ପୋଲିସ କର୍ମଚାରୀଙ୍କ ସହ ୨ କୋଲକାତା ଫେରନ୍ତାଙ୍କୁ କରୋନା

ଯୋଡ଼ା,(ସମୀର କୁମାର ଦାସ): କେନ୍ଦୁଝର ଜିଲା ଯୋଡା ସହରରେ ଶନିବାର ୩ ଜଣ ପୁରୁଷ କରୋନାରେ ଆକ୍ରାନ୍ତ ହୋଇଥିବା ପୌର ପ୍ରଶାସନ ପକ୍ଷରୁ ସୂଚନା ମିଳିଛି । ପୌରପାଳିକାର ସୂଚନାନୁଯାୟୀ , ଯୋଡା ଥାନାର ଜଣେ ୩୦ ବର୍ଷ ବୟସର ପୋଲିସ ଅଫିସର କରୋନାରେ ଆକ୍ରାନ୍ତ ହୋଇଛନ୍ତି । ସେ କରୋନାରେ ଆକ୍ରାନ୍ତ ହୋଇଥିବା ଜଣାପଡିବା ପରେ ତାଙ୍କୁ ଯୋଡା ଟାଟାଷ୍ଟିଲ କୋଭିଡ୍ ଡାକ୍ତରଖାନାରେ ଭର୍ତି କରାଯାଇଛି । କରୋନା ଲକ୍ଷଣ ଜାଣିବା ପରେ ଗତ ୫ ଦିନ ଧରି ସେ ଘରେ ସଂଗରୋଧରେ ରହିଆସୁଥିଲେ । ସେହିପରି କୋଲକାତାରୁ ଫେରିଥିବା ଅନ୍ୟ ୨ ଜଣ ବ୍ୟକ୍ତି କରୋନାରେ ଆକ୍ରାନ୍ତ ହୋଇଛନ୍ତି । ଜଣେ ବ୍ୟକ୍ତିଙ୍କ ବୟସ ୩୧ ଓ ଅନ୍ୟ ଜଣେ ବ୍ୟକ୍ତିଙ୍କ ବୟସ ୨୭ ବର୍ଷ । ଏହି ଦୁଇ ଜଣ ବ୍ୟକ୍ତି ଗତ ୧୬ ତାରିଖରୁ ଯୋଡା ପୌରପାଳିକାର ବୃଦ୍ଧାଶ୍ରମ ସଂଗରୋଧ କେନ୍ଦ୍ରରେ ଓ ୧୯ ତାରିଖଠାରୁ ଶାସ୍ତ୍ରୀନଗର କୋଭିଡ୍ କେୟାର ରେ ରହୁଥିଲେ । କରୋନା ପଜିଟିଭ ରିପୋର୍ଟ ଆସିବା ପରେ ସେମାନଙ୍କୁ ଯୋଡା ଟାଟାଷ୍ଟିଲ କୋଭିଡ୍ ଡାକ୍ତରଖାନାକୁ ନିଆଯାଇଛି ।