ଚୋରା ଲୁହା ପଥର ବୋଝେଇ ଟ୍ରକ ଜବତ, ୨ଗିରଫ
ଯୋଡା, (ସମୀର ଦାସ): କେନ୍ଦୁଝର ଜିଲା ଯୋଡା ଥାନା ଅନ୍ତର୍ଗତ ବାଂଶପାଣିଠାରୁ ରବିବାର ବିଳମ୍ବିତ ରାତିରେ ୨ଟି ଚୋରା ଲୁହା ପଥର ବୋଝେଇ ଟ୍ରକକୁ ଜବତ କରିବା ସହିତ ଏଥିରେ ସଂପୃକ୍ତ ୨ ଅଭିଯୁକ୍ତଙ୍କୁ ଗିରଫ କରିଥିବା ଜଣାପଡିଛି । ପୋଲିସ ସୂତ୍ରରୁ ଜଣା ପଡିଛି ଯେ, ଦଶ ଚକିଆ ଟ୍ରକ ନଂ ଓଆର୍୧୯କେ ୫୩୩୭ ଓ ୧୪ଚକ ବିଶିଷ୍ଟ ଟ୍ରକ ନଂ ୟୁପି୭୫ଏଟି ୫୬୭୮ ରେ ଚୋରା ଲୁହା ପଥର ବୋଝେଇ କରୁଥିବା ସମୟରେ ପୋଲିସ ଚଢାଉ କରି ଟ୍ରକ ଦ୍ୱୟକୁ ଜବତ କରିଥିଲା । ଚୋଢାଉ ବେଳେ ସେଠାରୁ ଖଣିଜ ଚୋରମାନେ ଫେରାର ହୋଇ ଯାଇଥିଲେ । ପୋଲିସ ଘଟଣାର ତଦନ୍ତ କରି ବିଭିନ୍ନ ସ୍ଥାନରେ ଚଢାଉ କରି ଏହି ଘଟଣାରେ ସଂପୃକ୍ତ ଥିବା ୨ ଅଭିଯୁକ୍ତଙ୍କୁ ଗିରଫ କରିଛି । ଅଭିଯୁକ୍ତମାନେ ହେଲେ ଢେଙ୍କାନାଳ ଜିଲା ସାନ୍ତରାପୁର ଗ୍ରାମର ଅଗାଧୁ ବିଶ୍ୱାଳ ଓ ଜଗତସିଂପୁର ଜିଲା ପର୍ଜନପୁର ଗ୍ରାମର ସ୍ମୃତିରଂଜନ ନାଏକ । ପୋଲିସ ୨ଟି ଟ୍ରକରୁ ପ୍ରାୟ ୧୪ ମେଟ୍ରିକ ଟନ୍ ଲୁହା ପଥର ଜବତ କରିଥିବା ସୂଚନା ଦେଇଛି । ଏ ନେଇ ଯୋଡା ଥାନାରେ କେସ୍ ନଂ ୫୬/୨୦୨୧ ରୁଜୁ କରି ଘଟଣାର ଅଧିକ ତଦନ୍ତ ଜାରି ରଖିଥିବା ଯୋଡା ଥାନା ଆଇଆଇସି ରାଇସେନ ମୁର୍ମୁ ସୂଚନା ଦେଇଛନ୍ତି ।
