ଗାଇକୁ ମାରି ଖାଇଲା ମହାବଳ ବାଘ

ପାରଳାଖେମୁଣ୍ଡି, (ତାରିଣୀ ପ୍ରସାଦ ପଣ୍ଡା ) : ଓଡିଶାର ହିମାଳୟ ଗଜପତିର ମହେନ୍ଦ୍ରଗିରି ସୀମାନ୍ତରେ ଆନ୍ଧ୍ରର ମାଣ୍ଡୁପିଲି ଗ୍ରାମରେ ପୁଣି ଗାଇକୁ ମାରି ଖାଇଲା ମହାବଳ ବାଘ. ଏନେଇ ପୁଣି ଓଡିଶାର ଗଜପତି ଓ ଗଞ୍ଜାମ ଜିଲ୍ଲା ଏବଂ ଆନ୍ଧ୍ରର ସ୍ୱୀକାକୁଲମ ଜିଲ୍ଲାର ସମ୍ପୃକ୍ତ ଅଞ୍ଚଳବାସିଙ୍କ ଠାରେ ପୁଣି ଆତଙ୍କ ଓ ଭୟ ଦେଖାଦେଇଛି. ଲୋକେ ଦିନ ହେଉ କିମ୍ବା ରାତି ହେଉ ବାହାରକୁ ବାହାରିବା ପାଇଁ ଭୟ କରୁଛନ୍ତି. ମହେନ୍ଦ୍ରଗିରି ପାଦଦେଶରେ ବର୍ତ୍ତମାନ ମହାବଳ ବାଘ ମାତିଥିବାରୁ ମହେନ୍ଦ୍ରଗିରି ପାଦ ଦେଶରେ ଥିବା ଗଜପତି, ଗଞ୍ଜାମ ଜିଲ୍ଲା ଓ ପଡୋଶୀ ଆନ୍ଧ୍ର ସ୍ୱୀକାକୁଲମ ଜିଲ୍ଲାର ଅନେକ ଛୋଟ ବଡ଼ ଗ୍ରାମ ରହିଛି. ସମ୍ପୃକ୍ତ ଗ୍ରାମ ଗୁଡିକରେ ବର୍ତ୍ତମାନ ଗଞ୍ଜାମ, ଗଜପତି ଓ ଆନ୍ଧ୍ର ସ୍ୱୀକାକୁଲମ ଜିଲ୍ଲାର ବନ ବିଭାଗ କର୍ମଚାରୀମାନେ ସଜାଗ ରହିବା ସହ ସମସ୍ତ ଅନୁଧ୍ୟାନ ଚଳାଇଛନ୍ତି. ଘଟଣାରୁ ପ୍ରକାଶ, ଓଡିଶା ଆନ୍ଧ୍ର ସୀମାନ୍ତର ଆନ୍ଧ୍ର ସ୍ୱୀକାକୁଲମ ଜିଲ୍ଲାର ମାଣ୍ଡୁପିଲି ଗ୍ରାମରେ ଗାଇକୁ ମାରି ଖାଇଛି.ଘଟଣାଟି ଗତ ବୁଧବାର ବିଳମ୍ବିତ ରାତିରେ ଘଟିଛି. ଗୁହାଳ ଘରେ ମହାବଳ ବାଘ ପଶି ଗାଇକୁ ଖାଇଥିବା ସୂଚନା ମିଳିଛି. ଘଟଣାଟି କାଞ୍ଚିଲି ଠାରୁ ତୁମ୍ବା ଯିବା ନିକଟସ୍ଥ ରାସ୍ତାରେ ଘଟିଥିବାର ସୂଚନା ମିଳିଛି. ମହେନ୍ଦ୍ରଗିରି ପାଦ ଦେଶରେ ବୁଲା ବୁଲି କରୁଛି ଏହି ମହାବଳ ବାଘ. ଏନେଇ ମହାବଳର ଗତିଵିଧି ଉପରେ ନଜର ରଖିଛି ଗଞ୍ଜାମ, ଗଜପତି ଉଭୟ ଜିଲ୍ଲାର ବନ ବିଭାଗ ଅଧିକାରୀ ଆନ୍ଧ୍ର ଅଧିକାରୀଙ୍କ ସହ ଆଲୋଚନା ଜାରି ରଖିଛି. ଲୋକଙ୍କୁ ସତର୍କ ରହିବାକୁ ଅନୁରୋଧ କରିଛି ବନ ବିଭାଗ. ବାଘ ପାହାଡିଆ ଅଞ୍ଚଳକୁ ଯିବାକୁ ଇଚ୍ଛା କରୁନଥିବା ଅଞ୍ଚଳବାସି ପ୍ରକାଶ କରି କହିଛନ୍ତି ଗ୍ରାମାଞ୍ଚଳରେ ବାଘକୁ ଗାଇ ଗୋରୁ ମାରି ଖାଇବା ପାଇଁ ମିଳୁଛି. ତେଣୁ ବାଘ ଜଙ୍ଗଲ ମଧ୍ୟକୁ ନ ଯାଇ ବିଭିନ୍ନ ଗ୍ରାମରେ ମାତି ଚାଲିଛି. ଏଠାରେ ସୂଚନାଯୋଗ୍ୟଯେ ଗତ କିଛି ଦିନ ତଳେ ମହେନ୍ଦ୍ରଗିରି ପାଦ ଦେଶର ଗଜପତି ଜିଲ୍ଲାର ସନ୍ତୋଷପୁର ଗ୍ରାମରେ ଏହି ମହାବଳ ବାଘଟି ପ୍ରଥମେ ଗୁହାଳ ମଧ୍ୟରୁ ବାଘକୁ ଟାଣି ନେଇ ଖାଇଥିଲା. ସମ୍ପୃକ୍ତ 2 ଘଟଣା ପରେ ଅଞ୍ଚଳବାସିଙ୍କ ଆଖିରୁ ନିଦ ହଜି ଯାଇଛି. ଆନ୍ଧ୍ର ଓ ଓଡିଶା ସରକାର ଓ ବନ ବିଭାଗ ଏହି ଘଟଣା ନେଇ ବିହିତ ପଦକ୍ଷେପ ଗ୍ରହଣ କରନ୍ତୁ ବୋଲି ଅଞ୍ଚଳବାସି ଦାବି କରିଛନ୍ତି.