ଗୋରୁ ଗାଡି ଜବତ, ୨ଗିରଫ

ଭଣ୍ଡାରିପୋଖରୀ, ( ଦୁର୍ଯ୍ୟଧନ ଲେଙ୍କା) : ଭଣ୍ଡାରିପୋଖରୀ ଥାନା ଭାରପ୍ରାପ୍ତ ଅଧିକାରୀ ମୃତ୍ୟୁଞ୍ଜୟ ପ୍ରଧାନଙ୍କ ନିର୍ଦେଶ କ୍ରମେ ଆଜି ଏକ ଗୋରୁ ଗାଡି ଜବତ ହୋଇଥିବା ଜଣାପଡିଛି । ଥାନା ଦେଇ ଯାଇଥିବା ୧୬ନଂ ଜାତୀୟ ରାଜପଥରେ ଦୈନିକ ଅନେକ ବେଆଇନ ଗୋରୁ ଗାଡି ଯାଉଥିବା ବେଳେ କେତେବେଳେ କେମିତି ଏହା ପୁଲିସ ହାବୁଡ଼ରେ ପଡୁଛି। ବିଶେଷ କରି ଖୋର୍ଦ୍ଧା, ନୟାଗଡ଼ ଠାରୁ ଆରମ୍ଭ କରି କଟକ , ଯାଜପୁର ଠାରେ ଥିବା ଗୋରୁ ହାଟରୁ ମାଫିଆ ମାନେ ଦୈନନ୍ଦିନ ଗୋରୁ ଆଣି ପଶ୍ଚିମବଙ୍ଗ ଓ ବାଲେଶ୍ଵରକୁ ଚାଲାଣ କରିଥାନ୍ତି । ଏଥିପାଇଁ ଥାନା ପକ୍ଷରୁ ଦୈନନ୍ଦିନ ପେଟ୍ରୋଲିଂ ହେଉଥିଲେ ସୁଦ୍ଧା ମାଫିଆ ମାନେ କିନ୍ତୁ ବିଭିନ୍ନ କୌଶଳ ଅବଲମ୍ବନ କରି ବେଆଇନ ଗୋରୁ ଗାଡିକୁ ରାଜପଥ ଦେଇ ଥାନା ସୀମା ପାର କରୁଛନ୍ତି । ସେ ଯାହାବି ହେଉ ଆଜି ଓଡ଼ି୨୯ ୭୬୬୮ ପିକଅପ ଗାଡିଟି ୪ଗୋଟି ଗୋରୁ ବୋଝେଇ କରି ଯାଉଥିବା ବେଳେ ପୁଲିସ କହରାପୋଖରୀ ଛକ ଠାରୁ ଏହାକୁ ଧରିଥିଲା। ଏହାସହିତ ଡ୍ରାଇଭର ପ୍ରବୀର ଦାସ ଓ ହେଲପର ପାପୁନି ଦାସକୁ ଗିରଫ କରାଯାଇ କୋର୍ଟ ପଠା ଯାଇଥିବା ଜଣାଯାଇଛି। ଏନେଇ ପୁଲିସ ୨୯୭/୨୧ରେ ମାମଲା ରୁଜ୍ଜୁ କରି ଜବତ ଗୋରୁ ଗୁଡିକୁ ମଇତାପୁର ଗୋଶାଳାକୁ ପଠାଇଥିବା ସୂଚନା ମିଳିଛି।