ଅବସରପ୍ରାପ୍ତ ସେନା କର୍ମଚାରୀଙ୍କ ଘରୁ ଚୋରୀ

ନିମାପଡ଼ା, (ସନ୍ତୋଷ କୁମାର ଦାଶ):ପୁରୀ ଜିଲ୍ଲା ଅସ୍ତରଙ୍ଗ ବ୍ଲକ ହୀରାଦେଈପୁର ଗାଁର ମଦନମୋହନ ମଲ୍ଲିକ ନାମକ ଜଣେ ଅବସରପ୍ରାପ୍ତ ସେନା ହାବିଲଦାରଙ୍କ ଘରୁ ଚୋରି ହୋଇଛି। ସେ କଟକ ରେ ପରିବାର ସହିତ ରହୁଥିଲେ। ମାର୍ଗଶିର ମାସ ଶେଷ ମାଣବସା ଗୁରୁବାରରେ ମାଣ ବସାଇବା ପାଇଁ ସପରିବାର ଗ୍ରାମକୁ ଆସିଥିଲେ।ନିଜ କାର୍ଯ୍ୟକ୍ରମ ସାରି ଗତ ରବିବାର ୧୭ ତାରିଖ ରେ କଟକ ଫେରିଯାଇଥିଲେ। ନିଜ ଘରର ଦେଖାଶୁଣା କରିବା ପାଇଁ ଘର ନିକଟରେ ନିଜ ପୁତୁରାବୋହୁ ମଞ୍ଜୁ ମଲ୍ଲିକଙ୍କୁ ଦାୟିତ୍ୱ ଦେଇଥିଲେ। ମଞ୍ଜୁ ପ୍ରତ୍ୟେକ ଦିନ ଘର ଚାବି ଖୋଲି ଠାକୁର ପୂଜା କରନ୍ତି,କିନ୍ତୁ ଶନିବାର ୨୧ ତାରିଖ ଦିନ ପ୍ରବଳ ବର୍ଷା କାରଣରୁ ମଞ୍ଜୁ ଆସିନଥିଲେ। ଅପରାହ୍ନ ସମୟ ରେ ମଞ୍ଜୁ ଘରକୁ ଆସି ଦେଖିଥିଲେ ମଦନଙ୍କ ବାସ ଭବନ ରେ ସମସ୍ତ ତାଲା ଭଙ୍ଗା ହୋଇଛି ଆଉ ମଦନଙ୍କ ଶୋଇବା ଘରେ ଆଲମିରା ଭଙ୍ଗା ହୋଇ ଜିନିଷ ପତ୍ର ଏଣେ ତେଣେ ପକାଯାଇଛି, ଯାହାକୁ ନେଇ ଏହା ଚୋରୀ ହୋଇଥିବାର ଭାବି ସଙ୍ଗେ ସଙ୍ଗେ ମଦନଙ୍କୁ ଯୋଗାଯୋଗ କରିଥିଲେ।ମଦନ ତାଙ୍କ ପରିବାର ସହ ଆସି ଗତକାଲି ଅସ୍ତରଙ୍ଗ ଥାନା ରେ ନିଜ ଘରୁ ଚୋରି ହୋଇଥିବା ସମ୍ପର୍କରେ ଅଭିଯୋଗ କରିଥିଲେ। ଏ ସଂକ୍ରାନ୍ତରେ ୨୫୭/୨୪ କେଶ ନମ୍ବର ରେ ମାମଲା ରୁଜ୍ଜୁ କରି ଅସ୍ତରଙ୍ଗ ପୋଲିସ ଘଟଣା ସ୍ଥଳକୁ ଯାଇ ପ୍ରାଥମିକ ତଦନ୍ତ ଆରମ୍ଭ କରିଥିବାବେଳେ ପୁରୀରୁ ସାଇଣ୍ଟିଫିକ ଦଳ ଓ ଅନୁସନ୍ଧାନ କାରୀ କୁକୁର ଆସି ଚୋରି ଘଟଣା ର ତଦନ୍ତ କରିଛନ୍ତି। ତାଙ୍କ ଘରୁ ୧. ୫ ଗ୍ରାମ ର ସୁନା ହାର, ସୁନାର କାନ ପେଣ୍ଡି ୨ ଟା ଓ ୨ ଗୋଟି ରୁପା ପାଉଁଜି ଏହିପରି ଦେଢ଼ ଲକ୍ଷରୁ ଅଧିକ ଟଙ୍କା ମୂଲ୍ୟର ଅଳଙ୍କାର ଚୋରି ହୋଇଥିବା ପୋଲିସରେ ଅଭିଯୋଗ ହୋଇଛି।