ବିଦେଶୀ ମଦ ବୋଝେଇ  ଅଟୋ ଓଲଟିଲା ; ଚାଳକ ଗୁରୁତର 

ଦିଗପହଣ୍ଡି, (ଯୁଗାବ୍ଦ ନ୍ୟୁଜ) :ଦିଗପହଣ୍ଡି – ବ୍ରହ୍ମପୁର ୧୭ ନଂ ରାଜ୍ୟ ରାଜପଥ ର  ପୀତାମ୍ବରପୁର ଏବଂ ଗଣିଆନାଳ ଛକ ମଧ୍ଯବର୍ତ୍ତୀ ସ୍ଥାନରେ ବୁଧବାର ଅପରାହ୍ନ ପ୍ରାୟ ୨ ଟା ରେ ଏକ ଅଟୋ ବିଲ ମଧ୍ଯକୁ ଓଲଟି ପଡିଥିବା ଦେଖାଯାଇଛି।ଏଥିରେ ପାଟପୁର ଥାନା ଅନ୍ତର୍ଗତ ଖଣ୍ଡଦେଉଳି ଗ୍ରାମର ଅଟୋ ଚାଳକ ଟୁକୁନା ସାହୁ  ଗୁରୁତର ଆହତ ହୋଇଛନ୍ତି।ତାଙ୍କର ବାମ ଗୋଡର ହାଡ ଭାଙ୍ଗି ପଦାକୁ ବାହାରିଯିବା ଫଳରେ ପ୍ରଚୁର ରକ୍ତସ୍ରାବ ଯୋଗୁଁ ସଙ୍କଟାପନ୍ନ ଅବସ୍ଥାରେ ବ୍ରହ୍ମପୁର ବଡ଼ ଡାକ୍ତରଖାନା କୁ ସ୍ଥାନାନ୍ତରିତ  କରାଯାଇଛି।ଦୁର୍ଘଟଣା ଗ୍ରସ୍ତ ଅଟୋ (ଓଆର୦୭ ଏକ୍ସ ୨୫୪୪)ଟି ବ୍ରହ୍ମପୁରରୁ ଖଣ୍ଡଦେଉଳି ଆସୁଥିବା ବେଳେ ଭାରସାମ୍ୟ ହରାଇ ଓଲଟି ପଡିଥିଲା।ସେଥିରେ ବିଦେଶୀ ମଦ ବୋଝେଇ ହୋଇଥିବାରୁ ଦୁର୍ଘଟଣା ପରେ ସେହି ରାସ୍ତା ଦେଇ ଯାଉଥିବା କିଛି ଲୋକ ମଦ ବୋତଲ ଲୁଟି ନେଇଥିବା ଜଣାପଡିଛି।
–