ପ୍ରବାସୀ କଳରବ

ଶୀତ ଆସିଗଲା
ପକ୍ଷୀ ଆସିଗଲେ
ନିଳାମ୍ବୁ ଚିଲିକା ବକ୍ଷେ,
ପଥଶ୍ରମ କଥା
ଭାଗ ବାଣ୍ଟୁ ବାଣ୍ଟୁ
ପରିଚୟପତ୍ର ଦେଖେ ।

କିଏ କହୁଥାଏ
ଉତ୍ତର ଗୋଲାର୍ଦ୍ଧ
ସାଇବେରିଆରେ ଘର,
ଆଉ କିଏ କହେ
ବୈକାଲ ହ୍ରଦ
ଆରବ ସାଗର ତାର ।

ଋଷିଆରୁ କିଏ
ମଙ୍ଗୋଲିଆ କିଏ
ଆସିଛି ହିମାଳୟରୁ,
ଲଦାଖ ଅଞ୍ଚଳୁ
କେନ୍ଦ୍ର ଏସିଆରୁ
କାସ୍ପିଆନ ସାଗରରୁ ।

ବରଫ ପାତରେ
ଖାଦ୍ଯର ଅଭାବ
ଆସିଲୁ ପ୍ରବାସେ ଉଡି,
ଦିନାକେତେ ରହି
ଅନୁଭୂତି ନେଇ
ସ୍ବବାସେ ଯିବୁ ବାହୁଡି ।

ସୁଖ ଦୁଃଖ ବାଣ୍ଟି
ଆନନ୍ଦେ ଖେଳନ୍ତି
ଚିଲିକା ନୀଳ ଜଳରେ,
କଙ୍କଡ଼ା ଚିଙ୍ଗୁଡି
ମାଛ ଶୈବାଳକୁ
ଖାଆନ୍ତି ଖୁସି ମନରେ ।

ହର୍ସ ଉଲ୍ଲାସରେ
ଭ୍ରମଣ କରନ୍ତି
ନୀଳଜଳ ରାଶି ପରେ,
ପ୍ରଜନନ ସୁଖ
ସାଉଁଟି ଫେରିବେ
ରଖି ମନେ ଗୋପନରେ ।

ଚାହୁଁ ଚାହୁଁ ଶୀତ
ଋତୁ ଚାଲିଯିବ
ଖରାଯିବ ଧିରେ ବଢି,
ପ୍ରବସୀ ପକ୍ଷୀଏ
କଳରବ କରି
ଉଡି ଯିବେ ଧାଡି ଧାଡି ।

ଗଦାଧର ସାହୁ,
କଙ୍କଡ଼ାଦ୍ଵୀପ,ବ୍ରହ୍ମଗିରି,ପୁରୀ