ଅର୍ଦ୍ଧେନ୍ଦୁ ଦାସ ସମ୍ବିଧାନ ପୀଠରେ ବିଚାର ପାଇଁ ଆବେଦନ କରିବା ଉଚିତ: ଡଃ ଜ୍ଞାନେନ୍ଦ୍ର
ଭୁବନେଶ୍ୱର, (ଯୁଗାବ୍ଦ ନ୍ୟୁଜ) :-ଶ୍ରୀମନ୍ଦିର ପରିକ୍ରମା ପ୍ରକଳ୍ପ ଉପରେ ମାନ୍ୟବର ଉଚ୍ଚ ନ୍ୟାୟାଳୟର ଖଣ୍ଡପୀଠଙ୍କ ରାୟ ଓ ଆର୍ଯ୍ୟସମାଜର ବିବାହ ସଂସ୍କାର ପ୍ରମାଣ ପତ୍ର ଉପରେ ଦେଇଥିବା ରାୟ ଉପରେ ଆର୍ଯ୍ୟସମାଜ, ଓଡ଼ିଶାର ଅଧ୍ୟକ୍ଷ ତଥା ସି.ବି.ଆଇ.ର ପୂର୍ବତନ ବରିଷ୍ଠ ଓକିଲ ଡଃ ଆର୍ଯ୍ୟକୁମାର ଜ୍ଞାନେନ୍ଦ୍ର ଏକ ପ୍ରେସ୍ ବିବୃତ୍ତିରେ ଓଡ଼ିଶାର ପୂର୍ବତନ ମୁଖ୍ୟମନ୍ତ୍ରୀ ବିଜୁ ବାବୁଙ୍କର ଏକ ମନ୍ତବ୍ୟକୁ ଉଲ୍ଲେଖ କରି କହିଛନ୍ତି ଯେ, ‘ଜଜମାନେ ଭଗବାନ ନୁହଁନ୍ତି, କି ସେମାନଙ୍କର ରାୟ ବେଦ ବାଇବେଲ ନୁହେଁ’ । ଅର୍ଦ୍ଧେନ୍ଦୁ ବାବୁଙ୍କ ଆବେଦନଟି ଶ୍ରୀମନ୍ଦିର ଐତିହ୍ୟର ସୁରକ୍ଷାକୁ ନେଇ କୋଟି ଓଡ଼ିଆଙ୍କ ସମ୍ବେଦନଶୀଳ ଭାବାବେଗକୁ ନେଇ ହୋଇଥିଲା । ଏଣୁ ଶ୍ରୀ ଦାସଙ୍କ ବ୍ୟକ୍ତିଗତ ମାମଲା କହି ମାନ୍ୟବର କୋର୍ଟଙ୍କ ମନ୍ତବ୍ୟ ଉପରେ ଶ୍ରୀ ଦାସ, ଉଚ୍ଚ ନ୍ୟାୟାଳୟର ସମ୍ବିଧାନ ପୀଠକୁ ଯିବା ଉଚିତ୍ ବୋଲି ଡଃ ଜ୍ଞାନେନ୍ଦ୍ର କହିଛନ୍ତି । ଏଥି ସହିତ ଆର୍ଯ୍ୟ ସମାଜ ଭାରତବର୍ଷର୍ରେ କୁସଂସ୍କାର ବିରୁଦ୍ଧରେ ୧୪୭ ବର୍ଷ ଧରି କାର୍ଯ୍ୟ କରୁଅଛି । ମହର୍ଷି ଦୟାନନ୍ଦ ୧୯୭୫ ମସିହାରେ ଆର୍ଯ୍ୟ ସମାଜ ପ୍ରତିଷ୍ଠା କରିଥିଲେ, ଭାରତବର୍ଷରେ ସୁପ୍ରିମକୋର୍ଟ ୧୯୫୦ ମସିହାରେ ପ୍ରତିଷ୍ଠା ହେଲା, ସୁପ୍ରିମ କୋର୍ଟ ପ୍ରତିଷ୍ଠାର ୭୫ ବର୍ଷ ପୂର୍ବରୁ ଜାତି, ଯୌତୁକ, ଜାତକ ବିହୀନ ବିବାହ କରିବା ପାଇଁ ମହର୍ଷି ଆହ୍ୱାନ ଦେଇଥିଲେ ଓ ଭାରତ ବର୍ଷରେ ଆର୍ଯ୍ୟ ସମାଜୀମାନେ ତାହା କାର୍ଯ୍ୟକାରୀ କରୁଛନ୍ତି । ଏଣୁ ମାନ୍ୟବର କୋର୍ଟଙ୍କ ଏଭଳି ମନ୍ତବ୍ୟ, ଉତ୍ତର ପିଢି ପାଇଁ ଭୁଲ୍ ବାର୍ତ୍ତା ହେବ ବୋଲି ଡଃ ଜ୍ଞାନେନ୍ଦ୍ର ଦୃଢତାର ସହ କହିଛନ୍ତି ।
