ଗାଇଡ୍ ରାଜଲକ୍ଷ୍ମୀ ସାହୁ ଦିଦି ନଂ୧ ସମ୍ମାନରେ ସମ୍ମାନିତ
ଭୁବନେଶ୍ୱର, (ଓ୍ବାଇଏନ୍ଏସ୍) : ଓଡିଶା ରାଜ୍ୟ ଭାରତ ସ୍କାଉଟସ୍ ଏବଂ ଗାଇଡସ୍ର ଗାଇଡ୍ ଏବଂ ରମାଦେବୀ ମହିଳା ମହାବିଦ୍ୟାଳୟର ଛାତ୍ରୀ ରାଜଲକ୍ଷ୍ମୀ ସାହୁ ଜି.ସାର୍ଥକ ଟିଭି ତରଫରୁ ପ୍ରସାରିତ ପ୍ରତିଯୋଗିତାମୂଳକ କାର୍ଯ୍ୟକ୍ରମ “ଦିଦି ନଂ. ୧” ଦ୍ୱିତୀୟ ଭାଗରେ ପ୍ରଥମ ସ୍ଥାନ ହାସଲ କରିପାରିଛନ୍ତି । ଏହି କାର୍ଯ୍ୟକ୍ରମର ଚୂଡାନ୍ତ ପର୍ଯ୍ୟାୟରେ ବିଭିନ୍ନ ଜିଲ୍ଲାରୁ ୪ ଜଣ ପ୍ରତିଯୋଗୀ ଅଂଶଗ୍ରହଣ କରିଥିଲେ । ଏହି ପ୍ରତିଯୋଗିତାରେ ଖେଳ, ନୃତ୍ୟ, ସଂଗୀତ ଭଳି ବିଭିନ୍ନ ପ୍ରତିଯୋଗିତାମାନ ଅନୁଷ୍ଠିତ ହୋଇଥିଲା । ସେଥିରେ ଗାଇଡ୍ ରାଜଲକ୍ଷ୍ମୀ ସାହୁ ସମସ୍ତଙ୍କୁ ପଛରେ ପକାଇ ପ୍ରଥମ ସ୍ଥାନ ଅଧିକାର କରି ସୁନାର ଲକେଟ୍ ପାଇଥିଲେ । ଏହି ପୁରସ୍କାଟି ଅଭିନେତ୍ରୀ ଲିପି ମହାପାତ୍ରଙ୍କ ଦ୍ୱାରା ଦିଆଯାଇଥିଲା । ପୂର୍ବରୁ ରାଜଲକ୍ଷ୍ମୀ ବିଭିନ୍ନ ପ୍ରତିଯୋଗିତାରେ ଅଂଶଗ୍ରହଣ କରି ବିଭିନ୍ନ ପୁରସ୍କାର ଲାଭ କରିଛନ୍ତି । ସୁଶ୍ରୀ ରାଜଲକ୍ଷ୍ମୀ ଓଡିଶା ରାଜ୍ୟ ଭାରତ ସ୍କାଉଟସ୍ ଏବଂ ଗାଇଡ୍ସର କର୍ମଚାରୀ ତୀର୍ଥବାସୀ ସାହୁ ଏବଂ ପୁଷ୍ପଲତା ସାହୁଙ୍କ ଏକମାତ୍ର କନ୍ୟା ଅଟନ୍ତି ।
