ଚୋରି ସନ୍ଦେହରେ ଦୁଇ ଯୁବକଙ୍କୁ ଖୁଣ୍ଟରେ ବାନ୍ଧି ନିର୍ଧୁମ ମାଡ଼

ହାଟଡିହି (ଓ୍ବାଇଏନଏସ): ଚୋରି ସନ୍ଦେହରେ ଦୁଇ ଯୁବକଙ୍କୁ ଖୁଣ୍ଟରେ ବାନ୍ଧି ନିର୍ଧୁମ ଛେଚିଲେ ମିଠିଗାଁ ଗ୍ରାମବାସୀ। ଏଥିରେ ଜଣେ  ରିଜର୍ଭ ପୋଲିସ କର୍ମଚାରୀ ଥିବା ବେଳେ ଏହାର ଭିଡିଓ ଭାଇରଲ ହେବା ପରେ ଘଟଣାଟି ସମଗ୍ର ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି। ଖବରରୁ ଜଣା ଯାଇଛି ଯେ ସୋସୋ ଥାନା ଅଧୀନ ମିଠିଗାଁ ଗ୍ରାମରେ ଗତ ରବିବାର ବିଳମ୍ବିତ ରାତିରେ ଦୁଇଜଣ ଅପରିଚିତ ଯୁବକ ଗାଁ ଭିତରେ ବୁଲୁଥିବା ବେଳେ ଗାଁ ଲୋକେ ସେମାନଙ୍କୁ ଅଟକାଇ ଥିଲେ। ମାତ୍ର ସେମାନଙ୍କ କଥାରେ କୌଣସି ତାଳ ମେଳ ନାରହିବାରୁ ଗ୍ରାମବାସୀଙ୍କ ସନ୍ଦେହ ଉପୁଜିଥିଲା। ଗତ କିଛିଦିନ ହେଲା ଆଖପାଖ ଅଞ୍ଚଳରେ ଚୋରଙ୍କ ପ୍ରାଦୁର୍ଭାବ ବୃଦ୍ଧିପାଉଥିବାରୁ ଏମାନେ ଚୋରି ଉଦେଶ୍ୟରେ ଆସିଥିବା ସନ୍ଦେହ କରି ଗାଁ ଲୋକେ ସେମାନଙ୍କୁ ଏକ ଖୁଣ୍ଟରେ ବାନ୍ଧି ପକାଇ ନିର୍ଧୁମ ପିଟିଥିଲେ। ପରେ ଯୁବକ ଦ୍ବୟ ଆଗରପଡା ଥାନା ଅଧୀନସ୍ଥ ଚାରିଗାଁ ଗ୍ରାମର ବୋଲି ଜଣା ପଡିଥିଲା। ଇନଷ୍ଟାଗ୍ରାମରୁ ପରିଚିତ ଜଣେ ଯୁବତୀଙ୍କୁ ଭେଟିବାକୁ ଆସିଥିବା ଜଣେ ଯୁବକ ଫେରିବାରେ ବିଳମ୍ବ ହେବାରୁ ଉକ୍ତ ଯୁବକ ଦ୍ବୟ ତାଙ୍କୁ ଖୋଜିବାକୁ ଆସିଥିବା କହିଥିଲେ। ପରେ ଯୁବକ ଦ୍ବୟଙ୍କୁ ଗ୍ରାମବାସୀ ମାନେ ଛାଡିଥିବା ଜଣାଯାଇଛି।