ମା ମଙ୍ଗଳାଙ୍କ ମନ୍ଦିରରେ ତ୍ରୀ ଦିବସୀୟ ବାସନ୍ତିକ ଦୂର୍ଗାପୂଜା ଆରମ୍ଭ
ନିମାପଡ଼ା,(ସନ୍ତୋଷ କୁମାର ଦାଶ): ଚୈତ୍ରମାସର ଷଷ୍ଠୀ ତିଥି।ପୁରୀ ଜିଲ୍ଲା କାକଟପୁରର ଅଧିଷ୍ଠାତ୍ରୀ ଦେବୀ ମା ମଙ୍ଗଳାଙ୍କ ମନ୍ଦିରରେ ପାରମ୍ପରିକ ପ୍ରଥାନୁସାରେ ଆରମ୍ଭ ହୋଇଛି ତ୍ରୀଦିବସୀୟ ବାସନ୍ତିକ ଦୂର୍ଗା ପୂଜା। ମାଙ୍କ ସହସ୍ରାକୁମ୍ଭାଭିଷେକ ସ୍ନାନ ଅନୁଷ୍ଠିତ ପରେ ମାଙ୍କୁ ଚନ୍ଦନ ବେଶରେ ସଜ୍ଜିତ କରାଯାଇଥିଲା। ପୂଜାପଣ୍ଡା ଓ ମନ୍ଦିର ପୁରୋହିତଙ୍କ ଦ୍ବାରା କଳସ ସ୍ଥାପନା ସହିତ ଅଖଣ୍ଡ ଦୀପ ପ୍ରଜ୍ବଳନ କରାଯାଇ ଥିଲା। ତା ପରେ ସୂର୍ଯ୍ୟ ପୂଜା, ସିଂହ ପୂଜା, ଦ୍ଵାରପାଳ ପୂଜା, କଳସ ପୂଜା ପରେ ଷୋଡ଼ଶ ଉପଚାର ରେ ବଲ୍ଲଭ ଧୂପ ଓ ଚଣ୍ଡୀପାଠ ଅନୁଷ୍ଠିତ ହୋଇଥିଲା। ତା ପରେ ସକାଳ ଧୂପ, ଦ୍ୱିପ୍ରହର ଧୂପ, ଭଣ୍ଡ ଧୂପ ପରେ ମନ୍ଦିର ପହୁଡ଼ ପଡିଥିଲା। ସଂଧ୍ୟାରେ ମନ୍ଦିର ପହୁଡ଼ ଫିଟାଯାଇ ସଂଧ୍ୟା ଆଳତୀ ପରେ ମାଙ୍କ ସ୍ନାନ ନୀତି ଅନୁଷ୍ଠିତ ହୋଇ ଥିଲା। ମାଙ୍କୁ କଳାକଲିରେ କାତିଖର୍ପର ବେଶରେ ସଜ୍ଜିତ କରାଯିବା ପରେ ମନ୍ଦିର ପହୁଡ଼ ଫିଟିଥିଲା। ମାତୃ ଭକ୍ତ ମାନେ ଧାଡ଼ିରେ ମନ୍ଦିରରେ ପ୍ରବେଶ କରି ମାଙ୍କୁ ଦର୍ଶନ କରିଥିଲେ। ପୂଜା ପଣ୍ଡା ଭାବେ ରଘୁନାଥ ଦିକ୍ଷୀତ ମାଙ୍କୁ ବେଶ ଓ ସମସ୍ତ ପୂଜା ନୀତି ଅନୁଷ୍ଠିତ କରିଥିବା ବେଳେ ପାଳିଆ ସେବକ ଭାବେ ତୀର୍ଥ ଚନ୍ଦ୍ର ଦିକ୍ଷୀତ ପୂଜାପଣ୍ଡା ଙ୍କୁ ସମସ୍ତ ପ୍ରକାର ସାହାଯ୍ୟ ସହଯୋଗ ଯୋଗାଇ ଦେଇଥିଲେ।ମନ୍ଦିର ପ୍ରଶାସନ ଓ ପୋଲିସ ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା ଗ୍ରହଣ କରାଯାଇଥିଲା।
