ଓଏଏସ୍ ପରୀକ୍ଷାରେ ଗଜପତିର ୪ଜଣ କୃତକାର୍ଯ୍ୟ ହେଲେ

ପାରଳାଖେମୁଣ୍ଡି,(ତାରିଣୀ ପ୍ରସାଦ ପଣ୍ଡା): ଓଡ଼ିଶା ପ୍ରଶାସନିକ ସେବା (ଓଏଏସ୍) ପରୀକ୍ଷା ଫଳ ଶନିବାର ପ୍ରକାଶ ପାଇଛି । ଏଥିରେ ଗଜପତି ଜିଲା ପାରଳାଖେମୁଣ୍ଡିର ୪ ଜଣ କୃତକାର୍ଯ୍ୟ ହୋଇଛନ୍ତି । ଓମ୍ ଶାନ୍ତି କଲୋନୀର ଦେବବ୍ରତ ଗୌଡ଼ ୭ ମ ସ୍ଥାନ ଅଧିକାର କରିଥିବା ବେଳେ ଆଦ୍ୟାସା ରାଉତ ୯୯ ତମ, କଳିଙ୍ଗ ପୂଜାରୀ ୫୪୮ତମ, ସିଙ୍ଗିପୁରମ୍ ହରି ୪୨୧ ତମ ସ୍ଥାନ ହାସଲ କରିଛନ୍ତି। ଅବସରପ୍ରାପ୍ତ ଶିକ୍ଷକ ବିଜୟ ଗୌଡ଼ ଏବଂ ଶିକ୍ଷୟିତ୍ରୀ ସୁକାନ୍ତି ନାୟକଙ୍କ ସାନ ପୁଅ ଦେବବ୍ରତ । ସେ ବର୍ତ୍ତମାନ ଲୋକସେବା ଭବନରେ ସାଧାରଣ ପ୍ରଶାସନ ବିଭାଗର ଆସିଷ୍ଟାଣ୍ଟ ସେକ୍ସନ ଅଫିସର ରହିଛନ୍ତି । ୪ର୍ଥ ପ୍ରୟାସରେ ସେ ସଫଳତା ପାଇଥିବା କହିଛନ୍ତି। ସମାଜର ସବୁଠାରୁ ତଳ ଶ୍ରେଣୀର ଲୋକମାନଙ୍କ ସେବା କରିବା ତାଙ୍କର ପ୍ରଥମ କର୍ତ୍ତବ୍ୟ ବୋଲି ପ୍ରତିକ୍ରିୟାରେ କହିଛନ୍ତି। ସେହିପରି ଆଦ୍ୟାସା ରାଉତ ବର୍ତ୍ତମାନ ଉପ ଜିଲାପାଳଙ୍କ କାର୍ଯ୍ୟାଳୟରେ କାର୍ଯ୍ୟରତ । ରା.ଉଦୟଗିରି ବ୍ଲକ ଗେଡେ ଗ୍ରାମର ଦୁର୍ଗା ପୂଜାରୀଙ୍କ ପୁଅ କଳିଙ୍ଗ ତାଙ୍କର ୫ମ ପ୍ରୟାସରେ ସଫଳତା ପାଇଛନ୍ତି । ତାଙ୍କ ବାପା ଅବସରପ୍ରାପ୍ତ ସେକ୍ସନ ଅଫିସର । କଳିଙ୍ଗ ବର୍ତ୍ତମାନ ଅଡିଟର ଭାବେ ରାୟଗଡ଼ା ଜିଲାରେ କାର୍ଯ୍ୟରତ । ସେହିପରି ସିଙ୍ଗିପୁରମ୍ ହରିଙ୍କ ଘର ଗୋଷାଣୀ ବ୍ଲକ୍ ବାଘଶାଳା ଗ୍ରାମର ବୋଲି ଜଣାପଡ଼ିଛି । ଏହି 4 ଜଣ ଗଜପତି ଜିଲ୍ଲାରୁ ଓଏଏସ ପରୀକ୍ଷାରୁ କୃତ କାର୍ଯ୍ୟ ହୋଇ ଜିଲ୍ଲାର ଗୌରବର କାରଣ ସାଜିଥିବାରୁ ଜିଲ୍ଲାବାସୀ ଅଭିନନ୍ଦନ ଜଣାଇଛନ୍ତି.