ପେଟ୍ରୋଲିଂ ବେଳେ ୪ଯୁବକ ଗିରଫ ବନ୍ଧୁକ ଓ ଗୁଳି ଜବତ

ଭଞ୍ଜନଗର,(ସନ୍ତୋଷ କୁମାର ଜେନା) : ଭଞ୍ଜନଗର ପୁଲିସ୍ ପେଟ୍ରୋଲିଂ କରୁଥିବା ସମୟରେ ଫିସେରୀ କାର୍ଯ୍ୟାଳୟ ନିକଟରୁ ୪ ଜଣ ଯୁବକଙ୍କୁ ଗିରଫ କରିବା ସହ ସେମାନଙ୍କ ନିକଟରୁ ଗୋଟିଏ ଗୁଳି ଓ ବନ୍ଧୁକ ଜବତ କରିଥିବା ଥାନା ଅଧିକାରୀ ଜୀବନାନନ୍ଦ ଜେନା ସୂଚନା ଦେଇଛନ୍ତି। ଗିରଫ ଅଭିଯୁକ୍ତ ମାନେ ହେଲେ ଭଞ୍ଜନଗର ବାଞ୍ଛେୀଶ୍ବର ନଗରର ବବୁଲ ନାଇକ, ଆକାଶ ନାଇକ, ଲଣ୍ଡେଇ ସାହିର ପ. ରୁଦ୍ରମଣି ରେଡ୍ଡି, ତାରସିଂ ଥାନା ଢୋଲପିଟା ଗ୍ରାମର ରଞ୍ଜନ ନାଇକ। ପୁଲିସର ସୂଚନା ଅନୁଯାୟୀ, ଅଭିଯୁକ୍ତ ମାନେ ଫିସେରୀ କାର୍ଯ୍ୟାଳୟ ନିକଟରେ ରହିଥିବା ବେଳେ ପୁଲିସ୍ ପେଟ୍ରୋଲିଂ ସମୟରେ ସନ୍ଦିଗ୍ଧ ଭାବେ ଏମାନେ ବସି ରହିଥିବା ଦେଖି ପଚରାଉଚୁରା କରିବା ସହ ଯାଞ୍ଚ କରିବା ସମୟରେ ଅଭିଯୁକ୍ତ ବବୁଲ ନିକଟରୁ ଗୋଟିଏ ବନ୍ଧୁକ ଓ ଗୁଳି ଜବତ ହୋଇଥିଲା। ଅଭିଯୁକ୍ତ ମାନେ ଆଖପାଖ ଅଞ୍ଚଳରେ ଲୋକ ମାନଙ୍କ ଭୟଭୀତ କରିବା ଉଦ୍ଦେଶ୍ୟରେ ଏହାକୁ ପାଖରେ ରଖିଥିବା ବେଳେ ଆଗାମୀ ଦିନରେ କିଛି ବି ଅଘଟଣ ଘଟାଇବା ଆଶଙ୍କାରେ ପୁଲିସ୍ ସେମାନଙ୍କୁ ଗିରଫ କରିବା ସହ କେସ୍ ନମ୍ବର ୩୪୨ରେ ଏକ ମାମାଲା ରୁଜୁ କରି ଆଜି କୋର୍ଟ ଚାଲାଣ କରିଥିବା ଥାନା ଅଧିକାରୀ ଶ୍ରୀ ଜେନା ପ୍ରକାଶ କରିଛନ୍ତି। ବର୍ତ୍ତମାନ ବିଭିନ୍ନ ସ୍ଥାନରେ ଚୋରୀ ବୃଦ୍ଧି ପାଇଥିବା ବେଳେ ଦଣ୍ଡନାଚ ସମୟରେ ଆଇନ ଶୃଙ୍ଖଳାକୁ ଦୃଷ୍ଟିରେ ରଖି ପୁଲିସ୍ ପକ୍ଷରୁ ଯାଞ୍ଚ କଡକଡି କରାଯାଇଥିବା ସେ ପ୍ରକାଶ କରିଛନ୍ତି। ଅସାମାଜିକ କାର୍ଯ୍ୟକଳାପକୁ ଦମନ କରିବା ପାଇଁ ସ୍ବତନ୍ତ୍ର ଭାବେ ଅଭିଯାନ ଚାଲିଥିବା ବେଳେ ଏଭଳି ବେଆଇନ କାର୍ଯ୍ୟକଳାପରେ ଲିପ୍ତ ଥିବା ବ୍ୟକ୍ତଙ୍କ ବିରୋଧରେ ପୁଲିସ୍ କଡା ଆଭିମୁଖ୍ୟ ଗ୍ରହଣ କରିବ ବୋଲି ଜେନା ପ୍ରକାଶ କରିଛନ୍ତି।