ଦୁର୍ଘଟଣା ରେ ଠିକାଦାରଙ୍କ ମୃତ୍ୟୁ ମାମଲା

ଦିଗପହଣ୍ଡି, (ଯୁଗାବ୍ଦ ନ୍ୟୁଜ):ଦିଗପହଣ୍ଡି ପୋଲିସ ଗୁରୁବାର କନ୍ଧମାଳ ଜିଲା ଦାରିଙ୍ଗୀବାଡ଼ି ଥାନା ସିପୁବାଡ଼ି ଗ୍ରାମର ଗାଡ଼ି ଚାଳକ ପିତର ପ୍ରଧାନ ଙ୍କୁ ଗିରଫ କରି ଥାନା ମାମଲା ନଂ.୩୦୭/୨୩ ଅନୁଯାୟୀ କୋର୍ଟ ଚାଲାଣ କରିଛନ୍ତି।ଗତ କାଲି ଅପରାହ୍ନ ପ୍ରାୟ ସାଢେ ୪ ଟାରେ ଦିଗପହଣ୍ଡି ସହର ଉପକଣ୍ଠ ଏନ୍ ଏ ସି ତନଖି ଫାଟକ ନିକଟରେ ମହାଲକ୍ଷ୍ମୀ ନାମକ ଏକ ଯାତ୍ରୀବାହୀ ବସ୍ ଧକ୍କା ଦେବାରୁ  ବାଇକ୍ ଆରୋହୀ   ସାନଖେମୁଣ୍ଡି ବ୍ଲକ ଭାଲିଆ ଝୋଳା ଗ୍ରାମର ଶ୍ରମିକ ଠିକାଦାର ମହେଶ୍ବର ବାଡ଼ତ୍ୟା ଙ୍କ ମୃତ୍ୟୁ ଘଟିଥିଲା।ମହେଶ୍ବର ତାଙ୍କ ବାଇକ୍ ନଂ. ( ଓଡି ୦୭ ଏ ଏନ୍  ୬୩୭୧) ଯୋଗେ   ଯାଉଥିବା ସମୟରେ ବିପରୀତ ଦିଗରୁ ବ୍ରହ୍ମପୁର ରୁ କନ୍ଧମାଳ ଜିଲା ବ୍ରାହ୍ମଣୀ ଗାଁ ଅଭିମୁଖେ ଦ୍ରୁତ ଗତିରେ ଆସୁଥିବା ମହାଲକ୍ଷ୍ମୀ ବସ୍ ନଂ. ( ଓ ଆର୍ ୦୭ ଡବ୍ଲ୍ଯୁ ୪୮୦୫ ) ବାଇକକୁ ଧକ୍କା ଦେଇଥିଲା। ସେ ତଳେ କଚାଡି ହୋଇ ପଡ଼ିଥିଲେ।ତାଙ୍କୁ ଗୁରୁତର ଅବସ୍ଥାରେ ଦିଗପହଣ୍ଡି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ରେ ଭର୍ତ୍ତି କରାଯାଇଥିଲା। ସେଠାରେ ଉପସ୍ଥିତ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଅଭିଯୁକ୍ତ ଗାଡ଼ି ଚାଳକ ପିତର ଫେରାର ହୋଇଯାଇଥିଲେ।