ମନ୍ଦିର ନିର୍ମାଣକୁ କେନ୍ଦ୍ରକରି ଆକ୍ରମଣ, ଥାନାରେ ଅଭିଯୋଗ କଲେ ମହିଳା

ହାଟଡିହି,(ଯୁଗାବ୍ଦ ନ୍ୟୁଜ୍‌) : ନନ୍ଦିପଦା ଥାନା ଅଧିନସ୍ଥ କରଞ୍ଜପଦି ଗ୍ରାମରେ ହନୁମାନ ମନ୍ଦିରର ଭୂମୀପୁଜାକୁ ନେଇ ଗୋଟିଏ ପରିବାର ଉପରେ ସଂଘବଦ୍ଧ ଆକ୍ରମଣ କରାଯାଇଥିବା ନେଇ ନନ୍ଦିପଦା ଥାନାରେ ଅଭିଯୋଗ ହୋଇଛି । ଅଭିଯୋଗ ଅନୁଯାଇ ଗ୍ରାମରେ ହନୁମାନ ମନ୍ଦିର ନିର୍ମାଣ ପାଇଁ ଭୂମୀପୁଜା ହେଉଥିବା ବେଳେ ସେହି ଗ୍ରାମର କିଛି ବ୍ୟକ୍ତି ମନ୍ଦିର ନିର୍ମାଣକୁ ବିରୋଧ କରିବା ସହିତ ଗାଳିଗୁଲଜ କରି ଶୁଭ କଳଶ ଓ ଶୁଭ ପଥରକୁ ଫୋପଡା ଫୋପଡି କରି ଗାଁ ବ୍ରାହ୍ମଣକୁ ବିଦା କରିଦେଇଥିଲେ । ପ୍ରବଳ ଗାଳିଗୁଲଜ କରିବା ସହିତ ଗ୍ରାମର ନାରାୟଣ ସା ଓ ତାଙ୍କ ପତ୍ନୀ ସାବିତ୍ରୀ ସା, ଓ ତାଙ୍କ ପରିବାର ଲୋକଙ୍କୁ ଟଣା ଘୋଷରା କରି ଜୀବନରେ ମାରିଦେବାକୁ ଧମକ ଚମକ ଦେବାରୁ ସେମାନେ ଭୟଭୀତ ହୋଇ ଘରକୁ ଫେରି ଯାଇଥିଲେ । ରାତି ୧୧ଟା ସମୟରେ ଗାଁ ଶିବମନ୍ଦିରରେ ମହାଦୀପ ଉଠାଯାଉଥିବା ସମୟରେ ସେହି ବ୍ୟକ୍ତିମାନେ ମନ୍ଦିର ନିକଟରେ ପହଞ୍ଚି ଦୀପ ଜାଳୁଥିବା ନାରାୟଣ ସାଙ୍କୁ ମାରଧର କରିବା ସହିତ ଏହାର ବିରୋଧ କରିବାରୁ ତାଙ୍କ ପତ୍ନୀ ସାବିତ୍ରୀ ସାଙ୍କୁ ଠେଲାପେଲା କରିବା ସହିତ ଉଲଗ୍ନ କରି ପିଟାମରା କରିଥିଲେବୋଲି ସାବିତ୍ରୀ ନନ୍ଦିପଦା ଥାନାରେ ଅଭିଯୋଗ କରିଛନ୍ତି । ଏହି ଅଭିଯୋଗ ପତ୍ରରେ ସୁବାସ ଜେନା, ଗୋବିନ୍ଦ ଜେନା, ଅଞ୍ଜନା ନାୟକ, ମୁକ୍ତିକାନ୍ତ ନାୟକଙ୍କ ସମେତ ୧୩ଜଣଙ୍କ ବିରୁଦ୍ଧରେ ସାବିତ୍ରୀ ଥାନାରେ ଅଭିଯୋଗ କରିଛନ୍ତି । ପୁଲିସ ଅଭିଯୋଗ ପାଇବାପରେ ତଦନ୍ତ ଆରମ୍ଭ କରିଛି । ଏହାକୁ ନେଇ ଗ୍ରାମରେ ଉତ୍ତେଜନା ଲାଗି ରହିଛି ।