ଜାତୀୟ ସଂହତି ଶିବିରରେ ଗ୍ରାମ୍ୟ ବଜାରର ମଜା ଉଠାଇଲେ ସ୍କାଉଟ ଗାଇଡ୍
ଖୋର୍ଦ୍ଧା ଜିଲ୍ଲା ବରୁଣେଇ ପୀଠ ସନ୍ନିକଟ ରାଜ୍ୟ ତାଲିମ କେନ୍ଦ୍ର ପରିସରରେ ଓଡିଶା ରାଜ୍ୟ ଭାରତ ସ୍କାଉଟସ୍ ଏବଂ ଗାଇଡସ୍ ତତ୍ୱାବଧାନରେ ଆୟୋଜିତ ଜାତୀୟ ସଂହତି ଶିବିରର ଆଜି ୧୪ ଦିନ ପ୍ରତ୍ୟୁଷରୁ ସ୍କାଉଟ ଓ ଗାଇଡ ନିଜ ନିଜର ନିତ୍ୟକର୍ମସାରି ରାମଧୂନ ସହ ପ୍ରଭାତ ଫେରି କରିଥିଲେ । ଗାନ୍ଧି ୧୫୦ ବର୍ଷ ପାଳନ ଅବସରରେ ଗୋଷ୍ଠୀ ସେବା କାର୍ଯ୍ୟକ୍ରମ ଅନୁଯାୟୀ ସ୍ଥାନୀୟ ବରୁଣେଇ ପୀଠ ସ୍ଥଳୀରେ ସଫେଇ କାର୍ଯ୍ୟ କରିଥିଲେ । ପରେ ପରେ ବିଧି ମୁତାବକ ପତାକା ଉତ୍ସବ ପର୍ବ ପରେ ବିଭିନ୍ନ ପ୍ରତିଯୋଗିତା ଯଥା ରଙ୍ଗୋଲି, ଗାନ୍ଧିଙ୍କ ଉପରେ ବକ୍ତୃତା ସହିତ ଅନ୍ତର୍ଜାତୀୟ କାର୍ଯ୍ୟକ୍ରମ ଶାନ୍ତିର ବାର୍ତ୍ତାବହ, ସସ୍ଟେନେବୁଲ ଡେଭଲପମେଣ୍ଟ ଗୋଲ୍ କାର୍ଯ୍ୟକ୍ରମ ଆଦିରେ ସ୍କାଉଟ ଗାଇଡ୍ମାନେ ନିୟୋଜିତ ହୋଇଥିଲେ । ଏଥିସହିତ ଗାନ୍ଧି ଜୀବନୀ ଉପରେ ଆଧାରିତ ଫଟୋ ପ୍ରଦର୍ଶନୀ ଏବଂ ଦୁଃସାହାସିକ କାର୍ଯ୍ୟକ୍ରମରେ ମଧ୍ୟ ଅଂଶଗ୍ରହଣ କରିଥିଲେ । ଅପରାହ୍ନ ୨ଘଟିକାରେ ଆରମ୍ଭ ହୋଇଥିଲା ଆକର୍ଷଣୀୟ ରଙ୍ଗୋଲି ପ୍ରତିଯୋଗିତା । ନିଜ ନିଜ ଜିଲ୍ଲାର ଶିବିରସ୍ଥଳ ନିକଟରେ ରଙ୍ଗ ବେରଙ୍ଗର ପ୍ରଦର୍ଶିତ ଝୋଟି ଚିତ୍ର ଶିବିର ପରିବେଶକୁ ଆହୁରି ଝଲସିତ କରିଥିଲା । ପରେ ପରେ ଖାଦ୍ୟର ସମାହାର ଏବଂ ଗ୍ରାମ୍ୟ ବଜାରର ଅଭିନବ ଦୃଶ୍ୟ ଶିବିରାର୍ଥୀମାନଙ୍କ ମଧ୍ୟରେ ଭିନ୍ନ ବାତାବରଣ ସୃଷ୍ଟି କରିଥିଲା । ପ୍ରତ୍ୟେକ ଜିଲ୍ଲାର ଭିନ୍ନ ଭିନ୍ନ ଖାଦ୍ୟ ଏବଂ ତତ୍ସହିତ ପାରମ୍ପରିକ ପୋଷାକ ପରିହିତ ଗ୍ରାମ୍ୟ ବଜାରର ଅନୁରୂପ ଝଲକ ଏକ ଭିନ୍ନ ଅବସ୍ଥା ସୃଷ୍ଟି କରିଥିଲା । ଆଜି ସନ୍ଧ୍ୟା ସମୟରେ ନୃତ୍ୟ ପ୍ରତିଯୋଗିତା ସବୁଠାରୁ ଥିଲା ବିଶେଷ ଆକର୍ଷଣ । ସାନ୍ଧ୍ୟ ଅଧିବେସନରେ ରାଜ୍ୟ ମୁଖ୍ୟ କମିଶନର ତଥା ଜାତୀୟ ଉପସଭାପତି ଡଃ କାଳିପ୍ରସାଦ ମିଶ୍ରଙ୍କ ଅଧ୍ୟକ୍ଷତାରେ ମୁଖ୍ୟ ଅତିଥିଭାବେ ଯୋଗଦେଇଥିଲେ ଶ୍ରୀ ପ୍ରଦୀପ କୁମାର ବିଶ୍ୱାଳ, ସ୍ୱତନ୍ତ୍ର ସଚିବ, ଅର୍ଥବିଭାଗ ।
ରାଜ୍ୟ ମୁଖ୍ୟ କମିଶନର ଡଃ ମିଶ୍ର ଅତିଥିଙ୍କୁ ସ୍ୱାଗତ କରି ସଂହତି ଶିବିରର ଉପାଦେୟତା ତଥା ଏହି ଶିବିର ପ୍ରତ୍ୟେକ ଜିଲ୍ଲାରେ ଆୟୋଜିତ ହୋଇ ସଂହତି ରକ୍ଷାର ବାର୍ତ୍ତା ପ୍ରଚାର ନିମନ୍ତେ ଉଦିଷ୍ଟ ବୋଲି ଅବଗତ କରିଥିଲେ । ମୁଖ୍ୟ ଅତିଥି ଶ୍ରୀଯୁକ୍ତ ବିଶ୍ୱାଳ ରାଜ୍ୟ ସଂଗଠନର ଏଭଳି ଭବ୍ୟ ଶିବିରର ଆୟୋଜନକୁ ଉଚ୍ଚ ପ୍ରଶଂସା କରିବା ସହିତ ସଦାସର୍ବଦା ଏହିଭଳି କାର୍ଯ୍ୟକ୍ରମ ମାଧ୍ୟମରେ ଛାତ୍ରଛାତ୍ରୀମାନଙ୍କୁ ଉପଯୁକ୍ତ ନାଗରିକ ଭାବେ ଗଢ଼ିତୋଳିବାର ପ୍ରୟାସ ଜାରି ରଖି ହୃଦୟରେ ଭାଇଚାରାର ଭାବ ଉଦ୍ରେକ କରିବାର ଗୁରୁତ୍ୱ ବହନ କରୁଛି ବୋଲି ମତବ୍ୟକ୍ତ କରିଥିଲେ । ସ୍କାଉଟ ଓ ଗାଇଡ୍ମାନଙ୍କ ଦ୍ୱାରା ଉଚ୍ଚକୋଟିର ନୃତ୍ୟ ପ୍ରଦର୍ଶନ ଅତିଥିଙ୍କୁ ବିଳମ୍ବିତ ରାତ୍ରି ପର୍ଯ୍ୟନ୍ତ ବାନ୍ଧି ରଖିଥିଲା ।
