ୱେବ୍ସାଇଟ୍ ପୋର୍ଟାଲ୍ କରୁଛି ସମସ୍ୟା: ଆସିକାରେ ପ୍ରଧାନମନ୍ତ୍ରୀ ଫସଲବୀମା ପଞ୍ଜିକରଣ ଧିମା
ଆସିକା ତା ୧୦/୦୮ (ୱାଇଏନ୍ଏସ୍) ଚଳିତ ୨୦୨୫ ଖରିଫ୍ ଋତୁ ପାଇଁ ପ୍ରଧାନମନ୍ତ୍ରୀ ଫସଲ ବୀମା ଯୋଜନାରେ ଚାଷୀମାନଙ୍କ ନାମ ପଞ୍ଜିକରଣ ନିମନ୍ତେ ଗତ ଜୁଲାଇ ମାସ ୩୧ ତାରିଖ ଶେଷ ଦିନ ଥିଲା । ମାତ୍ର ଧାର୍ଯ୍ୟ ତାରିଖ ମଧ୍ୟରେ ବହୁ ଚାଷୀ ସେମାନଙ୍କ ଫସଲକୁ କେତେକ କାରଣରୁ ବୀମାକରଣ ପାଇଁ ନାମ ପଞ୍ଜିକରଣ କରିପାରିନଥିବାରୁ ସରକାରଙ୍କ ପକ୍ଷରୁ ଏହାର ପଞ୍ଜିକରଣ ଅବଧିକୁ ଅଗଷ୍ଟ ୧୪ ତାରିଖ ପର୍ଯ୍ୟନ୍ତ ବୃଦ୍ଧି କରାଯାଇଛି । ତେବେ ଇତି ମଧ୍ୟରେ ଦଶ ଦିନ ବିତିଯାଇଥିଲେ ମଧ୍ୟ ଆସିକା ଅଞ୍ଚଳରେ ଚାଷୀଙ୍କ ଫସଲବୀମା ନିମନ୍ତେ ନାମ ପଞ୍ଜିକରଣ ପାଇଁ ୱେବ୍ସାଇଟ୍ ପୋର୍ଟାଲ୍ ମନ୍ଥର ଗତିରେ ଚାଲୁଥିବା ଯୋଗୁଁ ବହୁ ଚାଷୀ ଫସଲବୀମାରୁ ବଞ୍ଚିତ ହେବା ସମ୍ଭାବନାକୁ ଏଡାଇ ହେବ ନାହିଁ ବୋଲି ସଚେତନ ନାଗରିକ ମହଲରେ ମତ ପ୍ରକାଶ ପାଉଛି । ଆସିକା ବ୍ଳକ ଓ ଏନ୍ଏସ୍ ଅଧିନସ୍ଥ ଅଧିକାଂଶ ଅଞ୍ଚଳର ଚାଷୀ ପ୍ରାଥମିକ ସେବା ସମବାୟ ସମିତି ଓ ଜନସେବା କେନ୍ଦ୍ରକୁ ଫସଲବୀମାରେ ନାମ ପଞ୍ଜିକରିିବାକୁ ଆସି ବିଭିନ୍ନ ସମୟରେ ନିରାଶ ହୋଇ ଫେରୁଥିବା ଦେଖିବାକୁ ମିଳୁଛି । ପୁରୁଣା ଋଣ ତଥ୍ୟକୁ ଆଧାର କରି ପ୍ରାଥମିକ ସେବା ସମବାୟ ସମିତି ଗୁଡିକ ପକ୍ଷରୁ ଚାଷୀଙ୍କ ଫସଲ ବୀମା ସଂକ୍ରାନ୍ତୀୟ ତଥ୍ୟ ୱେବ୍ସାଇଟ୍ ପୋର୍ଟାଲରେ କିପରି ନିର୍ଦ୍ଦିଷ୍ଟ ସମୟସୀମା ଭିତରେ ଦାଖଲ ହୋଇପାରିବ ସେଥିପାଇଁ ପ୍ରୟାସ ଜାରି ରଖିଥିବା ଦେଖିବାକୁ ମିଳୁଛି । ଫସଲବୀମା ପାଇଁ ୱେବ୍ସାଇଟ୍ ପୋର୍ଟାଲ୍ ଖୋଲୁଥିଲେ ବି ବିଭିନ୍ନ ତଥ୍ୟ ଦାଖଲ ସମୟରେ ନାନା ସମସ୍ୟା ସୃଷ୍ଟି ହେଉଥିବା ସାଙ୍ଗକୁ ମନ୍ଥର ଗତିରେ ଚାଲୁଥିବା ଯୋଗୁଁ ଫସଲବୀମା ପଞ୍ଜିକରଣ ଧିମା ଦେଖାଦେଇଛି ବୋଲି ଚର୍ଚ୍ଚା ହେଉଛି । ଆସିକା ବ୍ଳକ ଓ ଏନ୍ଏସି ଅଧିନସ୍ଥ ଅଞ୍ଚଳରେ ଥିବା ଆସିକା, ବଡଖୋଲି, ବରଗାଁ, ବେଣାପାଟ, ବାଲିସିରା, ଦେବଭୁମୀ, ହରିଡାପଦର, ଗୁଣ୍ଠପଡା, ଘଟକୁରୀ, ନଳବଣ୍ଟା, ନିମିନା, ପାଣ୍ଡିଆପଥର, ଧନିଜା, ମଙ୍ଗଳପୁର, ଜଗଦଳପୁର, ନୁଆଗାଁ, ଖଣ୍ଡଦେଉଳି ଗ୍ରାମ ସ୍ଥିତ ରାମେଶ୍ୱର ସେବା ସମବାୟ ସମିତି ଗୁଡିକ ପକ୍ଷରୁ ଚାଷୀଙ୍କୁ ଖରିଫ୍ ଋତୁ ପାଇଁ ଋଣ ଲଗାଣ କରାଯାଉଛି । ପ୍ରାକୃତିକ ଦୁର୍ବିପାକ ଦ୍ୱାରା ଫସଲ ଅମଳରେ କ୍ଷତି ହେଲେ ଏହି ବୀମା ଦ୍ୱାରା କ୍ଷତିପୂରଣ ପ୍ରଦାନ ପାଇଁ ସରକାରଙ୍କ ପକ୍ଷରୁ ପ୍ରଧାନମନ୍ତ୍ରୀ ଫସଲବୀମା ଉପରେ ଗୁରୁତ୍ୱ ଦିଆଯାଉଛି । ଆସିକା ବ୍ଳକ ଓ ଏନ୍ଏସି ଅଧିନସ୍ଥ ଅଞ୍ଚଳର ଶହ ଶହ ବ୍ୟକ୍ତି ମୁଖ୍ୟତଃ ଧାନଫସଲ ଉପରେ ନିର୍ଭର କରୁଥିଲା ବେଳେ ଚଳିତ ଖରିଫ୍ ଋତୁରେ ପ୍ରାୟ ୧୭୩୬୦ ହେକ୍ଟର ଜମିରେ ଧାନଚାଷ ହେଉଥିବା ଆକଳନ କରାଯାଉଛି । ବିଶେଷକରି ଆସିକା ଅଞ୍ଚଳରେ ବିଗତ କିଛି ବର୍ଷ ହେଲା ବିଭିନ୍ନ ସମୟରେ ଧାନ ଅମଳ ଋତୁରେ ପ୍ରାକୃତିକ ବିପର୍ଯ୍ୟୟ ହେତୁ ଅଧିକାଂଶ ଅଞ୍ଚଳର ଫସଲ ନଷ୍ଟ ହୋଇଥାଏ । ଯାହାରି ଫଳରେ ଚାଷୀ ଧାନଫସଲ ହରାଇ କ୍ଷତିଗ୍ରସ୍ତ ବି ହୋଇଥାନ୍ତି । ଏଥିରୁ ରକ୍ଷା ପାଇବା ପାଇଁ ବହୁ ଚାଷୀ ଫସଲବୀମା ଯୋଜନାରେ ନାମ ପଞ୍ଜିକରଣ କରିସାରିଥିଲା ବେଳେ ଆହୁରି ଅନେକ ଚାଷୀ ୱେବ୍ସାଇଟ୍ ପୋର୍ଟାଲ୍ରେ ବିଭିନ୍ନ ସମୟରେ ଦେଖାଦେଉଥିବା ନାନା ସମସ୍ୟା ଯୋଗୁଁ ନାମ ପଞ୍ଜିକରଣରୁ ବଂଚିତ ହୋଇଆସୁଥିବା ଜଣାପଡିଛି । ଫସଲବୀମା ପାଇଁ ପଞ୍ଜିକରଣ ଅବଧି ଦିନ ବୃଦ୍ଧି କରାଯାଇଥିଲେ ମଧ୍ୟ ବହୁ ଚାଷୀ ପ୍ରାଥମିକ ସେବା ସମବାୟ ସମିତି ଓ ଜନସେବା କେନ୍ଦ୍ରକୁ ଆବଶ୍ୟକୀୟ କାଗଜପତ୍ର ଧରି ଯାଉଥିଲେ ମଧ୍ୟ ୱେବ୍ସାଇଟ୍ ପୋର୍ଟାଲ୍ ବିଭିନ୍ନ ସମୟରେ ମନ୍ଥର ଗତିରେ ଚାଲୁଥିବା ଯୋଗୁଁ ନାମ ପଞ୍ଜିକରଣ କରିନପାରି ନିରାଶ ହୋଇଫେରୁଥିବା ଜଣାପଡିଛି । ରାଜ୍ୟ ସରକାର ତଥା ବିଭାଗୀୟ ଉଚ୍ଚ କର୍ତ୍ତୃପକ୍ଷ ଚାଷୀ ସମାଜର ବୃହତ୍ତର ସ୍ୱାର୍ଥରକ୍ଷା ଦୃଷ୍ଟିରୁ ପ୍ରଧାନମନ୍ତ୍ରୀ ଫସଲ ବୀମା ଯୋଜନାର ୱେବ୍ସାଇଟ୍ ପୋର୍ଟାଲ୍ ଯେପରି ସଠିକ୍ ଭାବେ କାର୍ଯ୍ୟକାରୀ ହୋଇପାରିବ ସେ ଦିଗରେ ପଦକ୍ଷେପ ନେବା ସାଙ୍ଗକୁ ଫସଲବୀମା ଅବଧି ଆଉ କିଛି ଦିନ ବଢାଇବାକୁ ଆସିକା ଅଞ୍ଚଳର ଅଗ୍ରଣୀ ଚାଷୀ ରାଘବ କୁମାର ନାହାକ ଅନୁରୋଧ କରିଛନ୍ତି ।
