ଫାରୁକ୍ଙ୍କ ମୁକ୍ତି ପାଇଁ ସୁପ୍ରିମକାର୍ଟ ଗଲେ ଭାଇକୋ
ନୂଆଦିଲ୍ଲୀ,-(ପି.ଟି.): ସମ୍ବିଧାନର ଅନୁଚ୍ଛେଦ ୩୭୦ ଉଚ୍ଛେଦ ପରେ ଗୃହବନ୍ଦୀ ଥିବା ଜମ୍ମୁ-କଶ୍ମୀରର ପୂର୍ବତନ ମୁଖ୍ୟମନ୍ତ୍ରୀ ଫାରୁକ୍ ଅବ୍ଦୁଲ୍ଲାଙ୍କୁ ମୁକ୍ତ କରିବା ପାଇଁ ବୁଧବାର ରାଜ୍ୟସଭା ସଦସ୍ୟ ତଥା ଏମ୍ଡିଏମ୍କେ ଅଧ୍ୟକ୍ଷ ଭାଇକୋ ସୁପ୍ରିମକାର୍ଟଙ୍କ ଦ୍ୱାରସ୍ଥ ହୋଇଛନ୍ତି । କେନ୍ଦ୍ର ସରକାର ଓ ଜମ୍ମୁ-କଶ୍ମୀର ପ୍ରଶାସନ ଅବ୍ଦୁଲ୍ଲାଙ୍କୁ ବେଆଇନ ଭାବେ ଗୃହବନ୍ଦୀ ରଖିଥିବା ଦର୍ଶାଇ ତାଙ୍କୁ କୋର୍ଟରେ ହାଜର କରିବା ପାଇଁ ନିର୍ଦ୍ଦେଶ ଦେବାକୁ ସେ ଅନୁରୋଧ କରିଛନ୍ତି । ଚେନ୍ନାଇରେ ଆସନ୍ତା ୧୫ରେ ହେବାକୁ ଥିବା ତାମିଲନାଡ଼ୁର ପୂର୍ବତନ ମୁଖ୍ୟମନ୍ତ୍ରୀ ସି.ଏନ୍. ଆନ୍ନାଦୁରାଇଙ୍କ ଜୟନ୍ତୀ ଅବସରରେ ହେବାକୁ ଥିବା ଶାନ୍ତିପୂର୍ଣ୍ଣ ଓ ଗଣତାନ୍ତ୍ରିକ ବାର୍ଷିକ ସମ୍ମିଳନୀରେ ଯୋଗଦେବା ପାଇଁ ନ୍ୟାଶନାଲ୍ କନ୍ଫରେନ୍ସ (ଏନ୍ସି) ଅଧ୍ୟକ୍ଷ ଅବ୍ଦୁଲ୍ଲାଙ୍କୁ ଅନୁମତି ପ୍ରଦାନ କରାଯାଉ ବୋଲି ଭାଇକୋ ତାଙ୍କ ପିଟିଶନ୍ରେ ଉଲ୍ଲେଖ କରିଛନ୍ତି ।
