ବ୍ଲକ କାର୍ଯ୍ୟାଳୟ ସମ୍ମୁଖରେ କଂଗ୍ରେସର ଗଣଧାରଣା

ନିମାପଡା, (ସନ୍ତୋଷ ଦାଶ):ଆଜି ପୂର୍ବାହ୍ନରେ ନିମାପଡା ମହିଳା କଂଗ୍ରେସ ପକ୍ଷରୁ ନିମାପଡ଼ା ପଞ୍ଚାୟତ ସମିତି କାର୍ଯ୍ୟାଳୟ ସମ୍ମୁଖରେ ଏକ ପ୍ରତିବାଦ ସଭା ଓ ଗଣଧାରଣା ଅନୁଷ୍ଠିତ ହୋଇଯାଇଛି।ସୂଚନା ଅନୁଯାୟୀ ନିମାପଡା ପଞ୍ଚାୟତ ସମିତି ଅଧିନସ୍ଥ କଳାପାଞ୍ଚଣ ଗ୍ରାମ ପଂଚାୟତ ସରପଞ୍ଚ ଗୀତାଞ୍ଜଳି ଜେନା ପଂଚାୟତର ଅନେକ ସମସ୍ୟା ନେଇ ମଣ୍ଡଳ ଉନ୍ନୟନ ଅଧିକାରୀଙ୍କ ଦୃଷ୍ଟି ଆକର୍ଷଣ କରିଥିଲେ ମଧ୍ୟ ବ୍ଲକ ପ୍ରଶାସନ କୌଣସି ସାହାଯ୍ୟ ସହଯୋଗ ନକରି ଦଳୀୟ ମନୋବୃତ୍ତି ରଖି ବିଭିନ୍ନ ସମୟରେ ନକରାତ୍ମକ ମନ୍ତବ୍ୟ ଦେବା ଓ ଗ୍ରାମ ପଂଚାୟତର କାର୍ଯ୍ୟ ନିର୍ବାହୀ ଅଧିକାରୀ ସରପଞ୍ଚଙ୍କୁ ଦୁର୍ବ୍ୟବହାର ପ୍ରଦର୍ଶନ କରିବା ଘଟଣାକୁ ନେଇ ଜିଲ୍ଲାପାଳଙ୍କ ଦୃଷ୍ଟି ଆକର୍ଷଣ କରାଯାଇଥିଲା।ମାତ୍ର ଜିଲ୍ଲାପାଳ ଏହି ଘଟଣାରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ ନକରିବାରୁ ବିବାଦ ଉଗ୍ରରୂପ ଧାରଣ କରିଥିଲା।ଯାହା ଫଳରେ ପଂଚାୟତର ବିଭିନ୍ନ ଉନ୍ନୟନମୂଳକ କାର୍ଯ୍ୟ ସମ୍ପୂର୍ଣ୍ଣ ଠପ ହୋଇଯାଇଛି।ଏଣୁ ପଂଚାୟତବାସୀ ମାନେ ବିଭିନ୍ନ ସମସ୍ୟାର ସମ୍ମୁଖୀନ ହେଉଛନ୍ତି।ଏହି ଘଟଣାର ପ୍ରତିବାଦରେ ନିମାପଡା ପଞ୍ଚାୟତ ସମିତି କାର୍ଯ୍ୟାଳୟ ସମ୍ମୁଖରେ ବ୍ଲକ ମହିଳା କଂଗ୍ରେସ ସଭାନେତ୍ରୀ ପ୍ରଗତି ବରାଳଙ୍କ ନେତୃତ୍ବରେ ଜିଲ୍ଲା ମହିଳା କଂଗ୍ରେସ ସଭାନେତ୍ରୀ ନିରୁପମା ପାତ୍ର ଯୋଗଦେଇ ବ୍ଲକ ପ୍ରଶାସନ ର ଏତାଦୃଶ କାର୍ଯ୍ୟକୁ ଘୋର ନିନ୍ଦା କରିବା ସହ ଶାନ୍ତିପୂର୍ଣ୍ଣ ଉପାୟରେ ପ୍ରତିବାଦ କରିବା ସହ ଧାରଣାରେ ବସିରହିଥିଲେ। ଅନ୍ୟମାନଙ୍କ ମଧ୍ୟରେ ଆଇନଜୀବି ସୁଧିର ମହାନ୍ତି,ବିଦୁଲତା ଆଚାର୍ଯ୍ୟ,ଯୁବନେତା ସଞ୍ଜୟ ନାୟକ,କେଶବ ଚନ୍ଦ୍ର ପ୍ରଧାନ, ବନ ବିହାରୀ ଦାଶ, ପୂର୍ବତନ ସରପଂଚ ଗୋବିନ୍ଦ ଚନ୍ଦ୍ର ମଲ୍ଲିକ, କାଳନ୍ଦୀ ବାରିକ,ଦେବେନ୍ଦ୍ର ପ୍ରଧାନ ,ନିଶିକାନ୍ତ ସ୍ବାଇଁ,ପୂର୍ବତନ ସମିତିସଭ୍ୟ ନରେନ୍ଦ୍ର ବେହେରାଙ୍କ ସମେତ ଶତାଧିକ ଦଳୀୟ କର୍ମୀ ଯୋଗ ଦେଇଥିଲେ।ମଣ୍ଡଳ ଉନ୍ନୟନ ଅଧିକାରୀ ବସନ୍ତ କୁମାର ମଲ୍ଲିକ ଧାରଣା ସ୍ଥଳରେ ପହଞ୍ଚି କର୍ମୀ ମାନଙ୍କୁ ବୁଝାସୁଝା କରିବା ସହ ଦୋଷୀ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପ୍ରତିଶୃତି ଦେବାପରେ ଧାରଣା ପ୍ରତ୍ୟାହୃତ ହୋଇଥିଲା।