ଦୋକାନୀଙ୍କୁ ଆକ୍ରମଣ ସହ ଦୋକାନ ଏବଂ ଗାଡ଼ିକୁ ଭଙ୍ଗାରୁଜା

ଦିଗପହଣ୍ଡି,(ଅଳକ ନାଥ ମିଶ୍ର):ଦିଗପହଣ୍ଡି ଥାନା ଅନନ୍ତେଇ ଗ୍ରାମର ହରିହର ପାତ୍ର ନାମକ ଜଣେ ଦୋକାନୀ ଙ୍କୁ ଗ୍ରାମର ପଙ୍କଜ ପାତ୍ର ଶନିବାର ସକାଳ ପ୍ରାୟ ୮ ଟାରେ ଆକ୍ରମଣ କରିଛନ୍ତି। ଗ୍ରାମର ନୂଆସାହି ରେ ରାସନ ଦୋକାନ କରିଥିବା ହରିହର ଦୋକାନରେ ବସିଥିବା ବେଳେ  ପଙ୍କଜ ତାଙ୍କୁ ଏକ ଲୁହାଛଡ଼ ରେ ଆକ୍ରମଣ କରିବା ସହ ତାଙ୍କ ଦୋକାନ ରେ ପଶି ବ୍ୟାପକ ଭଙ୍ଗାରୁଜା କରିଥିବା ଅଭିଯୋଗ ହୋଇଛି।ଏପରିକି ଦୋକାନ ସମ୍ମୁଖରେ ଥିବା ତାଙ୍କ ଟିଭିଏସ ଏକ୍ସଲ ମୋପେଡ (ନଂ.ଓଆର ୦୭ ଏକ୍ସ- ୧୬୫୬) କୁ ପଙ୍କଜ ଲୁହାଛଡ଼ ରେ ପିଟି ଭାଙ୍ଗି ଦେଇଛି।ଏନେଇ ସେ ଦିଗପହଣ୍ଡି ଥାନାରେ ଏତଲା ଦେଇଥିବା କହିଛନ୍ତି। ପଙ୍କଜ ହାତରେ ଏକ ଲୁହାଛଡ଼ ଧରି ତାଙ୍କ ଦୋକାନ ସମ୍ମୁଖରେ ପହଞ୍ଚିବାସହ ତାଙ୍କୁ ଅଶ୍ଳିଳ ଭାଷାରେ ଗାଳି କରିବା ସହ ଅତର୍କିତ ଭାବେ ତାଙ୍କ ମୁଣ୍ଡକୁ ଲକ୍ଷ୍ୟକରି ଲୁହାଛଡ଼ ରେ ପ୍ରହାର ପକାଇଥିଲା।ସେ ଘୁଞ୍ଚି ଯିବାରୁ ଅଳ୍ପକେ ବର୍ତ୍ତି ଯାଇଥିଲେ। ତାଙ୍କ ବାମହାତ ପାପୁଲି କୁ ମାଡ଼ ହେବାରୁ ସେ ପ୍ରାଣ ଭୟରେ ଭାଗିରଥି ଗୌଡ଼ ଙ୍କ ଘର ମଧ୍ୟକୁ ଦୌଡ଼ି ଯାଇ ଜୀବନ ରକ୍ଷା କରିଥିଲେ। ପରେ ପଙ୍କଜ ତାଙ୍କ  ଦୋକାନ ଭଙ୍ଗାରୁଜା କରିବା ସହ ମୋପେଡ କୁ ବାଡେଇ ଭାଙ୍ଗି ଦେଇଥିବା ପୁଲିସ କୁ ଜଣାଇଛନ୍ତି।ପୂର୍ବରୁ ପଙ୍କଜ ତାଙ୍କୁ ଦୋକାନ ବନ୍ଦ କରିବାକୁ ଧମକ ଦେବାସହ ନିଆଁ ଲଗାଇ ଦୋକାନ ଜାଳି ଦେବାକୁ ଚେତାବନୀ ଦେଇଥିବା ଏତଲାରେ ଉଲ୍ଲେଖ ରହିଛି।ପୁଲିସ ଏତଲା ରଖି ଘଟଣାର ତଦନ୍ତ ବଦଳରେ ଅଭିଯୁକ୍ତ ପଙ୍କଜ ସହ ଆପୋଷ ସମାଧାନ ପାଇଁ ବାଧ୍ୟ କରୁଥିବା ସେ ସଙ୍ଗୀନ ଅଭିଯୋଗ କରିଛନ୍ତି। ପୁଲିସ  ପଙ୍କଜ ଙ୍କୁ ଥାନାକୁ ଡ଼କାଇ ହରିହର ଙ୍କ ନାଁ ରେ ପାଲଟା ଏତଲା ଦେବାକୁ ପ୍ରବର୍ତ୍ତାଇବା ହରିହର ଙ୍କ ଝିଅ  ଜଣାଇଛନ୍ତି। ଥାନାରେ ପୁଲିସ ର ଏଭଳି କାର୍ଯ୍ୟକଳାପ କୁ ଗ୍ରାମବାସୀ ନିନ୍ଦା କରିଛନ୍ତି।ହରିହର ଏବଂ ତାଙ୍କ ପରିବାର ଲୋକେ ଘଟଣାରେ ଭୟଭୀତ ହୋଇପଡ଼ିଛନ୍ତି ।ଘଟଣାର ନିରପେକ୍ଷ ତଦନ୍ତ ପାଇଁ ବ୍ରହ୍ମପୁର ଏସ.ପି ଦୃଷ୍ଟି ଦେବାକୁ ସାଧାରଣରେ ଦାବି ହୋଇଛି। ଏନେଇ ଦିଗପହଣ୍ଡି ଥାନା ଆଇଆଇସି ଦାୟିତ୍ୱରେ ଥିବା ଏସ.ଆଇ ଜ୍ୟୋତି ରଞ୍ଜନ ବେହେରାଙ୍କୁ ପଚାରିବାରୁ ହରିହର ପଙ୍କଜ ଙ୍କ ଜାଗା ରେ ଦୋକାନ କରିଛନ୍ତି।ବାରମ୍ବାର କହିବା ସତ୍ତ୍ୱେ ଦୋକାନ ଖାଲି କରୁନାହାନ୍ତି।ସକାଳେ ଏହାକୁ ନେଇ ଉଭୟଙ୍କ ମଧ୍ୟରେ ବଚସା ହୋଇ ଝଗଡା ହୋଇଥିଲା।ଏନେଇ ୨ ପକ୍ଷ ଏତଲା ଦେଇଛନ୍ତି।ଏତଲାକୁ ଭିତ୍ତିକରି ତଦନ୍ତ ଚାଲିଥିବା କହିଛନ୍ତି।