ଗଜପତିରେ ୫ଲକ୍ଷ ଟଙ୍କାର ନକଲି ଗୁଟ୍ଖା ଜବତ, ୧ ଗିରଫ
ପାରଳାଖେମୁଣ୍ଡି,(ତାରିଣୀ ପ୍ରସାଦ ପଣ୍ଡା): ଗଜପତି ଜିଲ୍ଲା କାଶୀନଗର ପୋଲିସ ଶନିବାର ୯୩ ବସ୍ତା ନକଲି ଗୁଟ୍ଖା ଜବତ କରିଛି । ଜବତ ଗୁଟ୍ଖାର ଆନୁମାନିକ ମୂଲ୍ୟ ୫ଲକ୍ଷରୁ ଉର୍ଦ୍ଧ୍ୱ ଟଙ୍କା ହେବ ବୋଲି ପୋଲିସ ସୂଚନା ଦେଇଛି । ଏହି କାରବାରରେ ସମ୍ପୃକ୍ତି ଅଭିଯୋଗରେ ପୋଲିସ ମୁନିଗ୍ରାମର ବ୍ୟବସାୟୀ ସସୁପଲ୍ଲୀ ସୁଧୀରଙ୍କୁ ଗିରଫ କରିଛି । ଥନାରେ ଏକ ମାମଲା ରୁଜୁ କରାଯାଇ ସୁଧୀରଙ୍କୁ କୋର୍ଟ ଚାଲାଣ କରାଯାଇଛି । କାଶୀନଗର ସହର ଉପକଣ୍ଠ ରାମାୟାଗୁଡା ଗ୍ରାମର ଏକ ଗୋଦାମରେ ବେଆଇନ ଭାବେ ବିପୁଳ ଗୁଟ୍ଖା ଗଚ୍ଛିତ ଥିବା କୌଣସି ସୂତ୍ରରୁ ଖବର ପାଇ ପୋଲିସ ଅଚାନକ ଚଢାଉ କରିଥିଲା । ତେବେ ଏହି ନକଲି ଗୁଟ୍ଖା କାରବାର ବହୁ ପରିମାଣରେ ଚାଲିଥିବା ବେଳେ ଏହା କେଉଁଠାରୁ ଆସୁଛି । କିପରି ବିଭିନ୍ନ ସ୍ଥାନର ଦୋକାନ ବଜାରକୁ ନିଆଯାଉଛି ସେ ନେଇ ଅଧିକ ତଦନ୍ତ ଜାରି ରହିଛି ବୋଲି କାଶୀନଗର ପୋଲିସ ଥନାର ଆଇଆଇସି ସୁଶାନ୍ତ କୁମାର ସାହୁ ଜଣାଇଛନ୍ତି ।
