ଆତ୍ମଘୋଷିତ ଆଶ୍ଚର୍ଯ୍ୟ ଦେଶ: ଯେଉଁଠି ଲୋକ ସଂଖ୍ୟା ମାତ୍ର ୩୩

ବିଶ୍ୱରେ ଛୋଟ ଦେଶ କହିଲେ ଭାଟିକାନ ସିଟିକୁ ଆମେ ଜାଣିଥାଉ । କିନ୍ତୁ ଭାଟିକାନ ସିଟିଠାରୁ ମଧ୍ୟ ଆହୁରି ଏକ ଛୋଟ ଦେଶ ରିହିଛି । ଏହାର ଜନସଂଖ୍ୟା ଭାରତର ଏକ ଯୌଥ ପରିବାରର ସଦସ୍ୟଙ୍କ ଠାରୁ ମଧ୍ୟ କମ୍ ହେବ । ଏହି ଦେଶର ଲୋକ ଓ ପାଳିତ ପଶୁଙ୍କ ମୋଟ ସଂଖ୍ୟାକୁ ମାତ୍ର ୩୩ । ଆମେରିକାର ନେବାଡା ଅଞ୍ଚଳରେ ଗଢ଼ି ଉଠିଥିବା ଏହି ଛୋଟ ଦେଶର ନାମ ହେଉଛି ମାଲୋସିଆ ।
ମୋଲୋସିଆ ପଛର ରହସ୍ୟ: କେଭିନ ବର୍ଗଙ୍କ ହାତରେ ରହିିଛି ମୋଲୋସିଆର ଶାସନଭାର । ୧୯୭୭ ରେ ଗଢ଼ି ଉଠିଥିବା ଏକ ଛୋଟିଆ ଦେଶ ଗଠନ ପଛରେ ରହିିଛି ଏକ ସୁନ୍ଦର କାହାଣୀ । ୧୯୭୭ ମସିହାରେ ହାଇସ୍କୁଲର ଛାତ୍ର ଥିବାବେଳେ କେଭିନ ଓ ତାଙ୍କ ସାଥୀ ସ୍ପାଇଲମ୍ୟାନ ଏହି ସ୍ଥାନକୁ ଆସିଥିଲେ । ଦୁଇଜଣ କିିଛି ଦିନ ଏଠାରେ ରହିବା ପରେ ସ୍ପାଇଲମ୍ୟାନ ନିଜକୁ ରାଜା ଓ କେଭିନଙ୍କୁ ପ୍ରଧାନମନ୍ତ୍ରୀ କରି ରାଜକୀୟ ଠାଣିରେ ଶାସନ କଲେ । ସମୟ ବିତିବା ସଙ୍ଗେ ସଙ୍ଗେ ସ୍ପାଇଲମ୍ୟାନ ତାଙ୍କ ପତ୍ନୀଙ୍କ ଧରି ମୋଲୋସିଆ ଛାଡି ଦେଇଥିଲେ । ସ୍ପାଇଲମ୍ୟାନ ଯିବା ପରେ କେଭିନ ନିଜକୁ ରିପବ୍ଲିକ ଅଫ ମୋଲୋସିଆର ରାଷ୍ଟ୍ରପତି ଘୋଷିତ କରିଥିଲେ ।
ପ୍ରାୟ ୫ ଏକର ଜମିରେ ଗଢ଼ି ଉଠିଛି ମୋଲୋସିଆ ଦେଶ । ଏଥିମଧ୍ୟରୁ ୧.୩ ଏକର ଜମିରେ କେଭିନ ପତ୍ନୀ ଓ ୭ ପିଲାଙ୍କ ସହ ବାସ କରୁଛନ୍ତି । ଏପରିକି ତାଙ୍କ ବନ୍ଧୁବାନ୍ଧବ ଓ ପାଳିତ ପଶୁଙ୍କୁ ମୋଲୋସିଆର ନାଗରିକତା ମିଳିଛି । ଗତବର୍ଷ ମୋଲୋସିଆକୁ ବୁଲିବା ପାଇଁ ପ୍ରାୟ ୧୦୧ ପର୍ଯ୍ୟଟକ ଆସିଥିଲେ । ମୋଲୋସିଆର ବାଲୋରା ନାମକ ନିଜସ୍ୱ କରେନ୍ସି ରହିଛି । କରେନ୍ସି ବଦଳାଇବା ପାଇଁ ମୋଲୋସିଆର ନିଜସ୍ୱ ବ୍ୟାଙ୍କ ରହିଛି । କାରଣ ଏହି ଦେଶରେ ଡଲାରର ପ୍ରଚଳନ ହୁଏ ନାହିଁ । ଏପରିକି ଏଠାରେ ଏକ ପୋଷ୍ଟ ଅଫିସ ରହିଛି, ଯେଉଁଠାରେ ମୋଲୋସିଆର ପୋଷ୍ଟାଲ ଷ୍ଟାମ୍ପ ମିଳେ । ତା’ ସହିତ ମୋଲୋସିଆର ନିଜର ମଧ୍ୟ ଜାତୀୟ ପତାକା ରହିଛି । ଏଯାବତ ମୋଲୋସିଆ ଏକ ଦେଶ ବୋଲି ମାନ୍ୟତା ମିଳିନାହିଁ । ଆମେରିକା ଅନୁଯାୟୀ ଏଭଳି କୌଣସି ଦେଶ ନାହିଁ, ଏହା ଏକ ଆର୍ଟ ପ୍ରୋଜେକ୍ଟ । ଯାହାକୁ ଗୋଟିଏ ପରିବାର ନିୟନ୍ତ୍ରଣ କରୁଛି । କିନ୍ତୁ କେଭିନ ଆମେରିକାର ଏଭଳି ଯୁକ୍ତିକୁ ଖଣ୍ଡନ କରିଛନ୍ତି । ସବୁଠୁ ଆଶ୍ଚର୍ଯ୍ୟକର କଥା ହେଉଛି କେଭିନଙ୍କ ପରିବାର ଆମେରିକାର ସମସ୍ତ ନିର୍ବାଚନରେ ଭାଗ ନେଇଥାନ୍ତି ।