ପନ୍ଦାଡୋରେ ଦୁଇ ଯୁବକଙ୍କୁ ମରଣାନ୍ତକ ଆକ୍ରମଣ

ହାଟଡିହି, (ବିକାଶ ବିଶ୍ୱାଳ):ହାଟଡିହି ବ୍ଲକ ପନ୍ଦାଡୋ ଗ୍ରାମରେ ଗତକାଲି ରାତିରେ ଦୁଇ ଯୁବକଙ୍କୁ ମରଣାନ୍ତକ ଆକ୍ରମଣ ହୋଇଛି। ଏନେଇ ସେମାନଙ୍କ ପରିବାର ଲୋକେ ଥାନାରେ ଅଭିଯୋଗ କରିଛନ୍ତି। ସେମାନଙ୍କ ଅଭିଯୋଗ ଅନୁଯାୟୀ ଗ୍ରାମର ରାଜୁ ଯେନା ଓ ରଞ୍ଜନ ଯେନା ସଢା ଛକରୁ ପରିବାପତ୍ର ଧରି ଘରକୁ ଫେରିବା ସମୟରେ ପନ୍ଦାଡୋ ଗାଁ ମୁଣ୍ଡରେ ଥିବା ଏକ ପାନ ଦୋକାନ ପାଖରେ ଠିଆହୋଇ ପାନ କିଣିବା ସମୟରେ ତେନ୍ତୁଳିପଦି ଗ୍ରାମର ଜଗନ୍ନାଥ ସ୍ୱାଇଁ ଓ ଅର୍ଜୁନ ବରାଳଙ୍କ ସହିତ କୌଣସି କାରଣକୁ ନେଇ ପାଟିତୁଣ୍ଡ ହୋଇଥିଲା। ଜଗନ୍ନାଥ ଓ ଅର୍ଜୁନ ସେମାନଙ୍କୁ ଲୁହା ରଡ଼ରେ ଆକ୍ରମଣ କରିବାରୁ ରାଜୁ ଯେନାଙ୍କ ହାତ ଭାଙ୍ଗିଯାଇଥିବା ବେଳେ ମୁଣ୍ଡରେ ଗଭୀର ଆଘାତ ଲାଗିଥିଲା। ସେ ତଳେ ପଡ଼ିଥିବା ବେଳେ ସ୍ଥାନୀୟ ଜଣେ ଯୁବକ ରାଜୁକୁ ଆନନ୍ଦପୁର ଡାକ୍ତରଖାନା ନେଇଥିଲେ। ଏହି ସମୟରେ ରଂଜନ ଦୌଡ଼ି ପଳାଇ ଆସିବାକୁ ଉଦ୍ୟମ କରୁଥିବା ବେଳେ ଆକ୍ରମଣକାରୀ ମାନେ ରଞ୍ଜନକୁ ପିଟି ପିଟି ଗାଁ କୁ ନେଇଯାଇ ବାନ୍ଧି ପକାଇ ନିସ୍ତୁକ ମାଡ ମାରିଥିଲେ। ଖବରପାଇ ପନ୍ଦାଡୋ ଗ୍ରାମର କିଛି ଭଦ୍ରବ୍ୟକ୍ତି ତେନ୍ତୁଳିପଦି ଗ୍ରାମରେ ପହଞ୍ଚି ରଞ୍ଜନକୁ ଉଦ୍ଧାର କରିବା ସହ ଆମ୍ବୁଲାନ୍ସ ଯୋଗେ ଡାକ୍ତରଖାନା ପଠାଇଥିଲେ। ରାଜୁ ର ଅବସ୍ଥା ସଂକଟାପର୍ଣ୍ଣ ଥିବାରୁ ତାଙ୍କୁ କଟକ ସ୍ଥାନାନ୍ତର କରାଯାଇଛି। ରଂଜନ ଆନନ୍ଦପୁର ଉପଖଣ୍ଡ ଚିକିତ୍ସାଳୟରେ ଚକିତ୍ସିତ ହେଉଛନ୍ତି। ଏନେଇ ଆଜି ଅପରାହ୍ନ ୪ଟା ବେଳେ ରଞ୍ଜନ ର ବାପା ଜୀବନ ପ୍ରସାଦ ଯେନା ସୋସୋ ଥାନାକୁ ଯାଇ ଥାନାରେ ଲିଖିତ ଅଭିଯୋଗ କରିଛନ୍ତି। ସୋସୋ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି।