ଫେବୃୟାରୀ ୨୮ରୁ କେନ୍ଦୁଝରରେ ଅବାସିକ ନାଟ୍ୟ କର୍ମଶାଳା “କାଉଁରୀକଳା ରଙ୍ଗ ଆଖଡ଼ା”
ଭୁବନେଶ୍ୱର, (ଯୁଗାବ୍ଦ ନ୍ୟୁଜ):କେନ୍ଦ୍ର ସଙ୍ଗୀତ ନାଟକ ଏକାଡ଼େମୀ, ଭାରତ ସରକାରଙ୍କ ପକ୍ଷରୁ ଏକ ଜାତୀୟସ୍ତରୀୟ ନାଟ୍ୟ କର୍ମଶାଳା “କାଉଁରୀକଳା ରଙ୍ଗ ଆଖଡ଼ା” ଫେବୃୟାରୀ ୨୮ ତାରିଖରୁ କେନ୍ଦୁଝର ଜିଲ୍ଲା ସଦର ବ୍ଲକରେ ଥିବା ଏକ ବନବାସୀ ବହୁଳ କାଉଁରୀ କଳା ଗ୍ରାମରେ ଅନୁଷ୍ଠିତ ହେବ । ଭାରତୀୟ ସଂସ୍କୃତି ପରମ୍ପରା ଉପରେ କାର୍ଯ୍ୟ କରୁଥିବା ଏକ ଅଖିଳ ଭାରତୀୟ ସଂଗଠନ “ଆଦିମ୍-ସଂସ୍କୃତି”ର ପ୍ରତ୍ୟକ୍ଷ ତତ୍ତ୍ୱାବଧାନରେ ୩୦ ଦିନ ବ୍ୟାପୀ ହେବାକୁ ଥିବା ଏହି ଆବାସିକ ନାଟ୍ୟ କର୍ମଶାଳାର ନିର୍ଦ୍ଦେଶକ ଭାବରେ ଜାତୀୟ ଏବଂ ଆନ୍ତର୍ଜାତୀୟସ୍ତରରେ ସୁନାମ ଅର୍ଜନ କରିଥିବା ନାଟ୍ୟକାର, ନିର୍ଦ୍ଦେଶକ ତଥା ନାଟ୍ୟ ପ୍ରଶିକ୍ଷକ ଦିନେଶ ଦାସ ଏବଂ ସଂଯୋଜକ ଭାବରେ ଡଃ ରୁଦ୍ରମଣି ପାତ୍ରଙ୍କୁ କେନ୍ଦ୍ର ସଙ୍ଗୀତ ନାଟକ ଏକାଡ଼େମୀ, ଭାରତ ସରକାରଙ୍କ ପକ୍ଷରୁ ସ୍ଥିର କରାଯାଇଛି । ଏଥି ସହିତ ବିଭିନ୍ନ କ୍ଷେତ୍ରରେ ଉତ୍କର୍ଷତା ଲାଭ କରିଥିବା ବ୍ୟକ୍ତିବିଶେଷ ଓ ଦିଲ୍ଲୀ ଏବଂ କୋଲକତାରୁ ମଧ୍ୟ ପ୍ରଶିକ୍ଷକମାନେ ଏହି କର୍ମଶାଳାରେ ଯୋଗ ଦେବାର କାର୍ଯ୍ୟକ୍ରମ ରହିଛି । ଏହି କର୍ମଶାଳାରେ କେବଳ କନ୍ଦୁଝର ଜିଲ୍ଲାର ମୋଟ ୩୦ଜଣ ପ୍ରଶିକ୍ଷାର୍ଥିୀଙ୍କୁ ତାଲିମ ପ୍ରଦାନ କରାଯିବ । ସମ୍ପୂର୍ଣ୍ଣ ଭାବେ ନିରକ୍ଷର କିମ୍ବା ନାମମାତ୍ର ସାକ୍ଷର ତଥା ଆର୍ଥିକ ଅନଗ୍ରସର ବନବାସୀ ସମାଜ କୈଶୋର ଅବସ୍ଥାରେ ଥିବା ପିଲମାନଙ୍କ ପାଇଁ ଏହି ନାଟ୍ୟ କର୍ମଶାଳାରେ ବିଶେଷ ବ୍ୟବସ୍ଥା କରାଯାଇଛି । ନାଟ୍ୟକର୍ମ ସହିତ ନୃତ୍ୟ, ସଙ୍ଗୀତ, ଚିତ୍ରକଳା, ମୁଖା ପ୍ରସ୍ତୁତି ଆଦି ପ୍ରାୟ ସମସ୍ତ ଆନୁସଙ୍ଗିକ ବିଭାଗ ସମ୍ପର୍କରେ ସେମାନଙ୍କୁ ପ୍ରଶିକ୍ଷକମାନଙ୍କ ଦ୍ୱାରା ତାଲିମ ପ୍ରଦାନ କରାଯିବ । ପ୍ରଶିକ୍ଷଣ ପରେ ପ୍ରାପ୍ତ ତାଲିମ ଓ ଦକ୍ଷତାକୁ ନେଇ ସେମାନେ କିପରି ନିଜର ଜୀବନ ଜୀବିକା କରିପାରିବେ ତାହ ହିଁ ଏହି ନାଟ୍ୟ କର୍ମଶାଳାର ମୁଖ୍ୟ ଉଦ୍ଦେଶ୍ୟ ଅଟେ । ଆଗାମୀ ଦିନରେ ଉକ୍ତ କର୍ମଶାଳାର କଳେବରକୁ ଅଧିକ ବ୍ୟାପକ କରିବା ପାଇଁ ମଧ୍ୟ ଆଦିମ ସଂସ୍କୃତି ଅନୁଷ୍ଠାନ କେନ୍ଦ୍ର ସଙ୍ଗୀତ ନାଟକ ଏକାଡ଼େମୀ, ଭାରତ ସରକାରଙ୍କ ପକ୍ଷରୁ ପଦକ୍ଷେପ ଗ୍ରହଣ କରାଯିବ । ଏହି ନାଟ୍ୟ କର୍ମଶାଳାରେ ଯୋଗ ଦେବା ପାଇଁ ପ୍ରଶିକ୍ଷାର୍ôଥମାନଙ୍କର ଚୟନ ପ୍ରକ୍ରିୟା ଆରମ୍ଭ ଚାଲୁଥିବା ବେଳେ ଆଶାୟୀମାନେ ଚୟନ ପ୍ରକ୍ରିୟାରେ ନିଜକୁ ସାମିଲ୍ କରିବା ପାଇଁ ନିମ୍ନରେ ଦିଆଯାଇଥିବା “ଆଦିମ୍-ସଂସ୍କୃତି”ର ଆଞ୍ଚଳିକ କେନ୍ଦୁଝର ଶାଖା ଅଥବା କର୍ମଶାଳା ସଂଯୋଜକ ଡଃ ରୁଦ୍ରମଣି ପାତ୍ରଙ୍କ ସହ ଯୋଗାଯୋଗ କରିପାରିବେ ।
