ଆଦିବାସୀ ସାହିରେ ନାହିଁ ଅଙ୍ଗନବାଡ଼ି, କୁନି କୁନି ଶିଶୁ ଓ ଗର୍ଭବତୀ ମାଆମାନେ ଭଗୁଛନ୍ତି ଦୁର୍ଦ୍ଦଶା

ବେତନଟୀ ( ଉଦିତ କୁମାର ପରିଡା ): ଭାରତ ସରକାର ଓ ଓଡ଼ିଶା ସରକାର ଆଦିବାସୀ ଅଧ୍ୟୁଷିତ ଅଞ୍ଚଳରେ ଶିକ୍ଷା, ସ୍ୱାସ୍ଥ୍ୟ ଓ ପୁଷ୍ଟିକର ଖାଦ୍ୟ ଯୋଗାଣ ପାଇଁ ବିଶେଷ ପ୍ରାଧାନ୍ୟ ଦେଉଥିବା ଦାବି କରୁଥିବା ବେଳେ, ମୟୂରଭଞ୍ଜ ଜିଲ୍ଲାର ବେତନଟୀ ବ୍ଲକ ଅନ୍ତର୍ଗତ ବେତନଟୀ ଗ୍ରାମ ପଞ୍ଚାୟତର ବେତନଟୀ ଆଦିବାସୀ ସାହିରେ ଏକ ଦୁଃଖଦ ଚିତ୍ର ଦେଖିବାକୁ ମିଳୁଛି। ଏହି ସାହିରେ ଅଙ୍ଗନବାଡ଼ି କେନ୍ଦ୍ର, ଯାହା ଶିଶୁମାନଙ୍କ ପ୍ରାରମ୍ଭିକ ଶିକ୍ଷା, ଶିଶୁ ଓ ଗର୍ଭବତୀ ମାଆମାନଙ୍କ ପାଇଁ ସ୍ୱାସ୍ଥ୍ୟ ସେବା ଓ ପୁଷ୍ଟିକର ଖାଦ୍ୟ ଯୋଗାଇବାର ଦାୟିତ୍ୱ ତୁଲାଇଥାଏ, ତାହା ଦୀର୍ଘ ବର୍ଷ ଧରି ଅଙ୍ଗନବାଡ଼ି ଶିକ୍ଷୟିତ୍ରୀଙ୍କ ଘରେ ଚାଲୁଛି। ଏହି ଘର ଗାଁରୁ ପ୍ରାୟ ୧ କିଲୋମିଟର ଦୂରରେ ଅବସ୍ଥିତ, ଯାହା ଫଳରେ ଶିଶୁ, ଗର୍ଭବତୀ ମାଆମାନେ ଓ ଅଭିଭାବକମାନେ ନାହିଁନଥିବା ଅସୁବିଧାର ସମ୍ମୁଖୀନ ହେଉଛନ୍ତି। ସ୍ଥାନୀୟ ବାସିନ୍ଦା ଠାକୁରା ହାଁସଦାଙ୍କ ଅଭିଯୋଗ ଅନୁସାରେ, ସେ ଏହି ସମସ୍ୟା ନେଇ ସେ ବାରମ୍ବାର ବିଭାଗୀୟ ଅଧିକାରୀଙ୍କୁ ଅବଗତ କରିଥିଲେ, କିନ୍ତୁ କୌଣସି ସୁଫଳ ମିଳିନାହିଁ। “ଆମ ଗାଁରେ ଅଙ୍ଗନବାଡ଼ି କେନ୍ଦ୍ର ନଥିବାରୁ ପିଲାମାନେ ଓ ଗର୍ଭବତୀ ମାଆମାନେ ୧ କିଲୋମିଟର ଯାତାୟାତ କରିବାକୁ ବାଧ୍ୟ ହେଉଛନ୍ତି। ଏହା ଶିଶୁମାନଙ୍କ ଶିକ୍ଷା ଓ ଗର୍ଭବତୀ ମାଆମାନଙ୍କ ସ୍ୱାସ୍ଥ୍ୟ ସେବାରେ ବଡ଼ ବାଧା ସୃଷ୍ଟି କରୁଛି। ଗର୍ଭବତୀ ମାଆମାନଙ୍କୁ ପୁଷ୍ଟିକର ଖାଦ୍ୟ ଓ ନିୟମିତ ସ୍ୱାସ୍ଥ୍ୟ ପରୀକ୍ଷା ପାଇଁ ଏତେ ଦୂର ଯିବା ଅତ୍ୟନ୍ତ କଷ୍ଟଦାୟକ,” ବୋଲି ଶ୍ରୀ ହାଁସଦା କ୍ଷୋଭ ପ୍ରକାଶ କରିଛନ୍ତି। ଏହି ବେତନଟୀ ଆଦିବାସୀ ସାହିର ଅଧିବାସୀମାନେ, ବିଶେଷକରି ଗର୍ଭବତୀ ମାଆମାନେ, ଅଙ୍ଗନବାଡ଼ିର ମୌଳିକ ସୁବିଧା ଯଥା ପୁଷ୍ଟିକର ଖାଦ୍ୟ, ସ୍ୱାସ୍ଥ୍ୟ ପରୀକ୍ଷା ଓ ପରାମର୍ଶ ସେବାରୁ ବଞ୍ଚିତ ହେଉଛନ୍ତି। ଏହା ସରକାରୀ ଯୋଜନାର ଉଦ୍ଦେଶ୍ୟକୁ ବିଫଳ କରୁଛି ଏବଂ ଆଦିବାସୀ ସମୁଦାୟର ସ୍ୱାସ୍ଥ୍ୟ ଓ ଶିକ୍ଷା ବିକାଶରେ ବାଧା ସୃଷ୍ଟି କରୁଛି। ସ୍ଥାନୀୟ ଲୋକେ ଗାଁ ମଧ୍ୟରେ ଏକ ସ୍ୱତନ୍ତ୍ର ଅଙ୍ଗନବାଡ଼ି କେନ୍ଦ୍ର ସ୍ଥାପନ କରିବା ପାଇଁ ଦାବି କରିଛନ୍ତି, ଯାହା ଶିଶୁ ଓ ଗର୍ଭବତୀ ମାଆମାନଙ୍କ ପାଇଁ ସୁବିଧାଜନକ ହେବ। ସୁଚନା ଅନୁସାରେ ବିଭାଗୀୟ ଅଧିକାରୀଙ୍କୁ ଦାବି ଜଣାଇଛନ୍ତି ଜେ ବେତନଟୀ ଆଦିବାସୀ ସାହିରେ ଅଙ୍ଗନବାଡ଼ି ସୁବିଧାର ଅଭାବ ଏକ ଗମ୍ଭୀର ସମସ୍ୟା, ଯାହା ଶିଶୁମାନଙ୍କ ଶିକ୍ଷା ଓ ଗର୍ଭବତୀ ମାଆମାନଙ୍କ ସ୍ୱାସ୍ଥ୍ୟ ସେବାକୁ ପ୍ରଭାବିତ କରୁଛି। ଏହା ଆଦିବାସୀ ସମୁଦାୟର ବିକାଶକୁ ଅବରୋଦ୍ଧ କରୁଛି ଏବଂ ସରକାରୀ ଯୋଜନାର ବିଶ୍ୱାସଯୋଗ୍ୟତା ଉପରେ ପ୍ରଶ୍ନ ଉଠାଉଛି। ବିଭାଗୀୟ ଅଧିକାରୀମାନେ ଏହି ସମସ୍ୟାକୁ ଅଗ୍ରାଧିକାର ଦେଇ ଗାଁ ମଧ୍ୟରେ ଏକ ସ୍ୱତନ୍ତ୍ର ଅଙ୍ଗନବାଡ଼ି କେନ୍ଦ୍ର ସ୍ଥାପନ କରିବା ପାଇଁ ତୁରନ୍ତ ପଦକ୍ଷେପ ଗ୍ରହଣ କରନ୍ତୁ। ଏଥିରେ ଅବହେଳା କଲେ ସ୍ଥାନୀୟ ଆଦିବାସୀ ସମୁଦାୟର ଅସନ୍ତୋଷ ବଢ଼ିବା ସହ ଶିଶୁ ଓ ଗର୍ଭବତୀ ମାଆମାନଙ୍କ ସୁରକ୍ଷା ଓ ସ୍ୱାସ୍ଥ୍ୟ ଉପରେ ଗମ୍ଭୀର ପ୍ରଭାବ ପଡ଼ିବ। ଏହି ଗୁରୁତର ସମସ୍ୟାର ତୁରନ୍ତ ସମାଧାନ ପାଇଁ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ବୋଲି ସ୍ଥାନୀୟ ବାସିନ୍ଦା ଦାବି କରିଛନ୍ତି।