ଡାକବିଭାଗ ପକ୍ଷରୁ ଆୟୋଜିତ କୁଇଜ୍ ପରୀକ୍ଷା ଦେଲେ ୧୩୩ ଛାତ୍ରଛାତ୍ରୀ
ଆସିକା (ୱାଇଏନ୍ଏସ୍): ଛାତ୍ରଛାତ୍ରୀମାନଙ୍କ ମଧ୍ୟରେ ଡାକବିଭାଗର ଫିଲାଟେଲିକ୍ ଅଭ୍ୟାସର ବ୍ୟାପକ ପ୍ରଚାର ଓ ପ୍ରସାର ଲକ୍ଷ୍ୟରେ ସ୍ଥାନୀୟ ସରକାରୀ ବାଳିକା ଉଚ୍ଚ ବିଦ୍ୟାଳୟରେ ଆୟୋଜିତ କୁଇଜ୍ ପରୀକ୍ଷାରେ ୯ଟି ଶିକ୍ଷାନୁଷ୍ଠାନର ୧୩୩ ଜଣ ଛାତ୍ରଛାତ୍ରୀ ପରୀକ୍ଷା ଦେଇଥିଲା ବେଳେ କୃତିତ୍ୱ ହାସଲ କରିଥିବା ବିଦ୍ୟାର୍ଥୀମାନଙ୍କୁ ଡାକବିଭାଗ ପକ୍ଷରୁ ପ୍ରତିମାସରେ ୫ ଶହ ଟଙ୍କା ଲେଖାଏଁ ପ୍ରୋତ୍ସାହନ ରାଶି ଏକ ବର୍ଷ ପର୍ଯ୍ୟନ୍ତ ପ୍ରଦାନ କରାଯିବ ବୋଲି ଜଣାପଡିଛି । କେନ୍ଦ୍ର ସରକାରଙ୍କ ଡାକବିଭାଗର ନିର୍ଦ୍ଦେଶକ୍ରମେ ପୂର୍ବବର୍ଷମାନଙ୍କ ଭଳି ଚଳିତବର୍ଷ ମଧ୍ୟ ଆସିକା ଡାକମଣ୍ଡଳ ପକ୍ଷରୁ ଫିଲାଟେଲିକ୍ କୁଇଜ୍ ପରୀକ୍ଷା ସହ ପ୍ରଥମ ସ୍ତରୀୟ ଦୀନଦୟାଲ୍ ସ୍ପର୍ଶ ପରୀକ୍ଷା ଅନୁଷ୍ଠିତ ହୋଇଯାଇଛି । ଆସିକା ଡାକମଣ୍ଡଳର ଅଧୀକ୍ଷକ କର୍ଣ୍ଣୋଲ୍ ଦିଲୀପ୍ କୁମାର ବେହେରାଙ୍କ ପରାମର୍ଶ ଓ ଭାରପ୍ରାପ୍ତ ଡାକ ଅଧୀକ୍ଷକ ପରମାନନ୍ଦ କଣ୍ଠ ଏବଂ ପ୍ରଧାନ ଡାକଘରର ଡାକପାଳ ସନ୍ଧ୍ୟା ପାତ୍ରଙ୍କ ପ୍ରତ୍ୟେକ୍ଷ ତତ୍ତ୍ୱାବଧାନରେ ସ୍ଥାନୀୟ ସରକାରୀ ବାଳିକା ଉଚ୍ଚ ବିଦ୍ୟାଳୟରେ ଅନୁଷ୍ଠିତ ଏହି ପରୀକ୍ଷାରେ ଡିପଲ୍ ସ୍କୁଲ, ସରସ୍ୱତୀ ଶିଶୁ ବିଦ୍ୟାମନ୍ଦିର, ଓଡିଶା ଆଦର୍ଶ ବିଦ୍ୟାଳୟ, ହରିହର ହାଇସ୍କୁଲ, ପିଏମ୍ ଶ୍ରୀ କେନ୍ଦ୍ରୀୟ ବିଦ୍ୟାଳୟ ସମେତ ଆସିକା ଅଞ୍ଚଳର ୯ଟି ଶିକ୍ଷାନୁଷ୍ଠାନରୁ ଷଷ୍ଠରୁ ନବମ ଶ୍ରେଣୀରେ ଅଧ୍ୟୟନରତ ଥିବା ପ୍ରାୟ ୧୩୩ ଜଣ ଛାତ୍ରଛାତ୍ରୀ ଏହି ପରୀକ୍ଷା ଦେଇଥିବା ଜଣାପଡିଛି । ଆସିକା ଡାକମଣ୍ଡଳ ପକ୍ଷରୁ ବଡକୋଦଣ୍ଡା ସ୍ଥିତ ସେଣ୍ଟ ଜାଭିୟର୍ ହାଇସ୍କୁଲରେ ମଧ୍ୟ ଏହି ପରୀକ୍ଷା ହୋଇଥିଲା ବେଳେ ସେଠାରେ ୧୨୮ ଜଣ ପରୀକ୍ଷାର୍ଥୀ ପରୀକ୍ଷା ଦେଇଥିବା ଲକ୍ଷ୍ୟ କରାଯାଇଛି । ଆସିକା ଡାକମଣ୍ଡଳ ପକ୍ଷରୁ ଫିଲାଟେଲିକ୍ କୁଇଜ୍ ପରୀକ୍ଷା ସହ ପ୍ରଥମ ସ୍ତରୀୟ ଦୀନଦୟାଲ୍ ସ୍ପର୍ଶ ପରୀକ୍ଷାକୁ ସୁପରିଚାଳନା କରିବା ଦିଗରେ ବିଭାଗୀୟ କର୍ମଚାରୀ ଦୀପକ ରଂଜନ ପାଣିଗ୍ରାହୀ, ଲକ୍ଷ୍ମୀ ନାରାୟଣ ପାତ୍ର, ସଚ୍ଚିଦାନନ୍ଦ ସାହୁ, ସନ୍ତୋଷ କୁମାର ଗୌଡ, ଅନୁପ ପାଣିଗ୍ରାହୀ, ପ୍ରଭାତ କୁମାର ପ୍ରଧାନ, ଶୁଭ୍ରକାନ୍ତ ପାତ୍ର, ପ୍ରତାପ ସେଠୀ, କାହ୍ନୁଚରଣ ପ୍ରଧାନ, ମହାକାଳ ନାୟକ, ସନ୍ତୋଷ କୁମାର ସାହୁ, ସିମାଞ୍ଚଳ ମହାରଣା, ବୁଲୁ ସେଠୀଙ୍କ ସମେତ ବହୁ କର୍ମଚାରୀ ସକ୍ରିୟ ସହଯୋଗ କରିଥିବା ଲକ୍ଷ୍ୟ କରାଯାଇଛି ।
