କୁନି ହାତରେ ସତ୍ୟଂ-ଶିବଂ-ସୁନ୍ଦରଂ

ଭୁବନେଶ୍ୱର, (ଯୁଗାବ୍ଦ ନ୍ୟୁଜ):ଆଜି ହେଉଛି ପବିତ୍ର ମହା ଶିବରାତ୍ରି । ଦେବ ଦେବ ମହାଦେବଙ୍କର ପବିତ୍ର ଜାଗର ଯାତ୍ରା । ପ୍ରତିଟି ଶୈବ ପୀଠ ଚଳଚଞ୍ଚଳ ଓ ଉତ୍ସବ ମୁଖର । ଚାରିଆଡ଼େ ଓଁ ନମଃ ଶିବାୟ ଧ୍ୱନିରେ ମୁଖରିତ । ଭକ୍ତ ଓ ଶ୍ରଦ୍ଧାଳୁଗଣ ମହାଦେବଙ୍କ ସାନ୍ନିଧ୍ୟ ପ୍ରାପ୍ତି ପାଇଁ ଉପବାସ ରହି ଦୀପ ଜାଳି ସଂକଳ୍ପ ବ୍ରତ ଦିନଟିରେ ଧାରଣ କରିଥାନ୍ତି । ମହାପ୍ରଭୁଙ୍କ ଆରାଧନା ଲାଗି କ୍ଷୀର, ଦହି, ମହୁ, ଲେମ୍ବୁ, ଘିଅ, ଫୁଲ, ଫଳ, ବେଲପତ୍ର ଇତ୍ୟାଦି ଧରି ଠାକୁରଙ୍କ ଠାରେ ଲାଗି କରିଥାନ୍ତି । ସଂପ୍ରତି ତନ୍ମଧ୍ୟରୁ ଅନେକ ବୃକ୍ଷର ପତ୍ର, ଫୁଲ, ଫଳ ଏବେ ବିଲୁପ୍ତ ଅବସ୍ଥାରେ । ଏପରିକି ଶିବଙ୍କର ଅତି ପ୍ରିୟ ବେଲପତ୍ରର ଅଭାବ ପରିଲକ୍ଷିତ ହୋଇଛି । ଯାହାକୁ ନେଇ ଭୁବନେଶ୍ୱର ପୋଖରୀପୁଟ ଅଞ୍ଚଳରେ ରହୁଥିବା କୁନି ଚିତ୍ରଶିଳ୍ପୀ ରୂପେ ପରିଚିତ ୮ବର୍ଷ ବୟସର ବାଳକ ଶାନ୍ତନୁ ଶାନ୍ତିସ୍ୱରୂପ ଚିନ୍ତା ପ୍ରକଟ କରିଛନ୍ତି । ରଙ୍ଗ ଓ ତୁଳୀକୁ ବ୍ୟବହାର କରି ଜନସଚେତନତା ଉଦ୍ଦେଶ୍ୟରେ ଶ୍ରଦ୍ଧା ଓ ଭକ୍ତିର ସହ ନିଖୁଣ ରୂପେ ବେଲପତ୍ର ମଧ୍ୟରେ ଆଙ୍କିଛନ୍ତି ସତ୍ୟଂ-ଶିବଂ- ସୁନ୍ଦରଂଙ୍କ ଚିତ୍ର । ତା’ମଧ୍ୟରେ ଦେବ ଦେବ ମହାଦେବଙ୍କୁ ସ୍ଥାନିତ କରି ସାରା ବିଶ୍ୱକୁ ଦେଇଛନ୍ତି ସବୁଜ ସଂକଳ୍ପର ବାର୍ତ୍ତା । ଏହି ପବିତ୍ର ଦିବସରେ ପ୍ରତିଟି ଭକ୍ତ ଅନ୍ତତଃ ଗୋଟିଏ ଲେଖାଏଁ ବେଲବୃକ୍ଷ ମହାପ୍ରଭୁଙ୍କ ଲାଗି ଲଗାଇବା ପାଇଁ ଶାନ୍ତନୁ ଏ ପରିପ୍ରେକ୍ଷୀରେ ନିବେଦନ କରିଛନ୍ତି ।