ତ୍ରିଶକ୍ତି ୟୁଥ୍ କ୍ଲବ ପକ୍ଷରୁ ରାସ ପୂର୍ଣ୍ଣିମା ଉତ୍ସବ ପାଳିତ
ବନ୍ତ,(ଚାନ୍ଦିନୀ ମହାନ୍ତି) : ବନ୍ତ ବ୍ଲକ ଆଡିଆ ପଞ୍ଚାୟତ ତ୍ରିଶକ୍ତି ୟୁଥ୍ କ୍ଲବ୍ ଆନୁକୂଲ୍ୟରେ ୧୮ତମ ରାସ ପୂର୍ଣ୍ଣିମା ଉତ୍ସବ ମହାସମାରୋହରେ ପାଳିତ ହେଉଛି । ଏହି ଉତ୍ସବ ଓଲଡାଙ୍ଗ, ବାଲିଆ ଓ ପନ୍ଦାଡୋ ଗ୍ରାମର ମିଳିତ ସହଯୋଗରେ ଅନୁଷ୍ଠିତ ହେଉଛି । ଏହା ୫ ଦିନ ଚାଲିବ । ପୂର୍ଣ୍ଣିମା ଦିନ ଗ୍ରାମ୍ୟ ପୁଷ୍କରଣୀରେ ବୋଇତ ବନ୍ଦାଣ କରାଯିବା ସହ ମଣ୍ଡପରେ ରାଧାକୃଷ୍ଣଙ୍କ ମୃଣ୍ମୟ ମୂର୍ତ୍ତିକୁ ପୂଜାର୍ଚ୍ଚନା କରାଯାଇଥିଲା । ଦର୍ଶକ ମାନଙ୍କୁ ଆକୃଷ୍ଟ କରିବା ପାଇଁ ପାଶ୍ୱର୍ ବାରୁଆଳୀ ମୂର୍ତ୍ତି, ସୁଉଚ୍ଚ ତୋରଣ ନିର୍ମାଣ ସହ ମଣ୍ଡପ ସ୍ଥାନକୁ ବିଭିନ୍ନ ଆଲୋକମାଳାରେ ସଜା ଯାଇଛି । ପ୍ରତ୍ୟେହ ସନ୍ଧ୍ୟାରେ ସଭା, ପ୍ରତିଭା ସମ୍ମାନ ଓ ସାଂସ୍କୃତିକ କାର୍ଯ୍ୟକ୍ରମ ଆଦି ଅନୁଷ୍ଠିତ ହେଉଛି । ଗୁରୁବାର ସନ୍ଧ୍ୟାରେ ଆୟୋଜିତ ସଭାକୁ କ୍ଲବ୍ ସଭାପତି ବିକାଶ ସାହୁ ଅଧ୍ୟକ୍ଷତା କରିଥିଲେ । ଏଥିରେ ମୁଖ୍ୟ ଅତିଥି ଭାବେ ଭଣ୍ଡାରିପୋଖରୀ ବିଧାନସଭା ବିଜେପି ନେତା ଡ.ସୁଧାଂଶୁ ଶେଖର ନାୟକ ଯୋଗ ଦେଇ ଓଡିଆ ସାଧବ ପୁଅଙ୍କ ସାହସିକତା ଓ ପୂର୍ବ ଐତିହ୍ୟକୁ ମନେ ପକେଇବାର ଅବସର ମିଳିଥାଏ ବୋଲି କହିଥିଲେ । ଏଥିରେ ଆଇନଜୀବି ମାଧବାନନ୍ଦ ଦାସ, ସମାଜସେବୀ ମହେନ୍ଦ୍ର ଦାସ ପ୍ରମୁଖ ଅତିଥି ଭାବେ ଯୋଗ ଦେଇଥିଲେ । ସାଇ ସ୍ୱରୂପ ଦାଶ ଧନ୍ୟବାଦ ଅର୍ପଣ କରିଥିଲେ । କାର୍ଯ୍ୟକ୍ରମରେ କ୍ଲବର ନିହାର ରଞ୍ଜନ ସାହୁ, ପ୍ରିୟବ୍ରତ ପଣ୍ଡା, ଦେବାଶିଷ ସାହୁ, ସୁଧାଂଶୁ ଭୂୟାଁ, ରଞ୍ଜନ ଜେନା, ଆଶିଷ୍ ଦାଶ, ପ୍ରଦୀପ ପଣ୍ଡା, ତାପସ ବାରିକ୍, ନିତ୍ୟାନନ୍ଦ ସାହୁ, ବିଜୟ ଜେନା ପ୍ରମୁଖ ସହଯୋଗ କରିଥିଲେ । ଶେଷରେ ଯାଜପୁୁରର ଡଲଫିନ୍ ନୃତ୍ୟ ଦଳ ପକ୍ଷରୁ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯାଇଥିଲା ।


