ଅଜଣା ଗାଡି ଧକ୍କାରେ କୃଷ୍ଣସାର ମୃଗ ମୃତ

ଦିଗପହଣ୍ଡି,(ୱାଇଏନ୍ଏସ୍): ଦିଗପହଣ୍ଡି ସ୍ଥିତ ଖେମୁଣ୍ଡି କଲେଜ ନିକଟରେ ଶନିବାର ମଧ୍ୟାହ୍ନରେ କୌଣସି ଅଜଣା ଗାଡ଼ି ଧକ୍କାରେ କୃଷ୍ଣସାର ମୃଗ ଗୁରୁତର ଆହାତ ହୋଇ ରାସ୍ତାକଡରେ ଛଟପଟ ହେଉଥିଲା। ରାସ୍ତାରେ ଯିବା ଆସିବା ହେଉଥିବା କିଛି ବ୍ୟକ୍ତି ଏନେଇ ବନବିଭାଗ କାର୍ଯ୍ୟାଳୟକୁ ଖବର କରିଥିଲେ। ବନବିଭାଗ ରେଞ୍ଜର କାହ୍ନୁ ଚରଣ ପଟ୍ଟନାୟକ,ଫରେଷ୍ଟର କମଳ ପାତ୍ର,ଫରେଷ୍ଟ ଗାର୍ଡ ମୂରଲୀଧର ନାୟକ ପ୍ରମୁଖ ଘଟଣାସ୍ଥଳରେ ପହଞ୍ଚି ଆହାତ ମୃଗ ଟିକୁ ଉଦ୍ଧାର କରି ସ୍ଥାନୀୟ ପ୍ରାଣୀ ଚିକିତ୍ସାଳୟରେ ଭର୍ତ୍ତି କରିଥିଲେ । ସେଠାରେ ଉପସ୍ଥିତ ପ୍ରାଣୀ ଚିକିତ୍ସାଧିକାରୀ ଡା.ଆଶିଷ ଦୋରା ଆହାତ ମୃଗ ଟିକୁ ମୃତ ଘୋଷଣା କରିଥିଲେ । ପରେ ମୃତଦେହ କୁ ବ୍ୟବଚ୍ଛେଦ କରାଯିବା ପରେ ଉପସ୍ଥିତ ବନ ବିଭାଗ କର୍ମଚାରୀ ଙ୍କୁ ହସ୍ତାନ୍ତର କରାଯାଇଥିଲା । ମୃତ କୃଷ୍ଣସାର ମୃଗ ଟି ଅଣ୍ଡିରା ପ୍ରଜାତିର ଏବଂ ବୟସ ପ୍ରାୟ ୨ ବର୍ଷ ହେବ। ସ୍ଥାନୀୟ କେନ୍ଦ୍ରୀୟ ନର୍ସରୀ ପରିସରରେ ବନ କର୍ମଚାରୀ ଙ୍କ ଉପସ୍ଥିତିରେ ମୃଗ ର ମୃତଦେହକୁ ପୋତି ଦିଆଯାଇଥିବା ରେଞ୍ଜର ଜଣାଇଛନ୍ତି ।