ଏମିତି ସ୍କୁଲ, ଯେଉଁଠି ଛାତ୍ରଛାତ୍ରୀଙ୍କୁ ଜୁହାର ହୁଅନ୍ତି ଶିକ୍ଷକ

ବଡଙ୍କୁ ସମ୍ମାନ ଦେବା ସେମାନଙ୍କ ଗୋଡ ଛୁଇଁ ପ୍ରଣାମ କରିବା ଆମ ସମାଜରେ କାହିଁ କେଉଁ କାଳରୁ ରହିଆସିଛି । ଏହା ଦ୍ୱାରା ବଡ ଓ ସାନଙ୍କ ମଧ୍ୟରେ ଭାବର ଆଦାନ ପ୍ରଦାନ ହୋଇଥାଏ । ସାନମାନେ ବଡଙ୍କୁ ଉପଯୁକ୍ତ ସମ୍ମାନ ଦେବା ଶିକ୍ଷା କରନ୍ତି । ବଡଙ୍କ ପାଦ ଛୁଇଁ ପ୍ରଣାମ କରିବାକୁ ଶିକ୍ଷା ଦିଆଯାଇଥାଏ । ପିଲା ବିଦ୍ୟାଳୟକୁ ଗଲେ ପ୍ରଥମ ଶିକ୍ଷକଙ୍କୁ ପ୍ରଣାମ କରିଥାନ୍ତି । ଏହା ପରେ ପାଠପଢ଼ା ଆରମ୍ଭ ହୋଇଥାଏ । ହେଲେ ଆମେ ଆଜି ଏପରି ଏକ ବିଦ୍ୟାଳୟ ସମ୍ପର୍କରେ କହିବାକୁ ଯାଉଛୁ ଯେଉଁଠି ଓଲଟା ଦେଖିବାକୁ ମିଳିଥାଏ । ଏଠାରେ ଛାତ୍ରଛାତ୍ରୀ ଶିକ୍ଷକଙ୍କ ଗୋଡ ଛୁଇଁ ଜୁହାର ହୋଇନଥାନ୍ତି, ବରଂ ଶିକ୍ଷକ ଛାତ୍ରଛାତ୍ରୀଙ୍କୁ ଗୋଡ ଛୁଇଁ ପ୍ରଣାମ କରିଥାନ୍ତି । ମହାରାଷ୍ଟ୍ର ଘାଟକୋପଠାରେ ଏକ ଭଡା ଘରେ ଚାଲିଛି ଏହି ସ୍କୁଲ ‘ରୁଷିକୁଲ ଗୁରୁକୁଲ ବିଦ୍ୟାଳୟ’ । ଆମ ସମାଜରେ ବିଶ୍ୱାସ ରହିଛି ମଣିଷ ଦେହରେ ଭଗବାନ ବାସ କରନ୍ତି ଓ ପିଲାମାନଙ୍କୁ ଭଗବାନଙ୍କ ରୂପ ବୋଲି କୁହାଯାଇଥାଏ । ଏହି ମାନ୍ୟତାକୁ ଆଧାର କରି ବିଦ୍ୟାଳୟରେ ପ୍ରତିଦିନ ଶିକ୍ଷାଦାନ ପୂର୍ବରୁ ଶିକ୍ଷକମାନେ ପିଲାମାନଙ୍କ ଗୋଡ ଛୁଇଁ ପ୍ରଣାମ କରନ୍ତି । ଏପରି ଏକ ନୂଆ ପରମ୍ପରା ଦ୍ୱାରା ପିଲାମାନଙ୍କର ଶିକ୍ଷକଙ୍କ ପ୍ରତି ଆଦର ବଢ଼ିବ । ଏହା ଦ୍ୱାରା ସେମାନେ ସମାଜରେ ସମସ୍ତଙ୍କୁ ଆଦର କରିବା ଶିକ୍ଷା କରିପାରିବେ ବୋଲି ସ୍କୁଲ ପକ୍ଷରୁ କୁହାଯାଇଛି । କେବଳ ଏହି ଗୋଟିଏ କଥା ନୁହେଁ, ପିଲାମାନଙ୍କୁ ଏଠାରେ ନୂଆ ନୂଆ ଉପାୟରେ ପାଠ ପଢ଼ାଯାଇଥାଏ ।