ରାସ୍ତାକୁ ଓହ୍ଲାଇଲେ ମୁମ୍ବାଇବାସୀ

ମୁମ୍ବାଇ(ଏଜେନ୍ସି): ମହାରାଷ୍ଟ୍ର ସରକାରଙ୍କ ଉପକୂଳବର୍ତ୍ତୀ ସଡ଼କ ପରିଯୋଜକୁ ବିରୋଧ କରି ରବିବାର ଶହଶହ ମୁମ୍ବାଇବାସୀ ରାଜରାସ୍ତାକୁ ଓହ୍ଲାଇବା ସହ ବିକ୍ଷୋଭ ପ୍ରଦର୍ଶନ କରିଛନ୍ତି । ସେମାନଙ୍କ କହିବାକଥା ହେଉଛି ଯେ, ରାଜ୍ୟ ସରକାରଙ୍କ ଏହି ଯୋଜନାରେ ଉପକୂଳବର୍ତ୍ତୀ ଅଞ୍ଚଳରେ ବସବାସ କରୁଥିବା ମତ୍ସଜୀବିମାନେ ଗଭୀର ଭାବେ ପ୍ରଭାବିତ ହେବେ । ବିକ୍ଷୋଭକାରୀମାନେ ବ୍ରିଚ୍ କ୍ୟାଣ୍ଡିର ଟାଟା ଗାର୍ଡେନରେ ଏକତ୍ର ହୋଇ ଏହି ପରିଯୋଜନାକୁ ବିରୋଧ କରିଛନ୍ତି । ୨୯.୨ କିଲୋମିଟରର ଉପକୂଳବର୍ତ୍ତୀ ରାସ୍ତା ମୁମ୍ବାଇର ପଶ୍ଚିମ ଉପକୂଳର କନ୍ଦିବଲି ଏବଂ ମେରାଇନ୍ ଲାଇନ୍କୁ ଯୋଡ଼ିବ ।
ଅନ୍ୟପକ୍ଷେ ବିକ୍ଷୋଭକାରୀମାନଙ୍କ ବିରୋଧ ପ୍ରଦର୍ଶନ ଉପରେ ପୁଲିସ୍ ହସ୍ତକ୍ଷେପ କରି ସେମାନଙ୍କ ବିରୋଧରେ ଧାରା ୧୪୪ ଲଗାଇବାର ଧମକ ଦେଇଛି । ପୂର୍ବରୁ ବମ୍ବେ ହାଇକୋର୍ଟ ଉପକୂଳବର୍ତ୍ତୀ ସଡ଼କ ପରିଯୋଜନା ଉପରେ ରୋକ ଲଗାଇବା ପାଇଁ ଅନ୍ତରୀମ ଆଦେଶ ପାରିତ କରିବାକୁ ମନା କରିଦେଇଥିଲେ । ଭିକ୍ଷୋଭକାରୀ ଅଭିଯୋଗ ଆଣି କହିଛନ୍ତି ଯେ, ଏହି ସଡ଼କ ନିର୍ମାଣ ସକାଶେ ରାଜ୍ୟ କର୍ତ୍ତୃପକ୍ଷମାନେ ମତ୍ସ୍ୟଜୀବୀଙ୍କୁ ସେମାନଙ୍କ ଜାଲ ଓ ଅନ୍ୟ ସାମଗ୍ରୀ ଧରି ସେସ୍ଥାନ ଛାଡ଼ି ପଳାଇବାକୁ କହିଛନ୍ତି । ଏହି ପ୍ରକଳ୍ପ ଅନେକ ମାଛ ଧରାଳୀଙ୍କ ଜୀବିକା ନିର୍ବାହ ଉପରେ ପ୍ରଭାବ ପକାଇବ ।