ସରକାରୀ ଜମି ଜବରଦଖଲକୁ ନେଇ ଉତ୍ତେଜନା

ଦିଗପହଣ୍ଡି,(ଅଳକ ନାଥ ମିଶ୍ର) : ଦିଗପହଣ୍ଡି ବ୍ଲକ ଆଙ୍କୋରଡ଼ା ଗ୍ରାମ ର ଏକାଧିକ ଏକର ସରକାରୀ ଜମି ଜବରଦଖଲ କୁ କେନ୍ଦ୍ରକରି ଗତ ଦୁଇଦିନ ହେଲା ଗାଁ ରେ ଚାପା ଉତ୍ତେଜନା ଲାଗିରହିଛି।ବ୍ରହ୍ମପୁର ଏବଂ ଦିଗପହଣ୍ଡି ର ଦୁଇଜଣ ପ୍ରଭାବଶାଳୀ ବ୍ୟକ୍ତି ଆଙ୍କୋରଡ଼ା ମୌଜା ର ପ୍ରାୟ ୭୭ ଏକର ଅନାବାଦୀ ଗୋଚର କିସମର ସରକାରୀ ଜମି କୁ ଜବରଦଖଲ କରିଥିବା ଗ୍ରାମବାସୀ ଅଭିଯୋଗ କରିଛନ୍ତି। ଗତ ୨୦୨୦ ମାର୍ଚ୍ଚ ୨ ତାରିଖରେ ଗ୍ରାମବାସୀ ଙ୍କ ପ୍ରଚେଷ୍ଟା ରେ ପ୍ରାୟ ୩ ଏକର ଜମିରେ ଶ୍ରୀ ସ୍ଵପ୍ନେଶ୍ୱର ମହାଦେବ ମନ୍ଦିର ପ୍ରତିଷ୍ଠା କରାଯାଇଥିଲା। ପରବର୍ତ୍ତୀ ସମୟରେ ସେଠାରେ ପାର୍କ,ସରକାରୀ ଉପ ସ୍ୱାସ୍ଥ୍ୟକେନ୍ଦ୍ର ଓ ମିଶନ ଶକ୍ତି କୋଠା ନିର୍ମାଣ କରାଯାଇଥିଲା। ମନ୍ଦିର ପ୍ରତିଷ୍ଠା ମହୋତ୍ସବ ସମୟରେ ରାମ ଦୋଳି ପକାଇବା ପାଇଁ ମନ୍ଦିର ନିକଟରେ ଥିବା ଜଣେ ବ୍ୟକ୍ତିଙ୍କ ଅନୁମତି ନିଆଯାଇ ତାଙ୍କ ଜମି ହିଡ଼ କୁ ସମତୁଲ କରାଯାଇଥିଲା।ପରବର୍ତ୍ତୀ ସମୟରେ ଉକ୍ତ ବ୍ୟକ୍ତି ସରକାରୀ ଜମି ଜବରଦଖଲ କରି ପିଲର ପୋତିବା ସହ ପ୍ରାୟ ୪ ଶହ ଏକର ଜମିକୁ ଜଳସେଚନ ପାଇଁ ପାଣି ଯୋଗାଉଥିବା କ୍ଷୁଦ୍ର ଜଳସେଚନ ବିଭାଗ ର ବଡ଼ବନ୍ଧ ସାଗର ର ରାସ୍ତା ଓ ପାର୍ଶ୍ଵ ରେ ଥିବା ସରକାରୀ ଜମି କୁ ବେଆଇନ ଭାବେ ଜବରଦଖଲ କରି ପିଲର ପୋତି ଥିଲେ।ଫଳରେ ବଡ଼ବନ୍ଧ କୁ ଲୋକେ ଯା ଆସ କରୁଥିବା ରାସ୍ତାଟି ସଂକୀର୍ଣ୍ଣ ହୋଇଯାଇଥିଲା।ଏନେଇ ଗ୍ରାମରେ ସଭା କରାଯାଇ ଉକ୍ତ ପିଲର ଗୁଡ଼ିକୁ ଓପାଡ଼ି ଫିଙ୍ଗି ଦିଆଯାଇଥିଲା।ଉକ୍ତ ବ୍ୟକ୍ତି ଜଣକ ଏନେଇ ଗ୍ରାମର ମୁଖିଆ ତଥା ପୂର୍ବତନ ସରପଞ୍ଚ ନିରାକାର ପ୍ରଧାନ, ତାରକେଶ୍ୱର ଦୋରା,ସନ୍ୟାସୀ ପ୍ରଧାନ ଏବଂ ଅନ୍ୟ କିଛି ବ୍ୟକ୍ତିଙ୍କ ନାଁ ରେ ଦିଗପହଣ୍ଡି ଥାନାରେ ଏତଲା ଦେଇଥିଲେ। ମଙ୍ଗଳବାର ସନ୍ଧ୍ୟା ରେ ଥାନାରେ ହାଜର ହେବାକୁ ପୋଲିସ  ସେମାନଙ୍କୁ କହିବା ପରେ ଗାଁ ରେ ଉତ୍ତେଜନା ପ୍ରକାଶ ପାଇଥିଲା।ଏକ ଜରୁରୀ ବୈଠକରେ ବହୁସଂଖ୍ୟକ ଗ୍ରାମବାସୀ ଏକତ୍ରିତ ହୋଇଥିଲେ।ପରେ ପ୍ରାୟ ୪ ଶହ ରୁ ଉର୍ଦ୍ଧ୍ୱ ଗ୍ରାମବାସୀ ଙ୍କ ସମେତ ମନ୍ଦିର ପରିଚାଳନା କମିଟି ର ସମସ୍ତ କର୍ମକର୍ତ୍ତା ଆଙ୍କୋରଡ଼ା ପଞ୍ଚାୟତ ସରପଞ୍ଚ ପ୍ରତିନିଧି ଶିଶିର କୁମାର ପ୍ରଧାନ,ତାରକେଶ୍ୱର ଦୋରା,ନିରାକାର ପ୍ରଧାନ ଙ୍କ ନେତୃତ୍ୱରେ ଥାନାରେ ପହଞ୍ଚିଥିଲେ।ଥାନାରେ ଥିବା ଜଣେ କର୍ମଚାରୀ ଗାଁ ମୁଖିଆ ମାନଙ୍କୁ ଘଟଣା ସମ୍ପର୍କରେ ପଚରାଉଚୁରା କରି ଧମକ ଦେବାରୁ ଲୋକେ ଉତ୍ତେଜିତ ହୋଇ ହୋ – ହଲ୍ଲା କରିଥିଲେ।ପରେ ଥାନା ଭାରପ୍ରାପ୍ତ ଆଇଆଇସି ତଥା ଡିଏସପି ପ୍ରଶାନ୍ତ କୁମାର ପାତ୍ର ଉତ୍ତେଜିତ ଗ୍ରାମବାସୀ ଙ୍କୁ ବୁଝାସୁଝା କରିବା ସହ ବିବାଦୀୟ ଜମିର ସୀମାସରହଦ ( ଡିମାର୍କେସନ) କରିବା ପରେ ପରବର୍ତ୍ତୀ ପଦକ୍ଷେପ ନିଆଯିବ ବୋଲି ପ୍ରତିଶ୍ରୁତି ଦେବାପରେ  ପରିସ୍ଥିତି ନିୟନ୍ତ୍ରଣ କୁ ଆସିଥିଲା।ଗ୍ରାମ ସଂଲଗ୍ନ ସରକାରୀ ଅନାବାଦୀ ଗୋଚର ଜମି କୁ ବ୍ରହ୍ମପୁର ର ଜଣେ ପ୍ରଭାବଶାଳୀ ବ୍ୟକ୍ତି ପୁରୁଷାନୁକ୍ରମେ ଜବରଦଖଲ କରି ବେଆଇନ ଭାବେ ପ୍ଲଟ କରି ବହୁସଂଖ୍ୟକ ବ୍ୟକ୍ତି ଙ୍କୁ ବିକ୍ରି କରିଥିବା ଗ୍ରାମବାସୀ ଅଭିଯୋଗ କରିଛନ୍ତି।ଗ୍ରାମରେ ଦୀର୍ଘବର୍ଷ ହେଲା ସେଟଲମେଣ୍ଟ ଖାନାପୁରି ହୋଇନାହିଁ।ଫଳରେ ଗ୍ରାମବାସୀ ନାହିଁ ନଥିବା ଅସୁବିଧାର ସମ୍ମୁଖିନ ହେଉଛନ୍ତି।ଝିଅ ବାହାଘର ଏବଂ ଚିକିତ୍ସା ଖର୍ଚ୍ଚ ପାଇଁ ଲୋକେ ଚାଷଜମି କିମ୍ବା ଘର ବାରି କାହାରିକୁ ବିକ୍ରି କରି ପାରୁନାହାନ୍ତି। ଘର ପଟ୍ଟା ଜମି ପଟ୍ଟା ନଥିବାରୁ ଛାତ୍ରୀ ଛାତ୍ର ମାନେ ରାଜସ୍ବ ବିଭାଗ ପକ୍ଷରୁ ଜାତିଗତ,ଆୟ, ସ୍ଥାୟୀ ବାସିନ୍ଦା ପ୍ରମାଣପତ୍ର ପାଇବାରେ ଘୋର ଅସୁବିଧା ଭୋଗୁଛନ୍ତି।କିଛିବର୍ଷ ପୂର୍ବେ ଗାଁ ରେ ହାଇଟେକ୍ ସର୍ଭେ କରାଯାଇଥିଲେ ମଧ୍ୟ ତାହା ଏବେ ଶୀତଳ ଭଣ୍ଡାର ରେ ପଡ଼ିରହିଛି। ଏନେଇ ଦିଗପହଣ୍ଡି ତହସିଲଦାର ସନ୍ତୋଷ କୁମାର ସାହୁ ଙ୍କୁ ପଚାରିବାରୁ ରାଜସ୍ବ ବିଭାଗ କ୍ଷେତ୍ର ଅଧିକାରୀ ମାନଙ୍କ ଜରିଆରେ ତଦନ୍ତ କରାଯାଇ ଆବଶ୍ୟକ ପଦକ୍ଷେପ ଗ୍ରହଣ କରାଯିବ ବୋଲି କହିଛନ୍ତି।