ଶ୍ରୀମନ୍ଦିରରେ ମହିଳା ହୋମଗାର୍ଡ଼-ସେବାୟତ ମୁହାଁମୁହିଁ

ପୁରୀ : ଶ୍ରୀମନ୍ଦିରରେ ମହାପ୍ରଭୁଙ୍କ ଦର୍ଶନ ବେଳେ ଆଜି ଜନୈକ ମହିଳା ହୋମଗାର୍ଡ଼ଙ୍କ ସହ ସେବାୟତ ଓ ଜେଟିପିଙ୍କ ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଥିଲା । ଏହାକୁ କେନ୍ଦ୍ର କରି ଉତ୍ତେଜନା ପରିସ୍ଥିତି ଦେଖାଦେବାରୁ ପାଖରେ ଥିବା ଅନ୍ୟ କିଛି ସେବାୟତ ଓ ପୁଲିସ ବୁଝାସୁଝା କରିବା ପରେ ପରିସ୍ଥିତି ଶାନ୍ତ ପଡ଼ିଛି । ଏଭଳି ପରିସ୍ଥିତିରେ ମହିଳା ହୋମଗାର୍ଡ଼ ଜଣକ ନିଜ ଜିଦ୍ ପୂରା କରିବାକୁ ଯାଇ ବେହରଣ ଦ୍ୱାର ଦେଇ ନିଜର କିଛି ଚିହ୍ନା ଲୋକଙ୍କୁ ମହାପ୍ରଭୁଙ୍କ ଦର୍ଶନ କରାଇଛନ୍ତି । ଏ ସଂକ୍ରାନ୍ତରେ ଜେଟିପି ଅସିତ ମହାନ୍ତି ଓ ପ୍ରତିହାରୀ ନିଯୋଗ ସଦସ୍ୟ ମୁଖ୍ୟ ପ୍ରଶାସକଙ୍କ ଉଦ୍ଦେଶ୍ୟରେ ଶ୍ରୀମନ୍ଦିର କମାଣ୍ଡରଙ୍କୁ ଲିଖିତ ଅଭିଯୋଗ କରିଛନ୍ତି । ଅଭିଯୋଗରେ ଉଲ୍ଲେଖ କରାଯାଇଛି, ଆଜି ସକାଳ ପ୍ରାୟ ୮ଟାରେ ଜନୈକା ମହିଳା ହୋମଗାର୍ଡ଼ ୫/୬ଜଣ ଭକ୍ତଙ୍କୁ ଧରି ମୁକ୍ତିମଣ୍ଡପ ସମ୍ମୁଖ ବେହରଣ ଦ୍ୱାର ଦେଇ ଶ୍ରୀମନ୍ଦିର ଜଗମୋହନକୁ ପ୍ରବେଶ କରିବାକୁ ଚେଷ୍ଟା କରୁଥିଲେ । ଏହି ସମୟରେ ପ୍ରତିହାରୀ ନିଯୋଗ ପକ୍ଷରୁ ନିୟୋଜିତ ଜନୈକ ସେବାୟତ ହୋମଗାର୍ଡ଼ଙ୍କୁ ଅଟକାଇଥିଲେ । କିନ୍ତୁ ହୋମଗାର୍ଡ଼ ଜଣକ ତାଙ୍କ ସହ ଯୁକ୍ତିତର୍କ କରିଥିଲେ ।