମାନେ ପାରମ୍ପରିକ ବସ୍ତ୍ର ପିନ୍ଧି ମୟୁର ପିଞ୍ଛ, ପତକା ଧରି ଗିନି ଓ ଢୋଲର ତାଳେ ତାଳେ ଖଟୁଳୀରେ ଶିବ, ପାର୍ବତୀ ଓ ଦଣ୍ଡକାଳୀଙ୍କୁ ଧରି କଳାରୁଦ୍ରମଣିକୁ ଭଜ ହେ ନିନାଦରେ ଗୋଲା ସାହି ପରିକ୍ରମା କରିଥିଲେ। ସ୍ଥାନୀୟ ଅଞ୍ଚଳର ବାସିନ୍ଦାମାନେ ନିଜନିଜ ଘର ସମ୍ମୁଖରେ ଗୋବର ଲିପି, ଝୋଟି ଆଙ୍କି ପୂର୍ଣ୍ଣ କୁମ୍ଭ ସହ ଦୀପ ଓ ଭୋଗ ବାଢି ଠାକୁରଙ୍କ ଆଶିଷ ପାଇଁ ରାସ୍ତାରେ ଦଣ୍ଡାୟମାନ ହୋଇ ଆଶିର୍ବାଦ ଭିକ୍ଷା କରିଥିବା ଦେଖିବାକୁ ମିଳିଥିଲା । ଗୋଲା ସାହିର ଅଧ୍ୟାତ୍ମିକ ପ୍ରେମୀ ଜିତେନ୍ଦ୍ର କୁମାର ମହାରଣାଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଶ୍ରଦ୍ଧାଳୁ ଭକ୍ତ ଶିଶିର ମହାପାତ୍ର, ସତିଶ୍ ଆଚାରୀ, କାହ୍ନା ଆଚାରୀ, ସାଗର ମହାରଣା, ସାନ୍ମୁଖ୍ ଆଚାରୀ, ସାଗର ମହାପାତ୍ର, ଶ୍ରୀକାନ୍ତ ଆଚାରୀ, କେ.ରବିନ୍ ପାତ୍ର, ବୁଢା ଆଚାରୀ, ମଣିକାନ୍ତା ଆଚାରୀ, ପପୁ ମହାନ୍ତି, ତାରିଣୀ ଆଚାରୀ, କେ.ରବି ଆଚାରୀ, ଶିଶିର ମହାରଣା, ସନ୍ତୋଷ ମହାରଣା, ରାଜ୍ ଆଚାରୀ, ପ୍ରଦୀପ ଆଚାରୀଙ୍କ ସମେତ ସ୍ଥାନୀୟ ଅଞ୍ଚଳବାସୀ ଏହି ଦଣ୍ଡଯାତ୍ରାକୁ ସୁପରିଚାଳନା କରିବା ଦିଗରେ ସକ୍ରିୟ ସହଯୋଗ କରିଥିବା ଲକ୍ଷ୍ୟ କରାଯାଇଥିଲା।
