ମଉଳା ଭଣଜା ମନ୍ଦିରର ହୁଣ୍ଡି ବାକ୍ସ ଭାଙ୍ଗି ଲୁଟି ନେଲେ ଦୁର୍ବୃତ

ନାଉଗାଁ,(ଓ୍ବାଇଏନଏସ): ଜଗତସିଂହପୁର ଜିଲ୍ଲା ନାଉଗାଁ ଥାନା ଅନ୍ତର୍ଗତ ଗଙ୍ଗଦାସ୍ଥିତ ଶ୍ରୀ ଶ୍ରୀ ମଉଳା ଭଣଜା ଶୈବ ମନ୍ଦିରରୁ କେହି ଦୁର୍ବୃତ ମଙ୍ଗଳବାର ରାତିରେ ତିନୋଟି ହୁଣ୍ଡି ବାକ୍ସ ଭାଙ୍ଗି ସମସ୍ତ ଟଙ୍କା ଓଷ୍ଟୋର ଘରୁ ଆସବାବ ପତ୍ର ଚୋରି କରି ନେଇ ଯାଇଥିବା ନେଇ ଶ୍ରୀ ସିଦ୍ଧେଶ୍ୱର ବୁଦ୍ଧେଶ୍ୱର ଚାରିଟେବୁଲ ଟ୍ରଷ୍ଟର ମୁଖ୍ୟ ଟ୍ରଷ୍ଟି ବୈରାଗୀ ଚରଣ ସ୍ୱାଇଁ ଲିଖିତ ଅଭିଯୋଗ କରିଛନ୍ତି। ଅଭିଯୋଗକୁ ଭିତିକରି ଗାରୋଇ ଫାଣ୍ଡି ଅଧିକାରୀ ଘଟଣାସ୍ଥଳରେ ପହଁଚି ପ୍ରାଥମିକ ତଦନ୍ତ କରି ଫେରିଥିବା ଜଣାଯାଇଛି। ଅଭିଯୋଗ ମୁତାବକ ମନ୍ଦିରର ପୂଜକ ଶୁକଦେବ ପଣ୍ଡାଙ୍କ ସମେତ ଅନେକ ଶ୍ରଦ୍ଧାଳୁ ବୁଧବାର ସକାଳୁ ଠାକୁରଙ୍କ ଦର୍ଶନ ପାଇଁ ମନ୍ଦିର ଆସିଥିଲେ। ମନ୍ଦିର ପରିସରରେ ଦେଖିଲା ବେଳକୁ ରାତିରୁ କେହି ହୁଣ୍ଡି ବାକ୍ସକୁ ଭାଙ୍ଗି ନେଇ ଅନ୍ୟତ୍ର ସ୍ଥାନାନ୍ତରିତ କରି ଦେଇଛି। ହୁଣ୍ଡିରେ ଥିବା ସମସ୍ତ ଟଙ୍କା ଚୋରି କରି ନେଇଛନ୍ତି। କିନ୍ତୁ ସେମାନେ ହୁଣ୍ଡି ଭାଙ୍ଗିବା ପାଇଁ ଆଣିଥିବା ଗୋଟିଏ କୋଦାଳ ଓ ଗୋଟିଏ ଶାବଳ ମନ୍ଦିର ପରିସରରେ ଛାଡି ଯାଇଛନ୍ତି। ଏସଂର୍ପକରେ ନାଉଗାଁ ଥାନାଧିକାରୀ ପ୍ରଦିପ୍ତ କାନୁନଗୋଙ୍କୁ ପଚାରିବାରୁ ଅଭିଯୋଗକୁ ଭିତିକରି ତଦନ୍ତ ଚାଲୁଥିବା କହିଛନ୍ତି।