ବୁଝି ହେବ ମାଙ୍କଡ଼ର ଧ୍ୱନି

ମାଙ୍କଡ଼ର ଧ୍ୱନିକୁ ବୁଝିବା ଏବେ ସହଜ ହେବ । ଏହା ମାଧ୍ୟମରେ ସେ କ’ଣ ସୂଚିତ କରିବାକୁ ଚାହୁଁଛି ତାହା ଜାଣିହେବ । ସମ୍ପ୍ରତି ବୈଜ୍ଞାନିକ ମାଙ୍କଡର ଧ୍ୱନିକୁ ଡିକୋଡ କରିଛନ୍ତି । ମାରାମୋସେଟ୍ ପ୍ରଜାତିର ମାଙ୍କଡର ବିଭିନ୍ନ ଧ୍ୱନିକୁ ଡିକୋଡ଼ କରି ଏହାକୁ ମନୁଷ୍ୟ ବୁଝିପାରୁଥିବା ଭାଷାରେ ପ୍ରକାଶ ପାଇଁ ଉଦ୍ୟମ ଜାରି ରହିଛି । ଧ୍ୱନି ସୃଷ୍ଟି ସମୟରେ ମାଙ୍କଡର ମସ୍ତିଷ୍କର ସ୍ନାୟୁ କୋଷିକାରୁ ଉତ୍ପନ୍ନ ହେଉଥିବା ତରଙ୍ଗକୁ ଟୁବିନଜେନ ବିଶ୍ୱବିଦ୍ୟାଳୟର ଗବେଷକ ସଂରକ୍ଷିତ କରିଛନ୍ତି । ମନୁଷ୍ୟ ସୃଷ୍ଟିର ପ୍ରାଥମିକ ଅବସ୍ଥାରେ ଏପରି ଧ୍ୱନି ସୃଷ୍ଟି କରୁଥିବାର ସମ୍ଭାବନା ରହିଛି । ପରବର୍ତ୍ତୀ ସମୟରେ ଜୈବ ବିବର୍ତ୍ତନ ଯୋଗୁ ମନୁଷ୍ୟର କ୍ରମବିକାଶ ହୋଇ ପରସ୍ପର ମଧ୍ୟରେ ଯୋଗାଯୋଗ ସ୍ଥାପନ କରିବା ତଥା ମନର ଭାବକୁ ଶବ୍ଦରେ ପରିପ୍ରକାଶ ପାଇଁ ନାନା ପ୍ରକାର ଭାଷାର ସୃଷ୍ଟି ହୋଇଥିଲା । ବିଭିନ୍ନ କଥିତ ଭାଷାକୁ ବୁଝିବା ଯେପରି ସହଜ ନୁହେଁ ସେପରି ମାଙ୍କର ଧ୍ୱନିକୁ ବୁଝିବା ସହଜ ନୁହେଁ । କଥିତ ଭାଷା ସମୟରେ ମନୁଷ୍ୟ ମସ୍ତିଷ୍କ କୋଷିକାରେ ଭିନ୍ନ ଭିନ୍ନ ତରଙ୍ଗ ଉତ୍ପନ୍ନ ହୋଇଥାଏ । ସେହିପରି ମାଙ୍କଡର ମସ୍ତିଷ୍କରେ ମଧ୍ୟ ତରଙ୍ଗ ସୃଷ୍ଟି ହୋଇଥାଏ । ଏହି ତରଙ୍ଗକୁ ଡିକୋଡ କରି ପରବର୍ତ୍ତୀ ସମୟରେ ଏହାକୁ କୋଡିଂ କରାଗଲେ ମାଙ୍କଡ ଧ୍ୱନି ମାଧ୍ୟମରେ କ’ଣ କହିବାକୁ ଚାହୁଁଛି ତାହା ସହଜରେ ଜାଣିହେବ ବୋଲି ବୈଜ୍ଞାନିକମାନେ ସୂଚିତ କରିଛନ୍ତି ।