ସ୍କୁଲ ଫି’ ଛାଡ଼ ପାଇଁ ହାଇକୋର୍ଟରେ ଜନସ୍ବାର୍ଥ ମାମଲା
କଟକ,(ସଞ୍ଜୀବ କୁମାର ତିୱାରୀ):ଲକ୍ଡାଉନ୍ ଚାଲିଥିବା ଯୋଗୁ ଏବେ ଅଭିଭାବକଙ୍କ ରୋଜଗାର ବନ୍ଦ ହୋଇଯାଇଛି। ଏଭଳି ସମୟରେ ସେମାନେ ନିଜ ପିଲାଙ୍କ ସ୍କୁଲ ଫି’ ଦାଖଲ କରିପାରିବେ ନାହିଁ। ତେଣୁ ମାର୍ଚ୍ଚ ଠାରୁ ଜୁନ୍ ପର୍ଯ୍ୟନ୍ତ ସ୍କୁଲ ଫି’ ଛାଡ଼ କରାଯିବା ସମ୍ପର୍କରେ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେବାକୁ ଗୁରୁବାର ହାଇକୋର୍ଟରେ ଏକ ଜନସ୍ବାର୍ଥ ମାମଲା ରୁଜୁ କରାଯାଇଛି। ସମ୍ବଲପୁରର ଆଇନ୍ଜୀବୀ ମହମ୍ମଦ ମୁସ୍ତାକ୍ ଅନ୍ଶାରୀଙ୍କ ପକ୍ଷରୁ ଏହି ମାମଲା ରୁଜୁ କରାଯାଇଛି।ଆବେଦନକାରୀଙ୍କ ପକ୍ଷରୁ କୁହାଯାଇଛି ଯେ, ଲକ୍ଡାଉନ୍ ପାଇଁ ଏବେ ସମସ୍ତ ବ୍ୟବସାୟିକ ପ୍ରତିଷ୍ଠାନରେ ତାଲା ପଡ଼ିଛି। ମେ’ ୩ତାରିଖ ପର୍ଯ୍ୟନ୍ତ କେନ୍ଦ୍ର ସରକାର ଲକ୍ଡାଉନ୍ ଘୋଷଣା କରିଛନ୍ତି। ହେଲେ ଦିନକୁ ଦିନ ଆକ୍ରାନ୍ତଙ୍କ ସଂଖ୍ୟା ବଢ଼ୁଥିବା ଯୋଗୁ ଲକ୍ଡାଉନ୍ କଟକଣା କେବେ ଉଠିବ, ତାହା କହିବା କଷ୍ଟକର। ଏହାର ପ୍ରଭାବରେ ଲୋକମାନେ ଘୋର ଆର୍ଥତ୍କ ଦୂରାବସ୍ଥାର ଶିକାର ହେଲେଣି। ଏ ପରିକି ଦୁଇ ମୁଠାଖାଇବା ପାଇଁ ସରକାରଙ୍କ ଉପରେ ନିର୍ଭର କରିବାକୁ ପଡ଼ୁଛି। ଯେଉଁଠି ଲୋକଙ୍କ ପାଖରେ ଦୈନନ୍ଦିନ ଖର୍ଚ୍ଚ ପାଇଁ ଟଙ୍କା ନାହିଁ, ସେଠାରେ ସେମାନେ ସ୍କୁଲ ଫି’ ଦେବା କଷ୍ଟକର ହୋଇପଡ଼ିବ। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏପ୍ରିଲ୍ ୧୦ତାରିଖରେ ସ୍କୁଲ ଫି’ ନେଇ ଏକ ଟୁଇଟ୍ କରିଥିଲେ। ଏପ୍ରିଲ୍ଠାରୁ ଜୁନ୍ ପର୍ଯ୍ୟନ୍ତ ସ୍କୁଲ ଫି’ ହ୍ରାସ କିମ୍ବା ସ୍ଥଗିତ ରଖିବା ପାଇଁ ଘରୋଇ ସ୍କୁଲଗୁଡ଼ିକୁ ନିବେଦନ କରିଥିଲେ। କେନ୍ଦ୍ର ମାନବ ସମ୍ବଳ ବିଭାଗ ତରଫରୁ ମଧ୍ୟ ଅନୁରୁପ ନିବେଦନ କରାଯାଇଛି। ଅନ୍ୟପଟେ ଅତିରିକ୍ତ ଫି’ ଆଦାୟ ନ କରିବା ପାଇଁ ସିବିଏସ୍ଇ ପକ୍ଷରୁ ବୋର୍ଡ଼ ଅଧିନସ୍ଥ ସ୍କୁଲଗୁଡ଼ିକୁ ଗତ ୧୭ତାରିଖରେ ନିର୍ଦ୍ଦେଶ ଦିଆଯାଇଛି। ଏଣୁ ତୁରନ୍ତ ରାଜ୍ୟ ସରକାର ସ୍ବତନ୍ତ୍ର ନିର୍ଦ୍ଦେଶନାମା ଜାରି କରନ୍ତୁ। ମାର୍ଚ୍ଚ ଠାରୁ ଜୁନ୍ ପର୍ଯ୍ୟନ୍ତ କିମ୍ବା ସମ୍ପୂର୍ଣ୍ଣ ଭାବେ ପାଠପଢ଼ା ଆରମ୍ଭ ହେବା ଯାଏଁ ସ୍କୁଲ ଫି ଛାଡ଼ କରାଯାଉ। ୨୦୨୦-୨୧ ଶିକ୍ଷା ବର୍ଷରେ ସ୍କୁଲ ଫି’ ବୃଦ୍ଧି କିମ୍ବା ଅନ୍ୟାନ୍ୟ ପ୍ରକାର ଫି’ ଆଦାୟ ଉପରେ ରୋକ୍ ଲଗାଯାଉ। ଯେଉଁମାନେ ଏହାକୁ ଅବମାନନା କରିବେ, ସେମାନଙ୍କ ବିରୋଧରେ ଦୃଢ଼ ଆଇନ୍ଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ। ଅପରପକ୍ଷେ ସ୍କୁଲ ବନ୍ଦ ରହିଥିବା ଯୋଗୁ ଘରୋଇ ସ୍କୁଲ କର୍ତ୍ତୃପକ୍ଷ ସେମାନଙ୍କ ଶିକ୍ଷକ ଏବଂ କର୍ମଚାରୀଙ୍କୁ ଦରମା ପ୍ରଦାନ କରିବାରେ ଅସୁବିଧାର ସମ୍ମୁଖିନ ହେବେ। ଏପରିକି ବିଦ୍ୟୁତ୍ ବିଲ୍ ଏବଂ ଅନ୍ୟାନ୍ୟ ଖର୍ଚ୍ଚ ତୁଲାଇବା ମଧ୍ୟ୍ୟ ସେମାନଙ୍କ ପକ୍ଷେ କଷ୍ଟ ହେବ। ଏଣୁ ରାଜ୍ୟ ସରକାର ଘରୋଇ ସ୍କୁଲ ଗୁଡ଼ିକପାଇଁ ସ୍ବତନ୍ତ୍ର ଅନୁଦାନ ପ୍ରଦାନ କରନ୍ତୁ ବୋଲି ଆବେଦନରେ ଦର୍ଶାଯାଇଛି।
